ఇరాన్ బాలిస్టిక్ మిస్సైళ్ల దాడి.. పశ్చిమాసియాలో ముదిరిన ఉద్రిక్తతలు

వాషింగ్టన్, జులై 29: పశ్చిమాసియాలో ఉద్రిక్తతలు మరోసారి పెరిగాయి. ఇరాన్ తాజాగా జోర్డాన్ లోని అమెరికా సైనిక స్థావరాలను లక్ష్యంగా చేసుకుని పలు బాలిస్టిక్ క్షిపణులను ప్రయోగించినట్లు అమెరికా సెంట్రల్ కమాండ్ వెల్లడించింది. అయితే ఈ దాడిని అమెరికా వైమానిక రక్షణ వ్యవస్థలు పూర్తిగా తిప్పికొట్టాయని, అన్ని క్షిపణులను విజయవంతంగా అడ్డుకున్నామని తెలిపింది.

ఆకస్మిక దాడి విఫలం.. అమెరికా సెంట్రల్ కమాండ్ ప్రకటన

ఈ దాడిని 'ఆకస్మికంగా చేయడానికి ప్రయత్నించిన వైఫల్య దాడి'గా అమెరికా సెంట్రల్ కమాండ్ (CENTCOM) అభివర్ణించింది. అమెరికా కాలమానం ప్రకారం మంగళవారం సాయంత్రం 5:45 గంటల ప్రాంతంలో ఇరాన్ భూభాగం నుంచి ఈ బాలిస్టిక్ క్షిపణులను ప్రయోగించినట్లు సెంటకామ్ తమ అధికారిక సోషల్ మీడియా 'X' ఖాతా ద్వారా వెల్లడించింది. క్షిపణులన్నింటినీ సమర్థవంతంగా ఎదుర్కొన్నామని, తమ దళాలు అత్యంత అప్రమత్తంగా, సిద్ధంగా ఉన్నాయని స్పష్టం చేసింది.

జోర్డాన్‌లోని అమెరికా స్థావరంపై దాడి

'ఆక్సియోస్' వార్తా సంస్థ కథనం ప్రకారం, జోర్డాన్‌లోని అమెరికా సైనిక స్థావరాన్ని లక్ష్యంగా చేసుకుని ఇరాన్ ఈ దాడులకు పాల్పడింది. గడిచిన శుక్రవారం ఇరాన్‌తో దౌత్యపరమైన చర్చలకు అవకాశం ఇచ్చేందుకు గానూ అమెరికా అధ్యక్షుడు డొనాల్డ్ ట్రంప్ దాడులను నిలిపివేసిన తర్వాత, ఇరాన్ పశ్చిమాసియాలోని యుఎస్ స్థావరంపై దాడి చేయడం ఇదే తొలిసారి.

గల్ఫ్ దేశాల తీవ్ర నిరసన

ఈ దాడిని జోర్డాన్ సార్వభౌమాధికారంపై జరిగిన తీవ్రమైన దాడిగా గల్ఫ్ దేశాలు పరిగణించాయి. కువైట్, ఖతార్ దేశాలు ఇరాన్ చర్యలను తీవ్రంగా ఖండించాయి.

కువైట్: జోర్డాన్ సార్వభౌమాధికారం, భూభాగ సమగ్రతకు భంగం కలిగించేలా ఇరాన్ చేసిన ఈ దాడి ప్రాంతీయ భద్రతకు పెద్ద ముప్పని పేర్కొంది. జోర్డాన్ తీసుకునే అన్ని రక్షణ చర్యలకు తమ పూర్తి మద్దతు ఉంటుందని ప్రకటించింది.

ఖతార్: డ్రోన్లు, క్షిపణులతో జోర్డాన్ సరిహద్దులను లక్ష్యంగా చేసుకుని పదేపదే దాడులకు పాల్పడటాన్ని తీవ్రంగా నిరసించింది. జోర్డాన్ ప్రజల రక్షణకు, భద్రతకు ఖతార్ అండగా ఉంటుందని తెలిపింది.

ట్రంప్ - నెతన్యాహు భేటీ వెనువెంటనే దాడి

వాషింగ్టన్‌లోని వైట్‌హౌస్‌లో అమెరికా అధ్యక్షుడు డొనాల్డ్ ట్రంప్, ఇజ్రాయెల్ ప్రధాని బెంజమిన్ నెతన్యాహు కీలక భేటీ నిర్వహించిన కొన్ని గంటల్లోనే ఈ దాడి జరగడం గమనార్హం. ఈ భేటీలో ఇరాన్ ఉగ్రవాద చర్యలు, ప్రాంతీయ భద్రతపై ఇరువురు నేతలు ప్రధానంగా చర్చించారు.

ఒప్పందానికి రాకపోతే మిగిలిన పని పూర్తి చేస్తాం: ట్రంప్

ఈ దాడికి ముందే ఇరాన్‌ను ఉద్దేశించి డొనాల్డ్ ట్రంప్ తీవ్ర హెచ్చరికలు జారీ చేశారు. ఫాక్స్ న్యూస్‌కి ఇచ్చిన ఇంటర్వ్యూలో ఆయన మాట్లాడుతూ.. 'ఇరాన్ గనుక చర్చలకు వచ్చి ఒప్పందం చేసుకోకపోతే, మళ్లీ సైనిక చర్యలు ప్రారంభించి 'మిగిలిన పనిని పూర్తి చేస్తాం'. దాని నుంచి కోలుకోవడానికి, తిరిగి నిర్మించుకోవడానికి ఇరాన్‌కు దశాబ్దాల సమయం పడుతుంది' అని వ్యాఖ్యానించారు. ఇరాన్‌లోని ప్రధాన వంతెనలు, విద్యుత్ ప్లాంట్లు వంటి కీలక మౌలిక సదుపాయాలపై దాడులు చేసేందుకు కూడా వెనుకాడమని స్పష్టం చేశారు.

ఒకవైపు అమెరికా తీవ్ర హెచ్చరికలు చేస్తుండటం, మరోవైపు ఏ మాత్రం తగ్గకుండా ఇరాన్ బాలిస్టిక్ క్షిపణులతో ప్రతిదాడికి దిగడం చూస్తుంటే పశ్చిమాసియాలో శాంతిభద్రతలు మరింత క్షీణించే పరిస్థితి కనిపిస్తోంది. గల్ఫ్ దేశాలు జోర్డాన్‌కు మద్దతుగా నిలవడంతో ఈ వివాదం అంతర్జాతీయంగా తీవ్ర ఆందోళనకు కూడా దారితీస్తోంది.

ఈ వార్తలు కూడా చదవండి:

బొండా ఉమా వివరణతో సంతృప్తి చెందిన అధిష్ఠానం

ప్రభుత్వ ఆసుపత్రులు మెరుగు

Read Latest AP News And Telangana News And International News And Telugu News