ఇటలీలో భారీ నిరసనలు.. పెరుగుతున్న ఖర్చులపై ప్రజాగ్రహం..

ఇంటర్నెట్ డెస్క్: ఇటలీలో పెరుగుతున్న జీవన వ్యయాలు, అధిక అద్దెలు, ఇంధన ధరలు, విద్యారంగంలో నిధుల కొరతకు వ్యతిరేకంగా వేలాది మంది కార్మికులు, విద్యార్థులు వీధుల్లోకి వచ్చారు. దేశవ్యాప్తంగా పలు నగరాల్లో శుక్రవారం భారీ నిరసనలు నిర్వహించారు. ప్రభుత్వ విధానాలను వ్యతిరేకిస్తూ నినాదాలు చేశారు. ఈ ఆందోళనలు ప్రధానంగా శాంతియుతంగా జరిగినప్పటికీ కొన్ని ప్రాంతాల్లో పోలీసులకు, నిరసనకారులకు మధ్య ఘర్షణలు చోటుచేసుకున్నాయి (Italy Protests 2026).

ఇటలీలోని యూఎస్‌బీ కార్మిక సంఘం పిలుపునిచ్చిన సాధారణ సమ్మెకు పెద్ద ఎత్తున స్పందన వచ్చింది. ట్రక్కు డ్రైవర్లు, టాక్సీ డ్రైవర్లు, రైతులు సహా వివిధ రంగాలకు చెందిన కార్మికులు ఆందోళనల్లో పాల్గొన్నారు. ఇటీవల పెరిగిన ఇంధన ధరలు తమ జీవనోపాధిపై ప్రభావం చూపుతున్నాయని వారు ఆందోళన వ్యక్తం చేశారు. ఈ నిరసనల్లో దేశవ్యాప్తంగా 10 నుంచి 15 లక్షల మంది పాల్గొన్నట్లు యూఎస్‌బీ సంఘం అంచనా వేసింది. రాజధాని రోమ్‌లోని ప్రధాన రైల్వే స్టేషన్ నుంచి భారీ ర్యాలీ జరిగింది. అలాగే మిలాన్‌లోనూ పెద్ద ఎత్తున నిరసనలు జరిగాయి (Italy Cost of Living Crisis).

ఈ ఆందోళనల్లో విద్యార్థులు కీలక పాత్ర పోషించారు (Italy Student Protests). పాఠశాలల్లో సరైన మౌలిక సదుపాయాలు లేకపోవడం, భవనాల నిర్వహణ సరిగా లేకపోవడం, యూనివర్సిటీ ఫీజులు అధికంగా ఉండటం వంటి సమస్యలను వారు ప్రస్తావించారు. దేశవ్యాప్తంగా నిరసనలు ఎక్కువగా శాంతియుతంగా జరిగినప్పటికీ ట్యూరిన్‌లో పరిస్థితి ఉద్రిక్తంగా మారింది. అక్కడ నిరసనకారులను చెదరగొట్టేందుకు పోలీసులు లాఠీలతో పాటు వాటర్ కేనన్లను ఉపయోగించారు. రోమ్‌లో నిరసనల ముగింపు సమయంలో కొందరు యువకులు పోలీసులపై సీసాలు విసరడంతోపాటు చెత్తకుండీలను ధ్వంసం చేసి నిప్పంటించారు.

ఇవి కూడా చదవండి..

ఢిల్లీ ఫ్యాక్టరీలో భారీ అగ్నిప్రమాదం.. నలుగురి మృతి..

పసిడి ధరలు స్వల్పంగా తగ్గాయి.. ఈ రోజు మీ నగరంలో పసిడి ధరలు ఎలా ఉన్నాయంటే..