వైట్‌హౌస్‌ చీఫ్‌ ఆఫ్‌ స్టాఫ్‌గా స్టీఫెన్‌ మిల్లర్‌.. ట్రంప్ ప్రకటన

ఇంటర్నెట్ డెస్క్: అమెరికా మధ్యంతర ఎన్నికల్లో రిపబ్లికన్‌ పార్టీ ఓటమి నేపథ్యంలో అధ్యక్షుడు డొనాల్డ్‌ ట్రంప్‌ కీలక నిర్ణయం తీసుకున్నారు. వైట్‌హౌస్‌ చీఫ్‌ ఆఫ్‌ స్టాఫ్‌ సుసీ వైల్స్‌ను ఆ బాధ్యతల నుంచి తప్పించారు. ఆమె స్థానంలో తనకు అత్యంత నమ్మకస్తుడైన డిప్యూటీ చీఫ్‌ ఆఫ్‌ స్టాఫ్‌ స్టీఫెన్‌ మిల్లర్‌ను నియమించారు. ఈనెల 9న మిల్లర్‌ ఆ బాధ్యతలు చేపడతారని ట్రంప్‌ శనివారం తన ట్రూత్‌ సోషల్‌లో వెల్లడించారు. సుసీ వైల్స్‌ తన రాజకీయ కార్యకలాపాల విభాగంలో కొనసాగుతారని తెలిపారు. చీఫ్‌ ఆఫ్‌ స్టాఫ్‌గా ఆమె అందించిన సేవలను ప్రశంసిస్తూ కృతజ్ఞతలు తెలిపారు.

2024 అధ్యక్ష ఎన్నికల తర్వాత ట్రంప్‌ మొదట నియమించిన వ్యక్తి సుసీ వైల్స్‌. వైట్‌హౌస్‌ చీఫ్‌ ఆఫ్‌ స్టాఫ్‌గా బాధ్యతలు చేపట్టిన తొలి మహిళగా ఆమె చరిత్ర సృష్టించారు. ట్రంప్‌ అధ్యక్షుడిగా ఉన్న ప్రస్తుత పదవీకాలంలో అత్యధిక కాలం ఆ బాధ్యతల్లో కొనసాగిన వ్యక్తిగా నిలిచారు. తన చివరి రోజు ఇదేనని వైల్స్‌ కూడా ప్రకటించారు. వైట్‌హౌస్‌లో అధ్యక్షుడు ట్రంప్‌తో కలిసి పనిచేయడం తన జీవితంలో గొప్ప గౌరవమని తెలిపారు. అమెరికా సరిహద్దుల భద్రతను బలోపేతం చేయడం, పన్నులు తగ్గించడం, ఆర్థిక వ్యవస్థను పటిష్టం చేయడం వంటి వాటిలో భాగం కావడం గర్వంగా ఉందన్నారు.

మంత్రివర్గంలోనూ మార్పులు?

మధ్యంతర ఎన్నికల్లో ఎదురైన పరాజయం తర్వాత ట్రంప్‌ తన మంత్రివర్గంలోనూ భారీ మార్పులకు సిద్ధమవుతున్నట్లు వార్తలు వస్తున్నాయి. రక్షణ మంత్రి పీట్‌ హెగ్‌సెత్‌ను పదవి నుంచి తొలగించే అవకాశం ఉందని కొన్ని కథనాలు పేర్కొంటున్నాయి. విదేశాంగ మంత్రి మార్కో రూబియో 2028 అధ్యక్ష ఎన్నికల్లో పోటీకి సిద్ధమయ్యేందుకు తన పదవికి దూరం కావచ్చన్న ప్రచారం జరుగుతోంది. ఈ నేపథ్యంలో చీఫ్‌ ఆఫ్‌ స్టాఫ్‌ మార్పు ప్రాధాన్యం సంతరించుకుంది.

ఎవరీ స్టీఫెన్‌ మిల్లర్‌?

ట్రంప్‌కు స్టీఫెన్‌ మిల్లర్‌ అత్యంత సన్నిహితుడు. దీర్ఘకాలంగా ఆయనతో కలిసి పనిచేస్తున్న కీలక సహాయకుల్లో ఒకరు. ప్రస్తుతం హోంల్యాండ్‌ సెక్యూరిటీ సలహాదారుగా, డిప్యూటీ చీఫ్‌ ఆఫ్‌ స్టాఫ్‌గా ఉన్నారు. 2016 అధ్యక్ష ఎన్నికల ప్రచార సమయంలో ట్రంప్‌ బృందంలో స్పీచ్ రైటర్‌గా చేరారు. ట్రంప్‌ వలస విధానాల రూపకల్పనలో కీలక పాత్ర పోషిస్తున్నారు. జనవరిలో ఇమిగ్రేషన్ ఏజెంట్లు జరిపిన కాల్పుల్లో ఇద్దరు నిరసనకారులు చనిపోయిన తర్వాత ఆయనపై తీవ్ర విమర్శలు వచ్చాయి. కాగా.. మిల్లర్‌ నియామకంపై అమెరికా ఉపాధ్యక్షుడు జేడీ వాన్స్‌ ఎక్స్‌లో అభినందనలు తెలిపారు.

ఇవి కూాడా చదవండి...

శాటిలైట్లకు చిక్కకుండా పంట వ్యర్థాల దహనం.. ‘ఫైర్ వాచ్‌’తో సమస్యకు చెక్

ఓబీసీ క్రీమీలేయర్‌పై సుప్రీంకోర్టు కీలక స్పష్టత.