షార్ప్‌ బ్రెయిన్‌ కావాలా?.. రోజువారీ ఆహారంలో ఇవి ఉండేలా చూసుకోండి..

ఇంటర్నెట్ డెస్క్: మెదడు ఆరోగ్యం అంటే జ్ఞాపకశక్తి మాత్రమే కాదు. ఏకాగ్రత, నేర్చుకునే సామర్థ్యం, నిర్ణయాలు తీసుకోవడం, నాడీకణాల పనితీరు.. ఇవన్నీ దాని ఆరోగ్యంతో ముడిపడి ఉంటాయి. వయసు పెరిగేకొలదీ మెదడు పనితీరులో సహజమైన మార్పులు రావచ్చు. అయితే జీవనశైలి, శారీరక చురుకుదనం, నిద్రతో పాటు తీసుకునే ఆహారం కూడా మెదడు ఆరోగ్యంపై ప్రభావం చూపుతుందని పరిశోధనలు సూచిస్తున్నాయి. రోజువారీ ఆహారంలో కొన్ని పోషకాలు సమృద్ధిగా ఉండే పదార్థాలను చేర్చుకోవడం ద్వారా మెదడు ఆరోగ్యాన్ని కాపాడుకోవచ్చని వైద్య నిపుణులు చెబుతున్నారు.

గ్యాస్ట్రో ఎంట్రాలజిస్టులు ఇటీవల సూచించిన 5 ఆహార పదార్థాలు సోషల్ మీడియాలో చర్చకు వచ్చాయి. వీటిలో ఒమెగా-3 ఫ్యాటీ యాసిడ్స్, కోలిన్, మెగ్నీషియం, జింక్, కాపర్, పాలీఫినాల్స్ వంటి పోషకాలు, మొక్కల సమ్మేళనాలు ఉంటాయి.

1. వాల్‌నట్స్‌.. మెదడుకు మేలు

వాల్‌నట్స్‌(ఆక్రోట్లు)లో ఒమెగా-3 ఫ్యాటీ యాసిడ్స్, యాంటీఆక్సిడెంట్లు ఉంటాయి. ఇవి కణాలను ఆక్సిడేటివ్‌ ఒత్తిడి నుంచి రక్షించడంలో తోడ్పడతాయి. మెదడులోని నాడీకణాల ఆరోగ్యాన్ని కాపాడటంలోనూ వీటి పాత్ర ఉండొచ్చని నిపుణులు చెబుతున్నారు.

2. గుడ్లు.. జ్ఞాపకశక్తికి కోలిన్‌

గుడ్లు మంచి ప్రొటీన్‌ వనరే కాకుండా కోలిన్‌ను కూడా అందిస్తాయి. మెదడులో జ్ఞాపకశక్తి, నేర్చుకోవడం వంటి ప్రక్రియల్లో పాల్గొనే ఎసిటైల్‌కోలిన్‌ అనే న్యూరోట్రాన్స్‌మిటర్‌ తయారీలో కోలిన్‌ అవసరం. అందువల్ల సమతుల్య ఆహారంలో గుడ్లకు చోటు ఇవ్వడం ఉపయోగకరం.

3. కొవ్వు చేపలు.. ఒమెగా-3తో బలం

సాల్మన్‌ వంటి కొవ్వు చేపల్లో డీహెచ్ఏ, ఈపీఏ వంటి ఒమెగా-3 కొవ్వు ఆమ్లాలు అధికంగా ఉంటాయి. ముఖ్యంగా డీహెచ్ఏ మెదడులోని కణాల పొరల్లో కీలకమైన భాగం. నాడీకణాల సాధారణ పనితీరుకు ఇది సహకరిస్తుంది.

4. గుమ్మడి గింజలు.. ఖనిజాల ఖజానా

గుమ్మడి గింజల్లో మెగ్నీషియం, జింక్, కాపర్‌ వంటి ఖనిజాలు లభిస్తాయి. నాడీ సంకేతాల ప్రసారంలో జింక్‌ పాత్ర ఉండగా, మెగ్నీషియం నాడీ వ్యవస్థ సాధారణ పనితీరుకు అవసరం. అందుకే పరిమిత మోతాదులో గుమ్మడి గింజలను ఆహారంలో చేర్చుకోవచ్చు.

5. బెర్రీలు.. యాంటీఆక్సిడెంట్లతో రక్షణ

స్ట్రాబెర్రీ, బ్లూబెర్రీ వంటి బెర్రీల్లో పాలీఫినాల్స్‌, ఆంథోసైనిన్స్‌ వంటి సమ్మేళనాలు ఉంటాయి. ఇవి శరీరంలో ఆక్సిడేటివ్‌ ఒత్తిడిని తగ్గించడంలో సహాయపడే యాంటీఆక్సిడెంట్‌ లక్షణాలను కలిగి ఉంటాయి. మెదడు ఆరోగ్యానికి కూడా ఇవి ప్రయోజనకరంగా ఉండొచ్చని నిపుణులు సూచిస్తున్నారు.

వాల్‌నట్స్‌, గుడ్లు, కొవ్వు చేపలు, గుమ్మడి గింజలు, బెర్రీలు.. ఒక్కోటి ఒక్కో రకమైన పోషకాన్ని అందిస్తాయి. అయితే ఏ ఒక్క ఆహార పదార్థమూ జ్ఞాపకశక్తిని ఒక్కసారిగా పెంచదు. మొత్తం ఆహార విధానం సమతులంగా ఉండటం, తగినంత నిద్ర, శారీరక చురుకుదనం, ఒత్తిడి నియంత్రణ కూడా మెదడు ఆరోగ్యానికి ముఖ్యమే. అందుకే రోజువారీ ఆహారంలో వైవిధ్యాన్ని పెంచుతూ, తాజా పండ్లు, కూరగాయలు, సంపూర్ణ ధాన్యాలు, ఆరోగ్యకరమైన కొవ్వులు, తగినంత ప్రొటీన్‌ ఉండేలా చూసుకోవడం మంచిది.

ఇవీ చదవండి:

వయసు పెరిగే కొద్దీ కండరాలు బలహీనపడుతున్నాయా? ఇది తెలుసుకోండి

గాయాలకు పసుపు పెడుతున్నారా? అయితే ఈ విషయాలు తప్పక తెలుసుకోండి