Goa Fire Accident: గోవా అగ్నిప్రమాదంపై పోలీస్ యాక్షన్.. యజమానులపై ఎఫ్ఐఆర్

పనజి: గోవాలోని బిర్చ్ నైట్ క్లబ్‌లో భారీ అగ్నిప్రమాదం జరిగి 25 మంది ప్రాణాలు కోల్పోవడంపై పోలీసులు తక్షణ చర్యలకు దిగారు. నైట్‌క్లబ్ యజమానులు సౌరభ్ లూత్రా, గౌరవ్ లూత్రాలపై భారతీయ న్యాయసంహితలోని వివిధ సెక్షన్ల కింద ఎఫ్ఐఆర్ నమోదు చేశారు. అర్పోరా-నాగోవా సర్పంచ్ రోషన్ రెడ్కర్‌ను నిర్బంధంలోకి తీసుకున్నారు.

క్లబ్ మేనేజర్, ఈవెంట్ ఆర్గనైజర్లపై కూడా ఎఫ్ఐఆర్‌లు నమోదు చేసినట్టు సీనియర్ పోలీసు అధికారి ఒకరు తెలిపారు. 2013లో ట్రేడ్ లైసెన్స్ మంజూరు చేసిన రోషన్ రెడ్కార్‌ను అదుపులోకి తీసుకున్నామని చెప్పారు. అపూర్వ గ్రామంలో నైట్‌క్లబ్ నిర్మాణంలో నిబంధనలు ఉల్లంఘించారని, ఇరుకైన ప్రవేశం మార్గం, తప్పించుకునే మార్గాలు లేకపోవడం, నిర్మాణంలో మండేస్వభావం కలిగిన సామగ్రిని వాడటం వంటివి ప్రమాద కారణాలుగా ప్రాథమిక విచారణలో వెల్లడికావడంతో పోలీసులు తాజా చర్యలకు దిగారు.

భద్రతా నియమాల ఉల్లంఘన జరిగినప్పటికీ క్లబ్ నిర్వహణకు అనుమతించిన అధికారులపై చర్చలు తీసుకుంటామని గోవా ముఖ్యమంత్రి ప్రమోద్ సావంత్ తెలిపారు. కాగా, అనుమతి లేకుండా నైట్‌క్లబ్ నిర్మాణం జరిగిందని, క్లబ్‌ను కూల్చేవేసేందుకు నోటీసులు జారీ చేసినప్పటికీ దానిపై హైయర్ అథారిటీ స్టే ఇచ్చిందని విలేజ్ అధికారి ఒకరు తెలిపారు. శనివారం అర్థరాత్రి ప్రమాదం జరిగినప్పుడు నైట్‌క్లబ్‌లో సుమారు 100 మంది వరకూ ఉన్నారని, సిలెండర్ పేలడం వల్ల ప్రమాదం జరిగిందని చెబుతున్నారు. మంటలు చెలరేగగానే పలువురు గ్రౌండ్ ఫ్లోర్ వైపు పరుగులు తీశారని, ప్రవేశద్వారం ఇరుకుగా ఉండటంతో పలువురు వంటగదిలోనే చిక్కుకుపోయారని పోలీసులు చెప్పారు. మృతుల్లో నలుగురు టూరిస్టులు, 14 మంది సిబ్బంది ఉన్నట్టు చెబుతున్నారు. తక్కిన ఏడుగురిని ఇంకా గుర్తించాల్సి ఉంది.

ఇవి కూడా చదవండి..

గోవాలో భారీ అగ్నిప్రమాదం.. 23 మంది మృతి..

గోవా నైట్ క్లబ్ ప్రమాదం.. వెలుగులోకి భయానక వీడియో..

మరిన్ని జాతీయ, అంతర్జాతీయ వార్తల కోసం క్లిక్ చేయండి