Gangula Kamalakar: మేము గేట్లు తెరిస్తే కాంగ్రెస్‌లో ఎవ్వరూ మిగలరు

కరీంనగర్: తాము గేట్లు తెరిస్తే కాంగ్రెస్‌ పార్టీలో ఎవ్వరూ మిగలరని ఎమ్మెల్యే గంగుల కమలాకర్ ( Gangula Kamalakar ) తెలిపారు. గురువారం నాడు బీఆర్ఎస్ కార్యాలయంలో ఆయన మీడియాతో మాట్లాడుతూ... బీఆర్ఎస్ ఎమ్మెల్యేలు కాంగ్రెస్ లోకి వస్తారని ఎమ్మెల్యే రాజగోపాల్‌రెడ్డి అంటున్నారని.. ముందు వాళ్ల నేతలు బీఆర్ఎస్‌లోకి రాకుండా చూసుకోవాలని హితవు పలికారు. రాజగోపాల్‌రెడ్డి మాటలను పట్టించుకోవాల్సిన అవసరం లేదని చెప్పారు. ఒక నెలలో కాంగ్రెస్ ప్రభుత్వమే ఇంత వ్యతిరేకత మూట గట్టుకున్నదని.. పాలన ఎలా చేస్తుందని ప్రశ్నించారు. తమకు కేసీఆర్ దైవ సమానులు ..ఎవ్వరూ బీఆర్ఎస్‌ను వీడరన్నారు. తమకు ప్రభుత్వాన్నికూల్చే ఉద్దేశం లేదన్నారు. బీజేపీ ఎంపీ బండి సంజయ్ మూడుసార్లు ఓడిపోయారని.. అలాంటి వ్యక్తి బీఆర్ఎస్ పార్టీని కూకటి వేళ్లతో పెకిలిస్తారా అని గంగుల కమలాకర్ ఎద్దేవా చేశారు.