Lok Sabha polls: సీట్ల పంపకంలో చిక్కులు.. కాంగ్రెస్‌కు కష్టాలు..!

2024 లోక్‌సభ ఎన్నికలకు రంగం సిద్ధమైంది. తొలిదశలో 102 స్థానాలకు నామినేషన్ల ప్రక్రియ ముగియగా.. రెండో దశ ఎన్నికలకు నామినేషన్ల స్వీకరణ ప్రక్రియ కొనసాగుతోంది. ఎన్డీయే(NDA), ఇండియా కూటమి పార్టీలు తమ అభ్యర్థుల కోసం ఎన్నికల ప్రచారాన్ని ప్రారంభించాయి. ఈ క్రమంలో ఇండియా కూటమిలో సీట్ల పంపకం పెద్ద సమస్యగా మారింది. బీహార్‌(Bihar)లో ఆర్‌జెడి-కాంగ్రెస్-వామపక్షాల మధ్య సీట్ల సర్దుబాటుపై శుక్రవారం క్లారిటీ వచ్చింది. మరోవైపు మహారాష్ట్రలో మాత్రం ఇండియా కూటమిలోని భాగస్వామ్య పార్టీల మధ్య సీట్ల పంపకం విషయంలో సందిగ్ధత కొనసాగుతోంది. మరోవైపు పొత్తులతో కాంగ్రెస్ తక్కువ సీట్లలో పోటీచేయాల్సిన పరిస్థితి ఏర్పడింది. భాగస్వామ్య పక్షాలకు సీట్లు ఇవ్వాల్సి రావడంతో సీనియర్లకు కాంగ్రెస్ టికెట్లు ఇవ్వలేకపోయింది. ఎన్డీయే కూటమిని ఓడించే లక్ష్యంతో సీట్లను త్యాగం చేస్తున్న కాంగ్రెస్ పరిస్థితి ఎన్నికల తర్వాత ఎలా ఉండబోతుందనే చర్చ సాగుతోంది.

Lok Sabha 2024: తమిళనాట పొత్తుల్లో కమలం దూకుడు

ఘనంగా ప్రారంభమై..

కేంద్రంలో వరుసగా మూడోసారి బీజేపీ అధికారంలోకి రాకుండా నిలువరించేందుకు, 28 ప్రతిపక్ష పార్టీలు కలిసి పది నెలల క్రితం పాట్నాలో భారత కూటమికి పునాది వేశాయి. తొలుత కూటమిలో పార్టీలు ఉత్సాహంగా కనిపించాయి. ఎన్నికల సమయం దగ్గరపడుతున్న కొద్దీ కూటమిలో పార్టీలు బయటకు రావడం ప్రారంభించాయి. కొన్ని పార్టీలు కూటమిలో ఉన్నప్పటికీ ఎన్నికల్లో ఒంటరిగా పోటీ చేసేందుకు సిద్ధమయ్యాయి. ఎన్నికల తర్వాత పొత్తుల గురించి ఆలోచిద్దామనే భావనలో తృణమూల్ వంటి పార్టీ ఉంది. ఇండియా కూటమిలో బలమైన పార్టీగా ఉన్న జేడీయూ నేత నితీష్ కుమార్ ఇండియా కూటమితో బంధాన్ని తెంచుకుని ఎన్‌డిఎలో చేరిపోయారు. ఓ రకంగా కాంగ్రెస్‌కు ఇది పెద్ద షాక్‌గా మారింది. సీట్ల పంపకాల ప్రక్రియ ప్రారంభమైన వెంటనే ఇండియా కూటమిలో మిత్రపక్షాలు ఒకదాని తర్వాత ఒకటి విడిచిపెట్టి వెళ్లడం ప్రారంభించాయి.

ఇండియాను వదిలి..

జయంత్ చౌదరి నేతృత్వంలోని RLD భారతదేశ కూడా ఇండియా కూటమి నుండి విడిపోయి BJP నేతృత్వంలోని NDA శిబిరంలో చేరింది. జేడీయూ-ఆర్‌ఎల్‌డీ అకస్మాత్తుగా ఎన్డీయేలో చేరడం ప్రతిపక్ష కూటమికి పెద్ద దెబ్బగా రాజకీయ విశ్లేషకులు చెబుతున్నారు.. జమ్మూ కాశ్మీర్‌లో మెహబూబా ముఫ్తీ పార్టీ పీడీపీ ఒంటరిగా ఎన్నికల్లో పోటీ చేస్తుండగా, బెంగాల్‌లో టీఎంసీ అధినేత్రి మమతా బెనర్జీ కూడా ఒంటరిగా వెళ్తున్నారు. సీట్ల పంపకం విషయంలో ఉత్తరప్రదేశ్‌లో ఎస్పీ, బీహార్‌లో ఆర్జేడీ పెట్టిన షరతులకు కాంగ్రెస్ అంగీకరించాల్సి వచ్చింది. 80 సీట్లు ఉన్న యూపీలో కాంగ్రెస్ 17 సీట్లలోనే పోటీ చేయాల్సిన పరిస్థితి ఏర్పడింది. ఎస్పీని వీడి కాంగ్రెస్‌లో చేరిన రవి వర్మ కుమార్తె పూర్వి వర్మకు లఖింపూర్ ఖేరీ సీటును కేటాయించలేకపోయింది కాంగ్రెస్.

ఆప్‌తో..

ఇండియా కూటమిలో ఎన్నో చర్చల తర్వాత ఆప్‌తో సీట్ల సర్దుబాటు జరిగింది. అయితే ఢిల్లీ-గుజరాత్-హర్యానాలో మాత్రమే కాంగ్రెస్‌, ఆప్ మధ్య ఒప్పందం కుదిరింది, పంజాబ్‌లో ఈ రెండు పార్టీలు ఒకరిపై మరొకరు పోటీ చేస్తున్నారు. ఈ క్రమంలో ఇండియా కూటమిలో కాంగ్రెస్ పరిస్థితి దయనీయంగా తయారైందనే చర్చ నడుస్తోంది. ఈ పరిణామాల నేపథ్యంలో లోక్‌సభ ఎన్నికల తర్వాత కాంగ్రెస్ పరిస్థితి ఎలా ఉండబోతుందో చూడాలి మరి.

మరిన్ని జాతీయ వార్తల కోసం ఇక్కడ క్లిక్ చేయండి..

Lok Sabha polls: 102 స్థానాల్లో ప్రచార వేగం పెంచిన పార్టీలు..!