బుమ్రా బౌలింగ్‌ను ఎదుర్కోవడమే మాకు అసలైన పరీక్ష: కివీస్ స్టార్ ప్లేయర్

ఇంటర్నెట్ డెస్క్: ప్రస్తుతం భారత జట్టు న్యూజిలాండ్ పర్యటనలో ఉంది. ఇప్పటికే టీ20 సిరీస్ ఆడేసిన టీమిండియా.. వన్డే సిరీస్‌లో ఆఖరి మ్యాచ్‌కు సిద్ధమవుతోంది. అది పూర్తవగానే నవంబర్ 19 నుంచి కివీస్‌తో రెండు టెస్టుల సిరీస్ ఆడనుంది. డబ్ల్యూటీసీ ఫైనల్ రేసుకు కీలకంగా భావిస్తోన్న ఈ సిరీస్‌కు టీమిండియా స్టార్ పేసర్ జస్ప్రీత్ బుమ్రా రీఎంట్రీ ఇవ్వనున్నాడు. ఈ క్రమంలో న్యూజిలాండ్ బ్యాటర్ విల్ యంగ్ ఆసక్తికర వ్యాఖ్యలు చేశాడు. భారత్‌తో జరగనున్న రెండు టెస్టుల సిరీస్‌లో బుమ్రా బౌలింగ్‌ను ఎదుర్కోవడం తమకు పెద్ద సవాలేనని తెలిపాడు. ప్రపంచంలోనే అత్యుత్తమ బౌలర్లలో బుమ్రా ఒకడని ప్రశంసించాడు. 2024లో భారత గడ్డపై న్యూజిలాండ్ 3-0తో చారిత్రాత్మక టెస్టు సిరీస్ విజయం సాధించిన తర్వాత ఈ రెండు జట్లు తలపడనున్నాయి.

‘రెండేళ్ల క్రితం భారత్‌లో జరిగిన టెస్టు సిరీస్ ఇప్పుడు గతం. ప్రస్తుతం మా ముందు సరికొత్త సవాలు ఉంది. భారత్‌తో స్వదేశంలో రెండు కీలక టెస్టులు ఆడబోతున్నాం. వెల్లింగ్టన్, క్రైస్ట్‌చర్చ్ వంటి ప్రతిష్ఠాత్మక మైదానాల్లో ఈ మ్యాచ్‌లు జరగనున్నాయి. బుమ్రా తిరిగి భారత జట్టులోకి రావడం మాకు పరీక్ష లాంటిదే. అతడు ప్రపంచంలోనే అత్యుత్తమ బౌలర్లలో ఒకడు. అతడిని ఎదుర్కోవడానికి మేం మా ప్రణాళికలతో సిద్ధంగా ఉండాలి. అయితే మా జట్టులోనూ అద్భుతమైన బౌలర్లు ఉన్నారు. భారత బ్యాటర్లు కూడా మా బౌలింగ్‌ను ఎలా ఎదుర్కోవాలో ఆలోచించుకోవాల్సిందే. మొత్తానికి ఈ రెండు టెస్టుల సిరీస్ ఆసక్తికరంగా సాగడం ఖాయం.

2024లో భారత్‌లో సాధించిన 3-0 టెస్టు సిరీస్ విజయం మా జట్టుకు ఎంతో ఆత్మవిశ్వాసాన్ని ఇచ్చింది. భారత్ పర్యటనకు ముందు శ్రీలంకతో 0-2తో ఓడిపోయాం. అయినప్పటికీ మా ప్రణాళికలను మరింత పటిష్టం చేసుకున్నాం. ప్రతి బౌలర్‌ను ఎలా ఎదుర్కోవాలో వ్యూహాలు సిద్ధం చేసుకున్నాం. మా ఆటపై నమ్మకం ఉంచి దూకుడుగా ఆడాం. ప్రపంచస్థాయి బౌలర్లను ఎదుర్కోవడం ఎప్పుడూ సవాలే. అయితే ఈసారి పరిస్థితులు పూర్తిగా భిన్నంగా ఉంటాయి. భారత్‌లో కాకుండా న్యూజిలాండ్‌లో ఆడుతున్నాం. ఇక్కడి వాతావరణం, పిచ్‌లు వేరుగా ఉంటాయి. బ్యాటర్లు పరిస్థితులకు అనుగుణంగా తమ ఆటను మార్చుకోవడం చాలా ముఖ్యం’ అని విల్ యంగ్ వివరించాడు.

ఇవి కూడా చదవండి:

శాండ్‌పేపర్ వివాదం.. ప్యాట్ కమిన్స్ వ్యాఖ్యలను ఖండించిన వసీం అక్రమ్!

సయ్యద్ ముస్తాక్ అలీ ట్రోఫీ: వైభవ్ సూర్యవంశీ టీమ్ ఓటమి