Ryan Rickelton: చరిత్ర సృష్టించిన ర్యాన్ రికెల్టన్.. తొలి ప్లేయర్‌గా రికార్డ్..

స్పోర్ట్స్ డెస్క్: దక్షిణాఫ్రికా స్టార్ ప్లేయర్ ర్యాన్ రికెల్టన్(Ryan Rickelton) చరిత్ర సృష్టించాడు. సౌతాఫ్రికా టీ20 లీగ్‌లో అరుదైన ఘనత సాధించాడు. ఎంఐ కేప్‌టౌన్‌కు ప్రాతినిధ్యం వహిస్తున్న రికెల్టన్ లీగ్ చరిత్రలో రెండు వ్యక్తిగత సెంచరీలు చేసిన తొలి ప్లేయర్ గా రికార్డు నెలకొల్పాడు. ఈ లీగ్‌లో రికెల్టన్ కాకుండా డుప్లెసిస్‌, క్లాసెన్‌, మార్క్రమ్‌, డస్సెన్‌, హెర్మన్‌, విల్‌ జాక్స్‌, వెర్రిన్‌, హోప్‌ మాత్రమే తలో సెంచరీ చేశారు. రికెల్టన్‌ తన తొలి సెంచరీని డర్బన్‌ సూపర్‌ జెయింట్స్‌పై చేయగా.. రెండో సెంచరీని జోబర్గ్‌ సూపర్‌ కింగ్స్‌తో జరిగిన మ్యాచ్‌లో నమోదు చేశాడు.

మ్యాచ్‌ విషయానికొస్తే.. జోబర్గ్ సూపర్ కింగ్స్, ఎంఐ కేప్‌టౌన్‌(MI Cape Town) మధ్య మ్యాచ్ జరిగింది. టాస్ గెలిచిన ఎంఐ కేప్‌టౌన్‌ బ్యాటింగ్ ఎంచుకుంది. ఈ క్రమంలో రికెల్టన్‌ విధ్వంసకర శతకంతో (60 బంతుల్లో 113 నాటౌట్‌; 8 ఫోర్లు, 9 సిక్సర్లు) విరుచుకుపడటంతో ఆ జట్టు భారీ స్కోర్ సాధించింది. ఎంఐ కేప్‌టౌన్‌ నిర్ణీత 20 ఓవర్లలో 3 వికెట్ల కోల్పోయి 234 పరుగులు చేసింది. రికెల్టన్‌తో పాటు మరో ఓపెనర్‌ డస్సెన్‌ (65) కూడా రాణించాడు. మిగతా బ్యాటర్లలో పూరన్‌ 14, జేసన్‌ స్మిత్‌ 2, కరీం జనత్‌ 20* పరుగులు చేశారు. సూపర్‌ కింగ్స్‌ బౌలర్లలో డేనియల్‌ వార్రల్‌ 2, ఫెరియెరి ఓ వికెట్‌ తీశారు.

అనంతరం బ్యాటింగ్‭కు దిగిన జోబర్గ్ సూపర్ కింగ్స్(Joburg Super Kings) నిర్ణీత ఓవర్లలో ఆ జట్టు 5 వికెట్ల కోల్పోయి 198 పరుగులు చేయగలిగింది. దీంతో 36 పరుగుల తేడాతో ఎంఐ కేప్‌టౌన్‌ ఘన విజయం సాధించింది. సూపర్‌ కింగ్స్‌​ తరఫున డియాన్‌ ఫెరియెరా (80 నాటౌట్‌) అద్భుతమైన పోరాటపటిమ కనబర్చినా ఫలితం లేకుండా పోయింది. అలానే ఓపెనర్‌ జేమ్స్‌ విన్స్‌ (77) కూడా మెరుపు అర్ద సెంచరీతో రాణించాడు. ఎంఐ కేప్‌టౌన్‌ బౌలర్ల దూకుడు ముందు వీరి మెరుపులు సరిపోలేదు. ఎంఐ కేప్‌టౌన్‌ బౌలర్లో జార్జ్‌ లిండే, రబాడ తలో 2, కార్బిన్‌ బాష్‌ ఓ వికెట్‌ తీయగా.. రషీద్‌ ఖాన్‌ పొదుపుగా బౌలింగ్‌ చేసి సూపర్‌ కింగ్స్‌ను కట్టడి చేశారు.

ఇవి కూడా చదవండి:

జట్టు నుంచి తప్పిస్తారనుకోలేదు.. అక్షర్ పటేల్ ఆవేదన

కోహ్లీకి ఆటోగ్రాఫ్ ఇచ్చిన కోహ్లీ.. ఎలాగంటే?