పాక్‌కు దిమ్మతిరిగే షాకిచ్చిన 18 ఏళ్ల కుర్రాడు.. ఎవరీ మోహిత్ ఉల్వా!
ABN , Publish Date - Nov 14 , 2026 | 08:09 PM
భారత్, పాకిస్థాన్ మధ్య క్రికెట్ మ్యాచ్ అంటేనే అభిమానుల్లో ఆసక్తి ఓ రేంజ్‌లో ఉంటుంది. అందులోనూ ఫైనల్ మ్యాచ్ అయితే ఉత్కంఠ ఏ స్థాయిలో ఉంటుందో ప్రత్యేకంగా చెప్పనక్కర్లేదు. అలాంటి హైఓల్టేజ్ పోరులో టీమిండియా యువ ఆటగాడు మోహిత్ ఉల్వా సంచలనం సృష్టించాడు.
ఇంటర్నెట్ డెస్క్: భారత్, పాకిస్థాన్ మధ్య క్రికెట్ మ్యాచ్ అంటేనే అభిమానుల్లో ఆసక్తి ఓ రేంజ్‌లో ఉంటుంది. అందులోనూ ఫైనల్ మ్యాచ్ అయితే ఉత్కంఠ ఏ స్థాయిలో ఉంటుందో ప్రత్యేకంగా చెప్పనక్కర్లేదు. అలాంటి హైఓల్టేజ్ పోరులో టీమిండియా యువ ఆటగాడు మోహిత్ ఉల్వా సంచలనం సృష్టించాడు. ఓటమి అంచున ఉన్న భారత జట్టును ఒంటిచేత్తో విజయతీరాలకు చేర్చాడు. అండర్-19 ఆసియా కప్ ఫైనల్‌లో పదో స్థానంలో బ్యాటింగ్‌కు వచ్చి కేవలం 26 బంతుల్లో అజేయంగా 49 పరుగులు చేసి ‘ప్లేయర్ ఆఫ్ ది మ్యాచ్’గా నిలిచాడు. చివరి బంతికి బౌండరీ బాది భారత్‌కు ఒక్క వికెట్ తేడాతో అద్భుత విజయాన్ని అందించాడు. దీంతో టీమిండియా ఆసియా కప్ టైటిల్‌ను కైవసం చేసుకుంది.
338 పరుగుల భారీ లక్ష్యంతో బరిలోకి దిగిన భారత్ ఒక దశలో 252 పరుగులకే ఎనిమిది వికెట్లు కోల్పోయింది. అప్పటికి విజయానికి 86 పరుగులు అవసరం కాగా.. చేతిలో ఉన్నవి కేవలం రెండు వికెట్లే. ఇలాంటి క్లిష్ట పరిస్థితుల్లో క్రీజులోకి వచ్చిన మోహిత్ ఉల్వా మ్యాచ్ గతినే మార్చేశాడు. మనల్ చౌహాన్‌తో కలిసి తొమ్మిదో వికెట్‌కు 57 పరుగుల కీలక భాగస్వామ్యం నెలకొల్పాడు. చివరి ఓవర్ వేసిన అహ్మద్ హుస్సేన్ తొలి బంతికి గూగ్లీ సంధించగా.. మోహిత్ బీట్ అయ్యాడు. స్టంపౌట్ అయ్యే ప్రమాదం నుంచి త్రుటిలో తప్పించుకున్నాడు. చివరి బంతికి భారత్ విజయానికి మూడు పరుగులు అవసరమయ్యాయి. ఈసారి మాత్రం మోహిత్ ఏమాత్రం తడబడలేదు. క్రీజు నుంచి ముందుకొచ్చి అహ్మద్ హుస్సేన్ బంతిని వైడ్ లాంగ్ ఆఫ్ దిశగా బలంగా బాదాడు. బంతి ఒక్కసారి బౌన్స్ అయి బౌండరీ దాటడంతో భారత్ సంచలన విజయాన్ని అందుకుంది. దీంతో భారత ఆటగాళ్ల ఆనందానికి అవధులు లేకుండా పోయాయి. మైదానంలోకి పరుగెత్తుకొచ్చిన సహచర ఆటగాళ్లు మోహిత్‌ను చుట్టుముట్టి సంబరాలు చేసుకున్నారు.
ఎవరీ మోహిత్ ఉల్వా?
మోహిత్ ఉల్వా గుజరాత్‌లోని జామ్‌నగర్‌కు చెందిన 18 ఏళ్ల యువ క్రికెటర్. క్రికెట్ బంగ్లా అకాడమీలో మహేంద్రసిన్హ్ చౌహాన్ వద్ద శిక్షణ పొందాడు. ఈ అకాడమీకి భారత స్టార్ ఆల్‌రౌండర్ రవీంద్ర జడేజాతోనూ అనుబంధం ఉంది. జడేజా క్రికెట్ ప్రారంభ దశలో ప్రతిభను గుర్తించి తీర్చిదిద్దిన కోచ్ కూడా మహేంద్రసిన్హ్ చౌహానే. మోహిత్ ఇప్పటికే భారత అండర్-19 జట్టులో చోటు సంపాదించాడు. 2026లో ఆస్ట్రేలియా అండర్-19 జట్టుతో జరిగిన యూత్ టెస్టులో అరంగేట్రం చేసిన అతడు.. తొలి అవకాశాల్లోనే 92 పరుగులతో ఆకట్టుకున్నాడు. శ్రీలంకతో జరిగిన అండర్-19 పరిమిత ఓవర్ల సిరీస్‌లోనూ ఆడాడు. అయితే పాకిస్థాన్‌తో జరిగిన ఆసియా కప్ ఫైనల్ అతడి కెరీర్‌లో ప్రత్యేకమైన మలుపుగా నిలిచింది. టాప్ ఆర్డర్ బ్యాటర్లపై అంచనాలు ఉన్న సమయంలో.. చివరి వరుసలో వచ్చి మ్యాచ్‌ను గెలిపించడం విశేషం.
ఇవి కూడా చదవండి:
అండర్ 19 ఆసియా కప్ మనదే.. ఉత్కంఠ పోరులో పాకిస్థాన్‌పై భారత్ విజయం
బుమ్రా బౌలింగ్‌ను ఎదుర్కోవడమే మాకు అసలైన పరీక్ష: కివీస్ స్టార్ ప్లేయర్
