Mary Kom: మేరీ కోమ్‌కు వివాహేతర సంబంధం ఉంది.. మాజీ భర్త కరుంగ్ సంచలన ఆరోపణ

ఇంటర్నెట్ డెస్క్: భారత బాక్సింగ్ లెజెండ్ మేరీ కోమ్.. పెళ్లైన 20 ఏళ్ల తర్వాత తన భర్త కరుంగ్ ఆంఖోలర్ నుంచి విడాకులు తీసుకున్న విషయం తెలిసిందే. ఇటీవల ఈ విడాకుల గురించి మేరీ కోమ్(Mary Kom) పలు సంచలన విషయాలు బయట పెట్టారు. ఆమె భర్త తనను ఆర్థికంగా దారుణంగా మోసం చేశారని.. తన కష్టార్జితంతో కొన్న ఆస్తులను తనకే తెలియకుండా అతడి పేరు మీదకు మార్చుకున్నారని ఆరోపించారు. ఆస్తులను తనఖా పెట్టి ఆంఖోలర్ భారీగా అప్పులు చేశారని, దీనివల్ల తాను తీవ్రమైన ఆర్థిక ఇబ్బందుల్లో కూరుకుపోయానని ఆవేదన వ్యక్తం చేశారు. ఈ క్రమంలో మేరీ మాజీ భర్త(Karung Ankholer ) ఈ ఆరోపణలపై ఘాటుగా స్పందించారు.

‘నేను రూ.5కోట్లు దోచుకున్నానని ఆరోపణలు చేస్తోంది. నా బ్యాంక్ ఖాతాలు చెక్ చేయండి. ఢిల్లీలో అద్దె ఇంట్లో ఉంటున్న వ్యక్తిని చూసి కూడా ఇలా అంటారా? ఆమె సెలబ్రిటీ. ఆమె మాటలు కొందరు నమ్ముతారు, కొందరు నమ్మరు. మేరీ కోమ్ చేసిన ఆరోపణల్లో వాస్తవాలే లేవు. మాకు సంప్రదాయబద్ధంగా విడాకులు అయ్యాయి. ఇంకా కోర్టుకు వెళ్లలేదు. పిల్లలను ప్రేమిస్తున్నాను కాబట్టే న్యాయపోరాటానికి దూరంగా ఉన్నాను. జాతీయ మీడియా ముందు నాపై నిందలు వేయడం ఎందుకు?’ అని ఆ వ్యాఖ్యలను కరుంగ్ ఖండించారు.

వివాహేతర సంబంధం ఉంది..

‘మా దాంపత్య జీవితంలో సమస్యలు ఇప్పుడే మొదలుకాలేదు. 2013లో ఒక జూనియర్ బాక్సర్‌తో ఆమెకు వివాహేతర సంబంధం ఏర్పడింది. ఆ సమయంలో మా ఇరు కుటుంబాల మధ్య గొడవలు జరిగాయి. చివరకు రాజీ కుదిరింది. కానీ 2017 నుంచి మేరీ కోమ్ బాక్సింగ్ అకాడమీలో పనిచేసే మరో వ్యక్తితో ఆమె సంబంధం కొనసాగుతోంది. వాట్సాప్ మెసేజ్‌లతో సహా నా వద్ద ఆధారాలున్నాయి. అయినా నేను మౌనంగా ఉన్నాను. ఆమె ఒంటరిగా ఉండాలనుకున్నా.. మరో పెళ్లి చేసుకున్నా నాకు సమస్య లేదు. కానీ నన్ను దోషిగా చిత్రీకరించవద్దు. ఆరోపణలు చేస్తే ఆధారాలు చూపాలి’ అని ఆయన తేల్చి చెప్పారు.

ఇవి కూడా చదవండి:

ధనశ్రీతో రియాలిటీ షో.. ఆ వార్తలను ఖండించిన చాహల్

రో-కో నన్ను ‘చోటా చీకూ’ అని పిలిచారు: విరాట్ పోలికలతో ఉన్న బాలుడు