టీమిండియాలోకి వైభవ్ సూర్యవంశీ.. బీసీసీఐ రియాక్షన్ ఇదే!

ఇంటర్నెట్ డెస్క్: వైభవ్ సూర్యవంశీ.. ఐపీఎల్ 2026లో తన విధ్వంసకర బ్యాటింగ్‌తో ప్రపంచ దృష్టిని ఆకర్షించాడు. రాజస్థాన్ రాయల్స్ తరఫున ప్రాతినిధ్యం వహిస్తున్న వైభవ్.. ఈ సీజన్‌లో 776 పరుగులు చేసి ఆరెంజ్ క్యాప్ సొంతం చేసుకున్నాడు. వైభవ్ సూర్యవంశీని వెంటనే టీమిండియాలోకి తీసుకోవాలంటూ గత కొద్దిరోజులుగా డిమాండ్లు వినిపిస్తోన్న సంగతి తెలిసిందే. ఈ నేపథ్యంలో 15 ఏళ్ల కుర్రాడి ఎంపికపై బీసీసీఐ కార్యదర్శి దేవజిత్ సైకియా చేసిన వ్యాఖ్యలు ఇప్పుడు చర్చకు దారితీశాయి. త్వరలోనే వైభవ్‌ను భారత జట్టులోకి తీసుకోనున్నారంటూ వార్తలు వస్తున్నాయి.

‘భారత క్రికెట్‌కు వైభవ్ కొత్త వండర్ కిడ్. భవిష్యత్తులో అతడు ప్రపంచ క్రికెట్‌ను శాసిస్తాడు. ఐపీఎల్ మ్యాచ్‌లను బీసీసీఐ సెలక్టర్లు పరిశీలిస్తున్నారు. చాలా సందర్భాల్లో వారు ప్రత్యక్షంగా స్టేడియానికి వెళ్లి ప్లేయర్ల ప్రతిభను గమనిస్తున్నారు. త్వరలో జరిగే భారత జట్టు ఎంపిక సమావేశాల్లో వైభవ్ ప్రదర్శనను తప్పకుండా పరిగణనలోకి తీసుకుంటారు. అతడి భవిష్యత్తుకు ఏది మంచిదో దాని బట్టే బీసీసీఐ సెలక్టర్లు నిర్ణయం తీసుకుంటారు. ఈ ఐపీఎల్ సీజన్‌లో చాలామంది యువ ప్లేయర్లు అద్భుతంగా రాణించారు. కానీ వైభవ్ సూర్యవంశీ ప్రతిభ అసాధారణం. భారత క్రికెట్‌కు ఇలాంటి ప్లేయర్ దొరకడం సంతోషంగా ఉంది. వైభవ్ త్వరలోనే మరింత ఉన్నత స్థాయికి చేరుకుంటాడు’ అని దేవజిత్ సైకియా ప్రశంసించారు.

ప్లేయర్ల ఫిట్‌నెస్‌పై బీసీసీఐ దృష్టి

ప్లేయర్ల వర్క్‌లోడ్‌పై కూడా దేవజిత్ స్పందించారు. ‘భారత జట్టుకు ఎంపికయ్యే అవకాశమున్న ఆటగాళ్ల ఫిట్‌నెస్‌ను బీసీసీఐ సాంకేతిక బృందం నిరంతరం పర్యవేక్షిస్తోంది. ఐపీఎల్ రెండు నెలలపాటు ఫ్రాంచైజీల నియంత్రణలో జరుగుతుంది. ఈ సమయంలో ప్రతి చిన్న విషయాన్ని మేము నియంత్రించలేం. అయితే ఆటగాళ్లకు ముందుగానే ఫిట్‌నెస్ ప్రణాళికలు, మార్గదర్శకాలు అందజేస్తాం. దేశానికి ఆడే అవకాశం ఉన్న ఆటగాళ్లకు చేయాల్సినవి, చేయకూడనివి అన్నీ స్పష్టంగా తెలుసు. వారు వాటిని పాటిస్తున్నారనే నమ్మకం మాకు ఉంది’ అని సైకియా వివరించారు. కాగా వైభవ్ సూర్యవంశీపై బీసీసీఐ నుంచి వచ్చిన ఈ ప్రశంసలు, సంకేతాలు చూస్తుంటే.. టీమిండియా అరంగేట్రం వైభవ్‌కు ఎంతో దూరంలో లేదనే అభిప్రాయం క్రికెట్ వర్గాల్లో వ్యక్తమవుతోంది. జాతీయ జట్టులోకి తీసుకురావాలా? వద్దా? అన్న నిర్ణయం ప్రధాన ఎంపిక కమిటీ ఛైర్మన్ అజిత్ అగార్కర్ నేతృత్వంలోని సెలక్షన్ ప్యానెల్ చేతుల్లో ఉంది.

ఇవి కూడా చదవండి:

కోల్‌కతాలో మెస్సి విగ్రహం తొలగింపు.. ఎందుకంటే?

ఆర్సీబీ హిట్టర్ టిమ్ డేవిడ్‌పై సస్పెన్షన్ వేటు