రైలు ప్రయాణమంటే ఇంత సాహసం చేయాలా?.. వీడియో వైరల్

ఇంటర్నెట్ డెస్క్: జనాభాకు సరిపడా రవాణా సౌకర్యాలు పెరగడం లేదు. దీంతో బస్సు, రైళ్లలో ఇరుక్కుని, కొన్నిసార్లు వాటిపైకి ఎక్కి మరీ ప్రయాణం చేయాల్సిన పరిస్థితి ఏర్పడుతోంది. ప్రపంచవ్యాప్తంగా దాదాపుగా అన్ని దేశాల్లో ఇదే పరిస్థితి. తాజాగా ఇలాంటి పరిస్థితికి అద్దం పట్టేలా ఉన్న ఓ వీడియో నెట్టింట వైరల్ అవుతోంది. రైల్వే స్టేషన్‌లో రైలు ఆగి ఉంది. సాధారణంగా రైళ్లలో సీట్లలో కూర్చునో.. లేక నిల్చునో ప్రయాణం చేస్తుంటారు. కానీ ఇక్కడ ఏకంగా బోగీపైనే ప్రయాణం చేస్తున్నారు. రైలు బోగీపై వరుసగా కూర్చున్న ప్రయాణికులు.. స్టేషన్ రాగానే ఒక్కొక్కరుగా పైనుంచి కిందకు దిగుతున్నారు. అది కూడా ఎంతో ప్రమాదకరంగా పైనుంచి బ్యాగులను కిందికి విసరడం, కొందరు పైపులు పట్టుకుని కిందకు దిగడం.. ఇలా స్టంట్స్ చేస్తున్నారు. ఈ క్రమంలో ఏమాత్రం అదుపు తప్పినా ప్రమాదం జరిగే అవకాశం ఉంటుంది. ప్రయాణికుల్లో మగవారితో పాటూ మహిళలు, పిల్లలు కూడా ఉన్నారు.

ఇక చిన్న పిల్లలను అయితే.. పైనుంచి కింద ఉన్న వారికి అందిస్తున్నారు. ఈ క్రమంలో ఏమాత్రం జారిపోయినా నేరుగా కిందపడిపోయే ప్రమాదం ఉంటుంది. అయినా వారిలో ఏమాత్రం భయం కనిపించడం లేదు. ఈ ఘటన భారత్ పొరుగునున్న బంగ్లాదేశ్‌లో జరిగినట్లుగా తెలుస్తోంది. ఈ వీడియోను ఘర్ కి కలాష్‌ ఎక్స్ పేజీలో షేర్ చేశారు. ఇప్పటికే ఈ వీడియోను లక్షలాది మంది వీక్షించారు.

ఈ వీడియోపై నెటిజన్లు తమదైన శైలిలో కామెంట్లు చేస్తున్నారు. చాలా మంది రైల్వే పరిపాలన ఘోర వైఫల్యానికి నిదర్శనమని అభివర్ణిస్తున్నారు. ఇది రైలు ప్రయాణమా? లేక పోల్ డ్యాన్సింగ్ పోటీనా? ప్రజలు తమ ప్రాణాలను పణంగా పెడుతున్నారని విమర్శిస్తున్నారు. ఏ మాత్రం పోల్ పైనుంచి ఒక్కరు జారిపడినా.. పెద్ద ప్రమాదం జరగవచ్చని నెటిజన్లు చెబుతున్నారు. ప్రయాణికులకు అనుగుణంగా.. జనరల్ బోగీలను పెంచాలని ప్రభుత్వాన్ని నెటిజన్లు డిమాండ్ చేస్తున్నారు.