చున్నీతో ప్రాణం కాపాడారు.. వరద ఉద్ధృతిలో చిక్కుకున్న బైకర్‌ను రక్షించిన కుటుంబం..

ఇంటర్నెట్ డెస్క్: హిమాచల్‌ప్రదేశ్‌లో కురుస్తున్న భారీ వర్షాల కారణంగా పలు ప్రాంతాలను ఆకస్మిక వరదలు ముంచెత్తాయి. చంబా జిల్లాలో భారీ వరద ఓ బైకర్ ప్రవాహంలో చిక్కుకుపోయాడు. అటుగా కారులో వెళ్తున్న ఓ కుటుంబం సాహసించి అతడిని రక్షించింది. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది (Himachal Pradesh flash flood).

చంబా జిల్లాలోని భర్మౌర్-భటియాత్ ప్రాంతంలో భారీ వర్షం కారణంగా ప్రధాన రహదారిపై ఒక్కసారిగా నీటి ప్రవాహం పెరిగింది. రహదారిపైకి భారీగా వరద నీరు రావడంతో అది చిన్న వాగులా మారిపోయింది. అదే సమయంలో ఓ బైకర్ ఆ మార్గంలో వెళ్తూ వరద ప్రవాహంలో చిక్కుకున్నాడు. నీటి వేగం అంతకంతకూ పెరగడంతో అతడు ప్రవాహం నుంచి బయటపడడం కష్టంగా మారింది (Chamba flash flood).

అదే సమయంలో అటుగా కారులో వెళ్తున్న ఓ కుటుంబం వరదలో చిక్కుకున్న బైకర్‌ను గమనించింది. వెంటనే కారును ఆపి అతడిని రక్షించేందుకు ఆ కుటుంబ సభ్యులు ప్రయత్నించారు. అయితే నీటి ప్రవాహం అత్యంత వేగంగా ఉండటంతో నేరుగా అతడి వద్దకు వెళ్లడం ప్రమాదకరంగా మారింది. పరిస్థితి తీవ్రంగా ఉండటంతో కుటుంబ సభ్యులు ప్రత్యామ్నాయ మార్గంలో అతడిని బయటకు తీసుకురావడానికి ప్రయత్నించారు (Dupatta saves biker).

ఆ కుటుంబానికి చెందిన ఓ యువతి తన చున్నీని తీసి బైకర్ వైపు విసిరింది. వరద ప్రవాహంలో చిక్కుకున్న బైకర్ ఆ చున్నీని పట్టుకున్నాడు. దానిని ఆధారంగా చేసుకుని బయటకు వచ్చాడు. కుటుంబ సభ్యులు అందరూ కలిసి అతడిని లాగారు. ఈ ఘటనను ఓ వ్యక్తి వీడియో తీసి సోషల్ మీడియాలో పోస్ట్ చేశాడు. అది వైరల్‌గా మారింది.

ఇవి కూడా చదవండి

క్రికెట్‌లో కోహ్లీనే మెస్సి, రొనాల్డో.. థాయ్ ఇన్‌ఫ్లుయెన్సర్ వీడియో వైరల్

పోలవరం నుంచి ఉత్తరాంధ్రకు గోదావరి జలాలు.. చంద్రబాబు చేతుల మీదుగా విడుదల