బెంగాల్లో మమత నేతృత్వంలోని TMC పతనానికి కారణాలు!
ABN , Publish Date - May 04 , 2026 | 04:36 PM
బెంగాల్లో మమతా బెనర్జీ నేతృత్వంలోని TMC పతనానికి అనేక కారణాలు కనిపిస్తున్నాయి. ముఖ్యంగా 'RG Kar అత్యాచారం-హత్య' కేసు విషయంలో వ్యవహరించిన తీరు, పనితీరులో వైఫల్యం, గూండాయిజం, ముఖ్యంగా GenZ, GenX తరం తీవ్ర అసంతృప్తితో రగిలిపోవడం కీలకమైంది.
కోల్కతా, మే 4: పశ్చిమ బెంగాల్ చరిత్రను తిరగరాసి, 15 ఏళ్ల తర్వాత మమతా బెనర్జీ నేతృత్వంలోని తృణమూల్ కాంగ్రెస్ (TMC)ను అధికారం నుంచి తొలగించడానికి భారతీయ జనతా పార్టీ (BJP) సర్వసన్నద్ధమైంది. ప్రధాని నరేంద్ర మోదీ, కేంద్ర హోం మంత్రి అమిత్ షా వంటి అగ్ర నాయకుల ఎన్నికల ప్రచారాన్ని ముందుండి నడిపించిన ఈ కాషాయ పార్టీ, అత్యధిక కాలం వామపక్ష రాజకీయాల ఆధిపత్యం కొనసాగిన రాష్ట్రంలో మొట్టమొదటిసారిగా ప్రభుత్వాన్ని ఏర్పాటు చేయనుంది.
అయితే, ఈ ఎన్నికల్లో TMC చారిత్రక ఓటమిపై ఆ రాష్ట్ర ప్రజలు ఎన్నో కారణాలు చెబుతున్నారు. ముఖ్యంగా 'RG Kar అత్యాచారం-హత్య' కేసు విషయంలో TMC వ్యవహరించిన తీరునే ఓటమికి కీలకం చేస్తున్నారు. ఈ కేసుకు సంబంధించి మమతా బెనర్జీ పార్టీకి వ్యతిరేకంగా మహిళలను, యువతను ఏకం చేయడంలో బీజేపీ కీలక పాత్ర పోషించింది. అంతేకాకుండా, బాధితురాలి తల్లి రత్న దేబ్నాథ్ను పానిహతి అసెంబ్లీ నియోజకవర్గం నుంచి BJP అభ్యర్థిగా బరిలోకి దింపడం కూడా TMCకి ఏమాత్రం కలిసిరాలేదు.
దీనికి తోడు, పనితీరులో వైఫల్యం, గూండాయిజం, TMC కింది స్థాయి కార్యకర్తలు బలవంతంగా వసూలు చేసే 'కట్-మనీ' (అక్రమ వసూళ్లు) వంటి కారణాల వల్ల మహిళలు, యువత ముఖ్యంగా GenZ, GenX (వయస్సు సుమారు 46 నుంచి 61 ఏళ్లవాళ్లు) తరం వాళ్లు TMC పట్ల తీవ్ర అసంతృప్తితో రగిలిపోయారని కూడా చెబుతున్నారు. TMC నాయకుడు పార్థ ఛటర్జీకి అత్యంత సన్నిహితుడైన ఒక వ్యక్తి నివాసం నుంచి కోట్లాది రూపాయల నగదు పట్టుబడటం కూడా బెనర్జీ ప్రతిష్ఠను దెబ్బతీసింది.
బెంగాల్ ఎన్నికల కోసం మమతా బెనర్జీ అనుసరించిన వ్యూహం కూడా సరైంది కాదని విశ్లేషకులు అభిప్రాయపడుతున్నారు. ఆమె పదేపదే BJPని 'బయటి వ్యక్తులు' (outsiders)గా అభివర్ణించగా, కాషాయ పార్టీ మాత్రం రాష్ట్రంలో నెలకొన్న అవినీతిని, స్థానిక సమస్యలను పరిష్కరించడంలో TMC ప్రభుత్వం విఫలమైన తీరును ఎప్పటికప్పుడు ఎత్తిచూపుతూ వచ్చింది.
మరోవైపు, బంగ్లాదేశ్ నుంచి జరుగుతున్న అక్రమ చొరబాట్ల సమస్యను నిరంతరం ప్రస్తావిస్తూ, సీఎం మమతా బెనర్జీ మైనారిటీల బుజ్జగింపు రాజకీయాలకు పాల్పడుతున్నారని ఆరోపిస్తూ BJP కూడా తన పక్షాన మద్దతును కూడగట్టుకోగలిగింది. అంతేకాదు, మాటువాల పౌరసత్వానికి బీజేపీ వ్యతిరేకంగా పనిచేస్తోందని టీఎంసీ చేసిన ప్రచారాన్ని తప్పుడు ప్రచారమని చెప్పడంలోనూ బీజేపీ సఫలీకృతమైంది. బంగ్లాదేశ్ నుంచి వలస వచ్చిన హిందువులందరికీ పౌరసత్వం ఇస్తామని, ఇప్పటికే పౌరసత్వం ఉన్నవారు ఆందోళన చెందాల్సిన అవసరం లేదని కూడా బీజేపీ గట్టిగా ప్రజల్లోకి తీసుకెళ్లగలిగింది.
ఆర్జీ కర్ ఘటన నుంచి యువత ఆగ్రహం వరకు.. మమతను దెబ్బకొట్టిన ప్రధానాంశాలివే!
ఆర్జీ కర్ మెడికల్ కాలేజీ ఘటన (RG Kar Incident):
బెంగాల్లో టీఎంసీ పతనానికి ప్రధాన కారణంగా 'ఆర్జీ కర్ మెడికల్ కాలేజీ' ఘటన నిలిచింది. ఒక యువ వైద్యురాలిపై జరిగిన అమానుష ఘటన, ఆ తర్వాత చోటుచేసుకున్న పరిణామాలు రాష్ట్రవ్యాప్తంగా ప్రజల్లో తీవ్ర ఆగ్రహాన్ని కలిగించాయి. ముఖ్యంగా మహిళా భద్రత విషయంలో ప్రభుత్వం విఫలమైందన్న భావన ప్రజల్లో బలంగా నాటుకుపోయింది. బాధిత వైద్యురాలి తల్లి స్వయంగా ఎన్నికల బరిలోకి దిగడం టీఎంసీకి రాజకీయంగా పెద్ద దెబ్బ తగిలింది.
యువతలో పెల్లుబికిన ఆగ్రహం:
నిరుద్యోగం, ఉపాధి అవకాశాలు లేకపోవడం, ప్రభుత్వ ఉద్యోగాల నియామకాల్లో జరిగిన కుంభకోణాలు (Recruitment Scams) యువతను టీఎంసీకి దూరం చేశాయి. మార్పు కోరుకున్న యువ ఓటర్లు ఈసారి బీజేపీ వైపు మొగ్గు చూపడం ఫలితాల్లో స్పష్టంగా కనిపిస్తోంది.
'సందేశ్ఖాలీ' ప్రభావం:
సందేశ్ఖాలీలో మహిళలపై జరిగిన వేధింపుల ఆరోపణలు, స్థానిక నేతల అరాచకాలు టీఎంసీ ఇమేజ్ను డ్యామేజ్ చేశాయి. గ్రామీణ ప్రాంతాల్లో సైతం మహిళా ఓటర్లు పార్టీకి వ్యతిరేకంగా ఓటు వేయడానికి ఇది ఒక ముఖ్య కారణం.
సంస్థాగత మార్పులు - ఓటర్ల జాబితా ప్రక్షాళన:
ఎన్నికల కమిషన్ చేపట్టిన ప్రత్యేక ప్రక్షాళనలో భాగంగా సుమారు 89 లక్షల మంది (రాష్ట్ర ఓటర్లలో 11.6%) ఓటర్లను జాబితా నుంచి తొలగించడం టీఎంసీకి ప్రతికూలంగా మారింది. ఈ తొలగింపులపై మమతా బెనర్జీ తీవ్ర నిరసన వ్యక్తం చేసినప్పటికీ, ఫలితాల్లో అది ప్రభావం చూపింది.
యాంటీ-ఇంకంబెన్సీ (ప్రభుత్వ వ్యతిరేకత):
వరుసగా మూడుసార్లు అధికారంలో ఉండటంతో సహజంగానే వచ్చే ప్రభుత్వ వ్యతిరేకత ఈసారి బలంగా పనిచేసింది. అవినీతి ఆరోపణలు, వారసత్వ రాజకీయాలు, స్థానిక నేతల వైఖరిపై ప్రజలు విసుగు చెందారు.
'మా వెన్నెముక అమ్ముడుపోదు' (Our spine is not for sale) అనే నినాదంతో సాగిన ఉద్యమం బెంగాల్ రాజకీయాలను మార్చివేసింది. ఒకప్పుడు మమతా బెనర్జీకి అండగా నిలిచిన మహిళలు, యువత.. ఇప్పుడు మార్పు వైపు అడుగులు వేయడంతో బెంగాల్లో దశాబ్దన్నర కాలపు టీఎంసీ పాలనకు బ్రేక్ పడింది.
ఇలా చాలా విషయాల్లో బీజేపీ.. తృణముల్ కాంగ్రెస్ లోని లోపాల్ని సమర్థవంతంగా ఎత్తి చూపి తామే సరైన ప్రత్యామ్నాయమని చెప్పి బెంగాల్ వాసుల మనసు గెలిచి, అధికార పీఠాన్ని చేజిక్కించుకోబోతోంది.
ఇవి కూడా చదవండి..
ఐదు రాష్ట్రాల ఫలితాల వేళ ప్రధాని మోదీ ఆసక్తికర పోస్ట్.. నైపుణ్యం, కృషి, కరుణపై సందేశం
ఓట్ల లెక్కింపు వేళ.. మురుగు కాలువలో వీవీప్యాట్ స్లిప్పులు.. స్పందించిన ఈసీ
