Heavy Rains: బంగాళాఖాతంలో తీవ్ర వాయుగుండం.. భారీ వర్ష సూచన
ABN , Publish Date - Jan 07 , 2026 | 12:30 PM
బంగాళాఖాతంలో తీవ్ర వాయుగుండం ఏర్పడిందని, దీని ప్రభావంతో భారీగా వర్షాలు కురిసే అవకాశముందని వాతావరణ శాఖ చెన్నై ప్రాంతీయ వాతావరణ కేంద్రం తెలిపింది. 9వ తేదీ వరకు వర్షాలు కురుస్తాయని తెలిపింది.
- 9వ తేదీ వరకు వర్షాలు
చెన్నై: బంగాళాఖాతంలో తీవ్ర వాయుగుండం కేంద్రీకృతమైంది. దీని ప్రభావంతో ఈ నెల 9వ తేదీ వరకు రాష్ట్రంలోని పలు ప్రాంతాల్లో భారీ వర్షాలు కురిసే అవకాశం ఉందని వాతావరణ శాఖ చెన్నై ప్రాంతీయ వాతావరణ కేంద్రం వెల్లడించింది. ఆగ్నేయ బంగాళాఖాతంలో ఏర్పడిన వాయుగుండం ఇపుడు తీవ్ర వాయుగుండంగా బలపడింది. ఇది క్రమంగా మరింతగా బలపడే అవకాశం ఉందని వాతావరణ శాఖ అధికారులు తెలిపారు. ఈ కారణంగా రానున్న రెండు రోజుల పాటు కోస్తాతీర జిల్లాల్లో కొన్ని చోట్ల, పుదుచ్చేరి, కారైక్కాల్ ప్రాంతాల్లో ఉరుములు, మెరుపులతో కూడిన మోస్తరు వర్షం కురిసే అవకాశం ఉంది.
ఈ నెల 9వ తేదీ వరకు తంజావూరు, తిరువారూరు, నాగపట్టణం, మైలాడుదురై, రామనాథపురం, పుదుక్కోటతోపాటు డెల్టా జిల్లాల్లో భారీ వర్షం కురుస్తుందని పేర్కొంది. ఈ వాయుగుండం కారణంగా గల్ఫ్ ఆఫ్ మన్నార్, కన్నియాకుమారి కోస్తా తీరంలో గంటకు 35 నుంచి 45 కిలోమీటర్ల వేగంతో ఈదురు గాలులు వీచే అవకాశం ఉందని పేర్కొంది. రాజధాని చెన్నై నగరంలో ఆకాశం మేఘావృతమై ఉంటుందని, నగరంలోని కొన్ని ప్రాంతాల్లో తేలికపాటి జల్లులు కురిసే అవకాశం ఉందని వెల్లడించింది.
ఈ వార్తలు కూడా చదవండి..
స్వల్పంగా పెరిగిన బంగారం, వెండి.. ఈ రోజు ధరలు ఎలా ఉన్నాయంటే..
Read Latest Telangana News and National News
