రష్యాలో ఓ భార్య ఆవేదన.. స్పందించిన భారత ఎంబసీ

మాస్కో /ఢిల్లీ, సెప్టెంబర్ 7: రష్యా రాజధాని మాస్కోలో తన భర్తను పోలీసులు అన్యాయంగా నిర్బంధించి, ఉక్రెయిన్ యుద్ధం కోసం రష్యన్ సైన్యంలో చేరాలంటూ తీవ్ర ఒత్తిడి తెస్తున్నారని ఓ భారతీయ మహిళ ఆవేదన వ్యక్తం చేశారు. తన భర్తను రక్షించాలని కోరుతూ సదరు మహిళ సోషల్ మీడియా ద్వారా ప్రధాని నరేంద్ర మోదీ, ఉత్తర్ ప్రదేశ్ ముఖ్యమంత్రి యోగి ఆదిత్యనాథ్‌లకు విజ్ఞప్తి చేయగా, భారత విదేశాంగ శాఖ, మాస్కోలోని భారత రాయబార కార్యాలయం వెంటనే స్పందించాయి.

బాధితురాలి ఆవేదన

చందన్ గుప్తా ఉత్తర ప్రదేశ్‌లోని కాన్పూర్ వాసి. నోయిడాకు చెందిన ఒక కంపెనీ తరఫున 'హైలీ క్వాలిఫైడ్ స్పెషలిస్ట్' వీసాపై ఆయన తన కుటుంబంతో (భార్య స్నేహా గుప్తా, 10 ఏళ్ల కుమారుడు) కలిసి మోస్కోలో నివసిస్తున్నారు. స్నేహా గుప్తా తెలిపిన వివరాల ప్రకారం, ఎలాంటి తప్పు చేయకపోయినా ఆదివారం మధ్యాహ్నం రష్యా పోలీసులు తన భర్తను అదుపులోకి తీసుకున్నారని, రష్యా సైన్యంలో సిబ్బంది కొరత కారణంగా తన భర్తతో పాటు మరికొందరు విదేశీయులను బలవంతంగా సైన్యంలో చేర్చుకోవడానికి ప్రయత్నిస్తున్నారని ఆమె ఆరోపించారు.

తమకు 10 ఏళ్ల కుమారుడు ఉన్నాడని, ఈ పరిస్థితుల్లో తమ కుటుంబం తీవ్ర ఆందోళనలో ఉందని, భారత ప్రభుత్వం తక్షణమే జోక్యం చేసుకుని తన భర్తను సురక్షితంగా విడిపించాలని ఆమె ఓ వీడియోను సోషల్ మీడియాలో పోస్ట్ చేశారు.

అధికారిక వర్గాల స్పందన

భారత ప్రభుత్వ వర్గాల సమాచారం ప్రకారం.. చందన్ గుప్తా మాస్కోలోని 'ఫ్లెక్స్ ఫిల్మ్స్ రస్ ఎల్‌ఎల్‌సి' అనే సంస్థలో పనిచేస్తున్నారు. సెప్టెంబర్ 5వ తేదీ రాత్రి 11:30 గంటల ప్రాంతంలో మాస్కోలోని రెడ్ స్క్వేర్ వద్ద చందన్ గుప్తా, ఆయన స్నేహితుడు ఆశిష్‌ను బహిరంగంగా మద్యం సేవించడం, ఆంబులెన్స్ అద్దాలు పగలగొట్టడం అనే ఆరోపణలపై పోలీసులు అదుపులోకి తీసుకున్నారని తెలిసింది. ప్రస్తుతం వారిద్దరూ మాస్కోలోని 'బౌమాన్స్కాయా' పోలీస్ స్టేషన్‌లో ఉన్నారు. భారత రాయబార కార్యాలయం ఇప్పటికే రష్యా అధికారులతో మాట్లాడి వారి విడుదలకు చొరవ చూపుతోందని, కాన్సులర్ యాక్సెస్ (అధికారుల కలయిక) కోసం అభ్యర్థించిందని అధికారులు వెల్లడించారు.

రష్యా సైన్యంలో భారతీయుల అంశం

ఉద్యోగాల పేరుతో భారతీయులను రష్యాకు తీసుకెళ్లి, ఆపై బలవంతంగా ఉక్రెయిన్ యుద్ధంలోకి దింపుతున్నారనే ఆందోళనలు ఇటీవల పెరిగిన సంగతి తెలిసిందే. విదేశాంగ మంత్రిత్వ శాఖ ఇటీవలే విడుదల చేసిన గణాంకాల ప్రకారం, ఇప్పటివరకు 227 మంది భారతీయ పౌరులు రష్యన్ సైన్యంలో చేరగా, వారిలో 139 మంది డిశ్చార్జ్ అయ్యారు. కాగా 51 మంది ప్రాణాలు కోల్పోయారు. మిగిలిన భారతీయులను కూడా త్వరగా స్వదేశానికి రప్పించేందుకు రష్యా ప్రభుత్వంతో చర్చలు జరుపుతున్నట్లు కేంద్రం స్పష్టం చేసింది.

ఇవి కూడా చదవండి...

LP మీటింగ్ కూడా కేసీఆర్ ఫామ్‌హౌస్‌లోనే చేస్తారా: మంత్రి సీతక్క

రాంచందర్‌రావు అరెస్ట్.. తోపులాట.. ఉద్రిక్తత