నేషనల్ హెరాల్డ్ కేసు.. గాంధీ కుటుంబానికి తాత్కాలిక ఊరట

న్యూ ఢిల్లీ, ఏప్రిల్ 20: నేషనల్ హెరాల్డ్ మనీ లాండరింగ్ కేసులో కాంగ్రెస్ అగ్రనేతలు సోనియా గాంధీ, రాహుల్ గాంధీలకు ఢిల్లీ హైకోర్టులో ఇవాళ (సోమవారం) స్వల్ప ఊరట లభించింది. ఈ కేసుకు సంబంధించి ఎన్‌ఫోర్స్‌మెంట్ డైరెక్టరేట్ (ED) దాఖలు చేసిన పిటిషన్‌పై విచారణ జస్టిస్ స్వర్ణకాంత శర్మ ధర్మాసనం మే 25వ తేదీకి వాయిదా వేసింది.

వివాదం ఏమిటి?

గతంలో ట్రయల్ కోర్టు (Trial Court) ఈ కేసులో కీలక నిర్ణయం తీసుకుంది. సాధారణంగా మనీ లాండరింగ్ కేసు నమోదు చేయాలంటే దానికి మూలమైన 'ప్రెడికేట్ అఫెన్స్' (Predicate Offence) పై ఒక FIR ఉండాలి. కానీ, ఈ కేసు కేవలం సుబ్రహ్మణ్య స్వామి దాఖలు చేసిన ప్రైవేట్ ఫిర్యాదు ఆధారంగా నడుస్తోందని, దీనిపై ఎలాంటి FIR లేదని పేర్కొంటూ ED చార్జ్‌షీట్‌ను పరిగణనలోకి తీసుకోవడానికి ట్రయల్ కోర్టు నిరాకరించింది. ఈ నిర్ణయాన్ని సవాలు చేస్తూ ED హైకోర్టును ఆశ్రయించింది.

ED వాదనలు ఇవే:

ట్రయల్ కోర్టు ఇచ్చిన తీర్పు 'తప్పు' అని, ఇది ఇతర మనీ లాండరింగ్ కేసులపై కూడా ప్రభావం చూపుతుందని సొలిసిటర్ జనరల్ తుషార్ మెహతా వాదించారు. అసోసియేటెడ్ జర్నల్స్ లిమిటెడ్ (AJL) కు చెందిన దాదాపు రూ. 2,000 కోట్ల విలువైన ఆస్తులను 'యంగ్ ఇండియన్' సంస్థ ద్వారా అక్రమంగా చేజిక్కించుకున్నారని ED ఆరోపిస్తోంది. యంగ్ ఇండియన్ సంస్థలో సోనియా, రాహుల్ గాంధీలకు 76 శాతం వాటా ఉందని, దీని ద్వారానే ఈ ఆర్థిక అక్రమాలు జరిగాయని దర్యాప్తు సంస్థ పేర్కొంది.

కోర్టు ఇప్పటికే సోనియా గాంధీ, రాహుల్ గాంధీలతో పాటు సుమన్ దూబే, శ్యామ్ పిట్రోడా, యంగ్ ఇండియన్, డోటెక్స్ మర్చండైజ్ వంటి సంస్థలకు నోటీసులు జారీ చేసింది. ఇలా ఉండగా, ట్రయల్ కోర్టు ఉత్తర్వులపై స్టే ఇవ్వాలని ED కోరుతోంది. ఒకవేళ హైకోర్టు ED వాదనతో ఏకీభవిస్తే, గాంధీ కుటుంబం చట్టపరంగా మరిన్ని ఇబ్బందులు ఎదుర్కోవాల్సి ఉంటుంది. దీనిపై మే 25న జరగబోయే విచారణలో కొంతమేర స్పష్టత వచ్చే అవకాశం ఉంది.

ఇవి కూడా చదవండి..

అఫిడవిట్లలో రూ.100 కోట్ల తేడా.. టీవీకే చీఫ్ విజయ్‌కు మద్రాసు హైకోర్టు నోటీసులు

15 ఏళ్లు తక్కువేం కాదు, ఈసారి బెంగాల్‌లో బీజేపీ పాగా... రాజ్‌నాథ్ సింగ్