ఢిల్లీలో ఉద్రిక్తత.. బారికేడ్లతో పాటు రోడ్లపై ఇనుప మేకులు..

ప్రధాన ఎన్నికల కమిషనర్ (CEC) జ్ఞానేష్ కుమార్ రాజీనామా డిమాండ్ చేస్తూ CJP తలపెట్టిన జంతర్ మంతర్ నిరసనల నేపథ్యంలో ఢిల్లీ సరిహద్దులు, కీలక ప్రాంతాలు పూర్తిగా యుద్ధరంగంలా మారాయి. ఆందోళనకారులు నగరంలోకి ప్రవేశించకుండా పోలీసులు కేవలం బారికేడ్లే కాకుండా, అత్యంత కఠినమైన భద్రతా చర్యగా స్పైక్ స్ట్రిప్స్‌ను (Spike Strips) రంగంలోకి దించారు.

సౌత్-ఈస్ట్ ఢిల్లీలోని మోహన్ కోఆపరేటివ్ ఇండస్ట్రియల్ ఏరియాలో రోడ్లపై మేకులు ఉండే స్పైక్ స్ట్రిప్స్‌ను అమర్చారు. నిషేధిత ప్రాంతాల వైపు ఎలాంటి వాహనాలు రాకుండా, అనుమానాస్పద కార్లను క్షుణ్ణంగా తనిఖీ చేసిన తర్వాతే పోలీసులు అనుమతిస్తున్నారు.

నిరసనలో పాల్గొనేందుకు విమానాశ్రయానికి చేరుకున్న ప్రముఖ యూట్యూబర్ ధ్రువ్ రాఠీ, అభిజీత్ డిప్కే, సౌరవ్ దాస్, అశుతోష్ రాంకాలను ఢిల్లీ పోలీసులు విమానం దిగగానే అదుపులోకి తీసుకున్నారు. నగరవ్యాప్తంగా వివిధ ప్రాంతాల్లో 500 మందికి పైగా ఆందోళనకారులను పోలీసులు నిర్బంధించారు.

శాంతిభద్రతల పరిరక్షణలో భాగంగా కేంద్ర ప్రభుత్వం 20,000 మందికి పైగా పోలీసు, కేంద్ర బలగాలను మోహరించింది. ఢిల్లీ మెట్రో రైల్ కార్పొరేషన్ (DMRC) ఆదేశాల మేరకు 45 మెట్రో స్టేషన్లలో ప్రవేశాలను నిలిపివేశారు. అలాగే శనివారం ఉదయం 4 గంటల నుంచి మధ్యాహ్నం 2 గంటల మధ్య ఢిల్లీకి రావాల్సిన 250కి పైగా రైళ్లను రద్దు చేశారు.

అవాంఛనీయ ఘటనలు జరగకుండా న్యూఢిల్లీ జిల్లాను 20 ప్రత్యేక జోన్లుగా విభజించి, సీనియర్ అధికారులను క్షేత్రస్థాయిలో బందోబస్తు పర్యవేక్షణకు నియమించారు.

ఈ వార్తలు కూడా చదవండి..

స్థిరంగా బంగారం, వెండి ధరలు..

ఎంప్లాయిమెంట్‌ ఎక్స్చేంజ్‌ సర్వీస్‌ రూల్స్‌లో సవరణలు