ఢిల్లీలో ఉచితంగా సందర్శించగల అద్భుతమైన ప్రదేశాలు ఇవే

ఇంటర్నెట్ డెస్క్: దేశ రాజధాని ఢిల్లీ చారిత్రక కట్టడాలు, అందమైన పార్కులు, ప్రసిద్ధ పర్యాటక ప్రాంతాలతో ఎంతో ప్రత్యేకంగా ఉంటుంది. ముఖ్యంగా కుటుంబంతో కలిసి తక్కువ ఖర్చుతో మంచి ప్రదేశాలను చూడాలనుకునేవారికి ఢిల్లీలో ఎన్నో ఉచిత పర్యాటక ప్రాంతాలు ఉన్నాయి. టికెట్ అవసరం లేకుండా సందర్శించగల అలాంటి ప్రముఖ ప్రదేశాల గురించి ఇప్పుడు తెలుసుకుందాం..

ఇండియా గేట్‌

ఢిల్లీ పర్యటనలో ఇండియా గేట్ (India Gate) సందర్శన తప్పనిసరి. అమరవీరుల స్మారక చిహ్నంగా నిర్మించిన ఈ ప్రదేశం సందర్శకులను ఎంతో ఆకట్టుకుంటుంది. ఇక్కడ ఫొటోలు, వీడియోలు తీసుకోవచ్చు. సమీపంలోని పార్కులో కుటుంబంతో కలిసి ప్రశాంతంగా గడపొచ్చు. ముఖ్యంగా, ఇక్కడికి ప్రవేశం పూర్తిగా ఉచితం.

సంజయ్ వన్

ఢిల్లీలోనే ప్రకృతి మధ్యలో ప్రశాంత వాతావరణాన్ని ఆస్వాదించాలంటే సంజయ్ వన్ ఉత్తమ ఎంపిక. కుటుంబంతో పిక్నిక్‌కు లేదా ఫొటోషూట్‌లకు ఇది మంచి స్థలం. ఇక్కడ కూడా ప్రవేశం ఉచితం.

అగ్రసేన్ కి బావోలీ

కన్నాట్ ప్లేస్ సమీపంలో ఉన్న అగ్రసేన్ కి బావోలీ ఒక చారిత్రక మెట్ల బావి. పొడవైన మెట్లు, పురాతన నిర్మాణ శైలి సందర్శకులను ఆకట్టుకుంటాయి. కొందరు దీనిని రహస్యమైన ప్రదేశంగా కూడా చెబుతుంటారు. ఇక్కడ ప్రవేశానికి ఎలాంటి టికెట్ అవసరం లేదు.

రాజ్‌ఘాట్

జాతిపిత మహాత్మా గాంధీ సమాధి ఉన్న రాజ్‌ఘాట్ దేశ చరిత్రలో ప్రత్యేక స్థానం కలిగి ఉంది. ప్రతి సంవత్సరం గాంధీ జయంతి సందర్భంగా ప్రముఖులు ఇక్కడికి వచ్చి నివాళులర్పిస్తారు. ప్రశాంతమైన వాతావరణంలో ఉన్న ఈ ప్రదేశం చరిత్రను దగ్గరగా చూపిస్తుంది. ఇక్కడికి వెళ్లడానికి టికెట్ అవసరం లేదు.

హౌజ్ ఖాస్ విలేజ్

యువతకు ఎంతో ఇష్టమైన ప్రదేశాల్లో హౌజ్ ఖాస్ విలేజ్ ఒకటి. ఇక్కడ రెస్టారెంట్లు, చారిత్రక నిర్మాణాలు, సరస్సు అందాలు ప్రత్యేక ఆకర్షణగా నిలుస్తాయి. రాత్రివేళ ఈ ప్రాంతం మరింత అందంగా కనిపిస్తుంది. కుటుంబంతో కలిసి ఢిల్లీ నగర జీవనశైలిని ఆస్వాదించడానికి ఇది మంచి ప్రదేశం.

లోటస్ టెంపుల్

కమలాకారంలో నిర్మించిన లోటస్ టెంపుల్ ఢిల్లీలోని ప్రముఖ ఆకర్షణల్లో ఒకటి. ఇక్కడ ప్రశాంతంగా ధ్యానం చేయవచ్చు. ఆలయం లోపల ఫొటోగ్రఫీకి అనుమతి లేకపోయినా, బయట ప్రాంగణంలో ఫొటోలు తీసుకోవచ్చు. ఈ ఆలయ ప్రవేశం కూడా పూర్తిగా ఉచితం. కుటుంబంతో కలిసి తక్కువ ఖర్చుతో ఢిల్లీ అందాలను ఆస్వాదించాలనుకునేవారికి ఈ ప్రదేశాలు మంచి ఎంపికగా నిలుస్తాయి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఆఫీసులో గంటల తరబడి కూర్చుంటున్నారా? మీ ఆరోగ్యం ప్రమాదంలో ఉన్నట్టే!

ప్రకృతి ప్రసాదించిన యాంటీ బయాటిక్స్.. రోగనిరోధక శక్తిని పెంచే 'సూపర్ మసాలాలు' ఇవే!

For More Latest News