రైలు ప్రయాణికులకు గుడ్ న్యూస్.. కొత్త సిస్టమ్‌‌ను అందుబాటులోకి తెస్తున్న IRCTC

ఆంధ్రజ్యోతి, జులై 15: రైలు ప్రయాణికులకు ఇండియన్ రైల్వే కేటరింగ్ అండ్ టూరిజం కార్పొరేషన్ (IRCTC) అదిరిపోయే గుడ్‌న్యూస్ చెప్పింది. ఇకపై తత్కాల్ టికెట్ల బుకింగ్ కోసం గంటల తరబడి నిరీక్షించాల్సిన, సర్వర్ క్రాష్‌లతో తలపట్టుకోవాల్సిన అవసరం ఉండదు. మరింత వేగంగా, సులువుగా టికెట్లు బుక్ చేసుకునేలా సరికొత్త డిజైన్‌తో కూడిన కొత్త IRCTC వెబ్‌సైట్‌ను తీసుకొస్తోంది.

కేంద్ర రైల్వే శాఖ మంత్రి అశ్విని వైష్ణవ్ గత నెలలో రాజస్థాన్‌లో జరిగిన ఒక కార్యక్రమంలో విద్యార్థుల నుంచి వచ్చిన ఫిర్యాదులు, సూచనల ఆధారంగా ఈ కీలక మార్పులకు శ్రీకారం చుట్టారు. ఈ సరికొత్త వెబ్‌సైట్ ఫీచర్లు, అప్‌గ్రేడ్ల గురించిన పూర్తి వివరాలు ఇవే:

తత్కాల్ బుకింగ్స్‌కు 'రాకెట్' వేగం

సాధారణంగా తత్కాల్ విండో ఓపెన్ అయిన మొదటి నిమిషంలోనే లక్షలాది మంది లాగిన్ అవ్వడం వల్ల పాత వెబ్‌సైట్ హ్యాంగ్ అవ్వడం, పేమెంట్లు నిలిచిపోవడం వంటి సమస్యలు ఎదురయ్యేవి. దీనికి పరిష్కారంగా బ్యాకెండ్ సామర్థ్యాన్ని భారీగా పెంచారు.

నిమిషానికి 1.5 లక్షల బుకింగ్స్: ప్రస్తుతం ఉన్న వెబ్‌సైట్ నిమిషానికి కేవలం 32,000 టికెట్లు మాత్రమే బుక్ చేసే సామర్థ్యం కలిగి ఉండగా.. కొత్త సిస్టమ్ ఏకంగా 1.5 లక్షలకు పైగా బుకింగ్స్‌ను ఒకే నిమిషంలో ప్రాసెస్ చేయగలదు. అంటే దాదాపు 5 రెట్లు వేగం పెరగనుంది.

40 లక్షల ఎంక్వైరీలు: ప్యాసింజర్ రిజర్వేషన్ సిస్టమ్ (PRS) సామర్థ్యాన్ని నిమిషానికి 4 లక్షల నుంచి ఏకంగా 40 లక్షల ఎంక్వైరీలను తట్టుకునేలా అప్‌గ్రేడ్ చేశారు.

కొత్త వెబ్‌సైట్‌లో వచ్చే ప్రయాణికుల ఫ్రెండ్లీ ఫీచర్లు

1. నో పాప్-అప్స్, నో క్యాప్చా (CAPTCHA)ల గోల

తత్కాల్ బుకింగ్ సమయంలో క్షణాలు కూడా ఎంతో విలువైనవి. ఆ సమయంలో వచ్చే యాడ్స్, పాప్-అప్స్, పదే పదే అడిగే క్యాప్చా వెరిఫికేషన్లను ఈ కొత్త వెబ్‌సైట్‌లో చాలా వరకు తగ్గించారు. దీనివల్ల ఎటువంటి ఆటంకాలు లేకుండా నేరుగా బుకింగ్ పూర్తి చేయవచ్చు.

2. ఒకే స్క్రీన్‌పై అన్ని క్లాసుల సీట్ల వివరాలు

గతంలో స్లీపర్, థర్డ్ ఏసీ, సెకండ్ ఏసీ క్లాసుల సీట్ల లభ్యతను వేర్వేరుగా క్లిక్ చేసి చూసుకోవాల్సి వచ్చేది. కానీ ఇకపై ఒకే స్క్రీన్‌పై అన్ని క్లాసుల సీట్ల వివరాలు (Unified View) కనిపిస్తాయి.

3. ఫేర్ క్యాలెండర్ (Fare Calendar) , సీట్ సెలక్షన్

ప్రయాణ తేదీల్లో ఫ్లెక్సిబిలిటీ ఉన్నవారి కోసం 'ఫేర్ క్యాలెండర్' ఫీచర్‌ను తెస్తున్నారు. దీని ద్వారా ఏ రోజు టికెట్ ధర తక్కువగా ఉందో ముందే చూసి పోల్చుకోవచ్చు. అలాగే బుకింగ్ సమయంలోనే ప్రయాణికులు తమకు నచ్చిన సీటు లేదా బర్త్‌ను ఎంచుకునే సదుపాయం కూడా అందుబాటులోకి రానుంది.

4. బహుభాషా మద్దతు, ఒకే వేదికపై కన్సెషన్లు

ఇంగ్లీష్, హిందీ రాని వారి కోసం ప్రాంతీయ భాషల సదుపాయాన్ని మరింత విస్తరించారు. అలాగే దివ్యాంగులు, విద్యార్థులు, రోగులకు లభించే టికెట్ రాయితీల (Concessions) ప్రక్రియను వేర్వేరుగా కాకుండా ఒకే విండో కిందికి తీసుకువచ్చారు.

లాంచ్ ఎప్పుడు?

షెడ్యూల్ ప్రకారం ఈ కొత్త వెబ్‌సైట్‌ లేదా దీనికి సంబంధించిన బీటా వర్షన్‌ను ఇవాళ ( జూలై 15)న లాంచ్ చేయాల్సి ఉంది. అయితే, బ్యాకెండ్ సిస్టమ్స్ అప్‌గ్రేడ్ పనులు పూర్తిస్థాయిలో జరుగుతుండటంతో, దీని అధికారిక రోల్‌అవుట్ ఆగస్టు రెండో వారంలో (స్వాతంత్ర్య దినోత్సవం నాటికి) ఉండే అవకాశం కూడా ఉందని కొన్ని నివేదికలు సూచిస్తున్నాయి. ఏదేమైనా, ఈ అప్‌గ్రేడ్ అందుబాటులోకి వస్తే కోట్లాది మంది భారతీయ రైల్వే ప్రయాణికులకు టికెట్ బుకింగ్ భారం చాలా వరకు తప్పనుంది!

ఇవి కూడా చదవండి..

APHEFRMC సభ్యుల నియామకానికి ప్రభుత్వం ఉత్తర్వులు

నోయిడాలో భారీ అగ్నిప్రమాదం.. ఇద్దరి మృతి

Read Latest AP News And Telugu News