జుట్టుకు రంగు వేసుకుంటున్నారా? ఈ జాగ్రత్తలు తీసుకోండి

ఇంటర్నెట్ డెస్క్: ఈ రోజుల్లో చిన్న వయసులోనే జుట్టు తెల్లబడటం సర్వసాధారణమైపోయింది. జీవనశైలి మార్పులు, పెరుగుతున్న ఒత్తిడి, ఆహారపు అలవాట్లలో మార్పులు, కాలుష్యం దీనికి ప్రధాన కారణాలని నిపుణులు చెబుతున్నారు. తెల్ల జుట్టును దాచడానికి యువతీ‑యువకులు కూడా హెయిర్ డై వాడుతున్నారు.

జుట్టుకు రంగు (Hair dye) వేయడం వల్ల తాత్కాలికంగా అందం పెరిగినా, తరచుగా వేయడం ఆరోగ్యానికి మంచిది కాదు. రసాయనాలతో కూడిన రంగులు జుట్టును పొడిగా, బలహీనంగా మార్చి, చివర్లు చిట్లడం, అధికంగా రాలడం వంటి సమస్యలకు దారితీస్తాయి. హెయిర్ డై తల చర్మానికి, చెవుల చుట్టూ ఉన్న చర్మానికి, మెడ చర్మానికి తగిలితే చర్మ సమస్యల అవకాశం పెరుగుతుందని నిపుణులు హెచ్చరిస్తున్నారు.

హెయిర్ డైలో ఉండే రసాయనాలు చర్మానికి హానికరంగా ఉంటాయి. కొందరికి అలర్జీలు, దురద, మంట లేదా ఎర్రటి దద్దుర్లు, వాపు ఏర్పడవచ్చు. అందువల్ల, హెయిర్ డై వాడేటప్పుడు జాగ్రత్తగా ఉండటం చాలా ముఖ్యం.

తీసుకోవాల్సిన జాగ్రత్తలు:

• ప్యాచ్ టెస్ట్: రంగు వల్ల అలర్జీ వస్తుందో లేదో తెలుసుకోవడానికి, చెవి వెనుక కొద్దిగా రంగు రాసి గమనించాలి. చర్మంలో ఏవైనా మార్పులు గమనిస్తే వెంటనే శుభ్రమైన నీటితో కడగాలి.

• నాణ్యమైన ఉత్పత్తులు: నాణ్యమైన హెయిర్ డైని ఎంచుకోవాలి.

• గ్లౌజులు వాడండి: రంగు వేసేటప్పుడు చేతులకు రక్షణగా గ్లౌజులు తప్పకుండా వేసుకోవాలి.

• సమయం పాటించండి: రంగును ఎక్కువసేపు జుట్టుపై ఉంచకూడదు, ఇది జుట్టును బలహీనపరుస్తుంది.

• శుభ్రం చేయడం: రంగు వేసిన తర్వాత తలస్నానం చేసేటప్పుడు, నీరు రంగు లేకుండా వచ్చే వరకు బాగా కడగాలి.

• కండీషనర్ వాడకం: రంగు వేసిన తర్వాత కచ్చితంగా కండీషనర్ వాడాలి, ఇది జుట్టుకు తేమను ఇస్తుంది.

• వేడికి దూరంగా: హెయిర్ డ్రైయర్, స్ట్రైటెనర్ వంటి వేడి ఉపకరణాలను తగ్గించాలి, ఇవి జుట్టును పొడిగా చేస్తాయి.

• సహజమైన జుట్టు సంరక్షణ పద్ధతులను పాటించడం వల్ల జుట్టు, చర్మం రెండూ ఆరోగ్యంగా ఉంటాయి.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

ఈ వార్తలు కూడా చదవండి..

పాలను ఇలా తాగితే హైబీపీకి చెక్.. సింపుల్ చిట్కా..

గంటల తరబడి కూర్చొని పని చేస్తున్నారా? అయితే ఈ నష్టం తప్పదు

For More Latest News