గోంగూర మటన్ కర్రీ.. ఆంధ్రా స్టైల్ స్పెషల్ రెసిపీ

ఇంటర్నెట్ డెస్క్: తెలుగు రాష్ట్రాల్లో ఎంతో ప్రాచుర్యం పొందిన వంటకాలలో గోంగూర మటన్ కర్రీ ఒకటి. గోంగూర పులుపు, మటన్ మసాలా రుచి కలిసిన ఈ కర్రీ అన్నం, రోటీ, జొన్న రొట్టెలతో అద్భుతంగా సరిపోతుంది. హోటల్ స్టైల్‌లోనే ఇంట్లో కూడా ఈ రుచికరమైన గోంగూర మటన్‌ను సులభంగా తయారు చేసుకోవచ్చు.

కావలసిన పదార్థాలు

• మటన్ – 500 గ్రాములు

• గోంగూర ఆకులు – 2 కట్టలు

• ఉల్లిపాయలు – 2 (సన్నగా తరిగినవి)

• టమాటాలు – 2

• పచ్చిమిర్చి – 3

• అల్లం వెల్లుల్లి పేస్ట్ – 2 టీస్పూన్లు

• కారం – 1 టీస్పూన్

• పసుపు – అర టీస్పూన్

• ధనియాల పొడి – 1 టీస్పూన్

• గరం మసాలా – అర టీస్పూన్

• జీలకర్ర – అర టీస్పూన్

• నూనె – 4 టేబుల్ స్పూన్లు

• కరివేపాకు – కొద్దిగా

• కొత్తిమీర – అలంకరణకు

• ఉప్పు – తగినంత

తయారీ విధానం

• ముందుగా మటన్‌ను శుభ్రంగా కడిగి కొద్దిగా పసుపు, ఉప్పు వేసి పక్కన పెట్టాలి. గోంగూర ఆకులను కడిగి నీరు వంపి చిన్నగా తరిగి పెట్టుకోవాలి.

• ఇప్పుడు కుక్కర్‌లో నూనె వేసి జీలకర్ర, కరివేపాకు వేయాలి. తర్వాత ఉల్లిపాయలు వేసి బంగారు రంగు వచ్చే వరకు వేయించాలి. అందులో అల్లం వెల్లుల్లి పేస్ట్, పచ్చిమిర్చి వేసి బాగా కలపాలి.

• టమాటాలు వేసి మెత్తగా అయ్యే వరకు ఉడికించాలి. తర్వాత కారం, పసుపు, ధనియాల పొడి, ఉప్పు వేసి కలపాలి. ఇప్పుడు మటన్ ముక్కలు వేసి 5 నుంచి 10 నిమిషాలు బాగా వేయించాలి.

• తర్వాత కొద్దిగా నీరు పోసి కుక్కర్ మూత పెట్టి 5 నుంచి 6 విజిల్స్ వచ్చే వరకు ఉడికించాలి. మటన్ బాగా మెత్తబడిన తర్వాత గోంగూర ఆకులు వేసి మరో 10 నిమిషాలు సిమ్‌లో ఉడికించాలి.

• చివరగా గరం మసాలా, కొత్తిమీర చల్లి స్టౌ ఆఫ్ చేయాలి. అంతే.. వేడివేడిగా నోరూరించే గోంగూర మటన్ కర్రీ రెడీ.

• ఈ గోంగూర మటన్ కర్రీని వేడి అన్నం, నెయ్యి, జొన్న రొట్టె లేదా రాగి సంగటితో తింటే రుచి మరింత పెరుగుతుంది.

Also Read:

మదర్స్ డే.. మే రెండో ఆదివారమే ఎందుకు జరుపుకుంటారో తెలుసా?

సైకోగా కనిపించాలనుంది!

For More Latest News