స్టైల్ కోసం కాలు మీద కాలేస్తున్నారా.. ఈ సైడ్ ఎఫెక్ట్స్ తెలిస్తే షాక్ అవుతారు!

ఇంటర్నెట్ డెస్క్: సాధారణంగా చాలామంది ఇంటాబయట అనే తేడా లేకుండా అన్నిచోట్లా కాలుమీద కాలు వేసుకుని కూర్చుంటుంటారు. ఇది చూసేందుకు స్టైలిష్‌గా, సౌకర్యంగా అనిపించినప్పటికీ.. ఎక్కువ సేపు ఇలా కూర్చోవడం వల్ల శరీరానికి కొన్ని ఇబ్బందులు తప్పవని ఆరోగ్య నిపుణులు హెచ్చరిస్తున్నారు.

1.రక్తపోటు పెరిగే అవకాశం:

కాలు మీద కాలేసుకున్నప్పుడు, గుండెకు రక్తాన్ని చేరవేసే సిరలపై ఒత్తిడి పెరుగుతుంది. దీనివల్ల రక్త ప్రసరణలో స్వల్ప అడ్డంకులు ఏర్పడి, తాత్కాలికంగా రక్తపోటు(BP) పెరిగే అవకాశం ఉంది. ఇప్పటికే బీపీ సమస్య ఉన్నవారు ఇలా కూర్చోకపోవడమే మంచిది.

2. నరాలపై ఒత్తిడి:

కాలు మీద కాలు వేసినప్పుడు మోకాలి వెనుక భాగంలో ఉండే 'పెరోనియల్ నెర్వ్'పై ఒత్తిడి పడుతుంది. దీనివల్ల పాదాలు మొద్దుబారిపోవడం లేదా 'పిన్స్ అండ్ నీడిల్స్' లాంటి అనుభూతి కలుగుతుంది. దీర్ఘకాలంలో ఇది నరాల బలహీనతకు దారితీయవచ్చు.

3. వెన్నునొప్పి, పోశ్చర్ సమస్యలు:

ఇలా కూర్చోవడం వల్ల పెల్విస్ భాగం ఒక వైపునకు వంగుతుంది. దీనివల్ల వెన్నెముకపై అదనపు ఒత్తిడి పడి నడుము నొప్పి, మెడ నొప్పి వచ్చే అవకాశం ఉంది. ఇది శరీర ఆకృతిని కూడా దెబ్బతీసే అవకాశముంది.

4. వారికోస్ వీన్స్:

ఎక్కువ సేపు కాళ్లు క్రాస్ చేసి కూర్చోవడం వల్ల కాళ్లలోని రక్తనాళాల్లో రక్తం నిలిచిపోయే ప్రమాదం ఉంటుంది. దీనివల్ల నరాలు ఉబ్బి, నీలం రంగులోకి మారే 'వారికోస్ వీన్స్' సమస్య వచ్చే అవకాశం ఉందని కొన్ని పరిశోధనలు చెబుతున్నాయి.

నిపుణులు ఏం చెబుతున్నారు?

• కూర్చున్నప్పుడు రెండు పాదాలు నేలకు సమాంతరంగా ఆనించి కూర్చోవడం వెన్నెముకకు, రక్త ప్రసరణకు శ్రేయస్కరం. ఒకవేళ కాలు మీద కాలు వేసుకుని కూర్చొన్నా.. కాసేపటికి కాళ్లను మార్చాలి లేదా సాధారణ స్థితికి రావాలి.

• ప్రతి 30 నుంచి 45 నిమిషాలకు ఒకసారి సీటులో నుంచి లేచి 2 నిమిషాల పాటు అటు ఇటు నడవాలి. దీనివల్ల రక్త ప్రసరణ మెరుగుపడుతుంది.

• వెన్నెముకకు సరైన సపోర్ట్ ఇచ్చే కుర్చీలను వాడటం వల్ల కాలు మీద కాలు వేయాలనే కోరిక తగ్గుతుంది.

• ఎట్టి పరిస్థితుల్లో గంటల తరబడి కాలుమీద కాలు వేసుకుని కూర్చోవడం మంచిది కాదని నిపుణులు చెబుతున్నారు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఆఫీసులో గంటల తరబడి కూర్చుంటున్నారా? మీ ఆరోగ్యం ప్రమాదంలో ఉన్నట్టే!

ప్రకృతి ప్రసాదించిన యాంటీ బయాటిక్స్.. రోగనిరోధక శక్తిని పెంచే 'సూపర్ మసాలాలు' ఇవే!

For More Latest News