వైట్ షుగర్ కంటే బ్రౌన్ షుగర్ మంచిదా?

ఇంటర్నెట్ డెస్క్: ఈ రోజుల్లో చాలా మంది వైట్ షుగర్‌కు బదులుగా బ్రౌన్ షుగర్ ఉపయోగిస్తున్నారు. బ్రౌన్ షుగర్ ఆరోగ్యానికి మంచిదని, బరువు తగ్గడంలో సహాయపడుతుందని చాలామంది భావిస్తారు. కానీ, నిజంగా వైట్ షుగర్ కంటే బ్రౌన్ షుగర్ మంచిదా? ఈ రెండింటి మధ్య తేడా ఏమిటి? ఏది ఆరోగ్యానికి ఎక్కువ ప్రయోజనాలను ఇస్తుందో చూద్దాం..

వైట్ షుగర్‌, బ్రౌన్ షుగర్ మధ్య తేడా

వైట్ షుగర్‌ను పూర్తిగా శుద్ధి చేసి తయారు చేస్తారు. అందువల్ల అది తెల్లగా కనిపిస్తుంది. బ్రౌన్ షుగర్‌లో మాత్రం కొద్దిగా మొలాసిస్ (చెరకు రసం నుంచి మిగిలే పదార్థం) ఉంటుంది. అందుకే అది గోధుమ రంగులో ఉంటుంది. అలాగే, బ్రౌన్ షుగర్ రుచి కూడా వైట్ షుగర్‌తో పోలిస్తే కొద్దిగా భిన్నంగా ఉంటుంది.

బ్రౌన్ షుగర్ ఆరోగ్యానికి మంచిదేనా?

బ్రౌన్ షుగర్‌లో ఐరన్, పొటాషియం వంటి ఖనిజాలు ఉంటాయని చాలామంది అనుకుంటారు. కానీ వాటి పరిమాణం చాలా తక్కువగా ఉంటుందని నిపుణులు చెబుతున్నారు. అందువల్ల, బ్రౌన్ షుగర్ తినడం వల్ల ప్రత్యేకమైన ఆరోగ్య ప్రయోజనాలు లభించవు. బ్రౌన్ షుగర్‌లో కేలరీలు తక్కువగా ఉంటాయని ఒక అపోహ ఉంది. కానీ నిజానికి బ్రౌన్ షుగర్, వైట్ షుగర్‌ రెండింటిలో కూడా కేలరీలు దాదాపు సమానంగానే ఉంటాయి. కాబట్టి బరువు తగ్గాలనుకునేవారు ఈ రెండింటినీ పరిమితంగా తీసుకోవడం మంచిది.

రక్తంలో చక్కెరపై ప్రభావం

బ్రౌన్ షుగర్ అయినా, వైట్ షుగర్‌ అయినా రక్తంలో చక్కెర స్థాయిని పెంచుతాయి. అందుకే మధుమేహం ఉన్నవారు ఈ రెండింటినీ ఎక్కువగా తీసుకోకూడదని వైద్యులు సూచిస్తున్నారు.

ఏది మంచిది?

ఏ రూపంలోనైనా చక్కెర ఎక్కువగా తీసుకోవడం ఆరోగ్యానికి మంచిది కాదు. కాబట్టి చక్కెర పరిమాణాన్ని తగ్గించాలి. సహజ తీపి పదార్థాలు తీసుకోవాలి. ఖర్జూరాలు, పండ్లు వంటి వాటిని తీసుకోవడం మంచిది. బ్రౌన్ షుగర్.. వైట్ షుగర్‌ కంటే కొంచెం భిన్నంగా ఉన్నా, ఆరోగ్యపరంగా పెద్దగా తేడా లేదు. ఆరోగ్యంగా ఉండాలంటే చక్కెర తీసుకునే పరిమాణాన్ని తగ్గించడం మంచిదని నిపుణులు చెబుతున్నారు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఆఫీసులో గంటల తరబడి కూర్చుంటున్నారా? మీ ఆరోగ్యం ప్రమాదంలో ఉన్నట్టే!

ప్రకృతి ప్రసాదించిన యాంటీ బయాటిక్స్.. రోగనిరోధక శక్తిని పెంచే 'సూపర్ మసాలాలు' ఇవే!

For More Latest News