షుగర్ పేషంట్స్ మామిడిపండు తినొచ్చా?

ఇంటర్నెట్ డెస్క్: వేసవికాలం అంటే చాలా మందికి ముందుగా గుర్తుకు వచ్చేది మామిడి పండ్లే. చిన్నవాళ్ల నుంచి పెద్దల వరకు అందరూ మామిడి పండ్లను ఎంతో ఇష్టంగా తింటారు. పండిన మామిడి పండ్లను ముక్కలుగా కోసుకుని తినడం ఒక అద్భుతమైన అనుభూతి. అయితే, మామిడి పండ్లు తిన్న తర్వాత మొటిమలు రావడం, బరువు పెరగడం, రక్తంలో చక్కెర పెరగడం, ఎసిడిటీ వంటి సమస్యలు వస్తాయని కొందరు భయపడుతుంటారు.

ఆయుర్వేదం ప్రకారం, మన శరీరంలోని వాత, పిత్త, కఫ దోషాలు సమతుల్యంలో ఉండేలా ఆహారం తీసుకోవాలి. మామిడి పండును సరైన విధంగా తింటే ఈ సమస్యలను సులభంగా నివారించవచ్చు. మామిడి పండులో పలు రకాల పోషకాలు ఉన్నాయి. విటమిన్ A, విటమిన్ C, విటమిన్ E పుష్కలంగా ఉంటాయి. ఇవి రోగనిరోధక శక్తిని పెంచడానికి, చర్మ ఆరోగ్యానికి ఎంతో మేలు చేస్తాయి. అంతేకాకుండా, ఇందులో విటమిన్ B6, ఫోలేట్ (Folate), కెరోటినాయిడ్లు కూడా ఉంటాయి. ఇవి శరీర కణాల అభివృద్ధికి, కంటి చూపు మెరుగుపడటానికి సహాయపడతాయి.

మామిడి పండు తినే సరైన పద్ధతి

• ముందుగా మామిడి పండును తినే ముందు 2–3 గంటలు నీటిలో నానబెట్టడం మంచిది. ఇలా చేస్తే పండులోని వేడి తగ్గుతుంది. ఫైటిక్ యాసిడ్ తగ్గుతుంది. మొటిమలు, కడుపు నొప్పి సమస్యలు తగ్గుతాయి.

• మామిడి పండును భోజనంతో కలిపి తినడం మంచిది కాదు. ఇలా చేస్తే జీర్ణక్రియ సరిగ్గా జరగదు. గ్యాస్, ఉబ్బరం, మొటిమలు రావచ్చు. భోజనం చేసిన 2–3 గంటల తర్వాత లేదా భోజనం ముందు ఒక గంటకు తినడం మంచిది.

• మధుమేహం ఉన్నవారు మామిడి పండ్లను మితంగా తీసుకోవడం, సరైన సమయంలో తినడం చాలా ముఖ్యం. రోజుకు 100-150 గ్రాముల కంటే ఎక్కువ తీసుకోకూడదు. ఒక చిన్న మామిడి పండులో సగం లేదా రోజుకు 1-2 ముక్కలు సరిపోతాయి. ఖాళీ కడుపుతో తింటే రక్తంలో చక్కెర స్థాయిలు వేగంగా పెరుగుతాయి. ఆహారం తీసుకున్న 1-2 గంటల తర్వాత తినడం మంచిది. ముఖ్యంగా మధ్యాహ్న భోజనానికి, సాయంత్రం స్నాక్స్‌కి మధ్యలో తీసుకోవడం మంచిది.

• మామిడి జ్యూస్ కంటే పండును నేరుగా తినడం మంచిదని నిపుణులు చెబుతున్నారు. ఎందుకంటే జ్యూస్‌లో పీచుపదార్థం తగ్గిపోతుంది. షుగర్ లెవల్స్ వేగంగా పెరుగుతాయి. జీర్ణక్రియపై ప్రభావం పడుతుంది.

• మధుమేహం ఉన్నవారు మామిడి పండ్లు పూర్తిగా మానాల్సిన అవసరం లేదు. సరైన విధంగా, సరైన సమయంలో, మితంగా తింటే ఆరోగ్యానికి చాలా ఉపయోగకరం. ఆయుర్వేద సూచనలు పాటిస్తే మొటిమలు, షుగర్, ఎసిడిటీ వంటి సమస్యలు దూరంగా ఉంటాయని నిపుణులు సూచిస్తున్నారు.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

ఆఫీసులో గంటల తరబడి కూర్చుంటున్నారా? మీ ఆరోగ్యం ప్రమాదంలో ఉన్నట్టే!

ప్రకృతి ప్రసాదించిన యాంటీ బయాటిక్స్.. రోగనిరోధక శక్తిని పెంచే 'సూపర్ మసాలాలు' ఇవే!

For More Latest News