మురసు తుఫాన్.. ప్రాణ నష్ట నివారణే తొలి ప్రాధాన్యం: సీఎం చంద్రబాబు

అమరావతి, నవంబర్ 3: మురసు తుఫాన్ ప్రభావం, ప్రస్తుత పరిస్థితిపై ఉన్నతాధికారులు, జిల్లా కలెక్టర్లతో ముఖ్యమంత్రి చంద్రబాబు టెలికాన్ఫరెన్స్ నిర్వహించారు. తుఫాన్ తదనంతర పరిస్థితులను ఎదుర్కొనేందుకు తీసుకోవాల్సిన చర్యలపై అధికారులకు నిర్దేశం చేశారు. తాగునీరు, విద్యుత్ సరఫరా, రహదారుల కనెక్టివిటీపై ప్రధానంగా దృష్టి సారించాలన్నారు. ఎక్కడా ప్రాణ నష్టం జరగకుండా చూడడం ప్రథమ ప్రాధాన్యమన్నారు. ప్రజలు తుఫాన్ ప్రభావం తగ్గే వరకు ప్రభుత్వ సూచనలు పాటించాలని తెలిపారు. చివరి వ్యక్తికీ సహాయం అందే వరకు యంత్రాంగం విశ్రమించవద్దని ముఖ్యమంత్రి స్పష్టం చేశారు.

ఆ 5 గంటలు కీలకం...

ఈరోజు రాత్రికి తుఫాన్ తీవ్రత పూర్తిగా తగ్గే అవకాశం ఉందని సీఎం అన్నారు. ప్రకాశం, బాపట్లలో వర్షపాతం మరింత పెరిగిందని.. వచ్చే 4 నుంచి 5 గంటలు కీలకమని వెల్లడించారు. బాపట్ల, గుంటూరు, ప్రకాశం, పల్నాడు, కృష్ణా, ఎన్టీఆర్, ఏలూరు, పశ్చిమగోదావరి జిల్లాల్లో వర్షాలు కొనసాగుతాయన్నారు. 21 పట్టణ ప్రాంతాల్లో ఎక్కువుగా వర్షపాతం నమోదవుతోందని తెలిపారు. ఈరోజు సాయంత్రం వరకు ఎవరూ బయటకు వెళ్లకుండా జాగ్రత్తగా ఉండాలని సూచించారు.

పునరుద్ధరణ పనుల్లో వేగం పెంచాలి

జిల్లాల కలెక్టర్లను, మున్సిపల్ కమిషనర్లను అప్రమత్తం చేసి... క్షేత్రస్థాయిలో యంత్రాంగాన్ని సిద్ధం చేయాలని సీఎం ఆదేశించారు. డాక్టర్ అంబేద్కర్ కోనసీమ జిల్లాలో నిన్న రాత్రి వర్షం పడినప్పటికీ ఈరోజు సాధారణ పరిస్థితి నెలకొందన్నారు. చెరువులు, రిజర్వాయర్లు, వాగులు ఏవీ ప్రమాదకర స్థాయిలో లేకున్నా... నిరంతరం అప్రమత్తంగా ఉండాలని తెలిపారు. వర్షం నీరు వృధా కాకుండా సమర్ధనీటి నిర్వహణ చర్యలు చేపట్టాలన్నారు. విద్యుత్ సరఫరాకు అంతరాయం కలిగిన ప్రకాశం, బాపట్ల జిల్లాలో యుద్ధప్రాతిపదికన చర్యలు తీసుకోవాలని చెప్పారు. ప్రజలకు ఇబ్బందులు కలుగకుండా పునరుద్ధరణ పనులు వేగంగా చేయాలన్నారు. తుఫాన్ సమయంలో అధికారుల నుంచి క్షేత్రస్థాయి వరకు అందరూ అద్భుతంగా పనిచేశారని ప్రశంసిస్తూ.. అందరికీ సీఎం చంద్రబాబు అభినందనలు తెలియజేశారు.

తుఫాన్ బాధితుల్లో సానుకూల స్పందన: అధికారులు

క్షేత్రస్థాయిలో సిబ్బంది, యంత్రాంగం తక్షణ స్పందనతో తుఫాన్‌ బాధితుల్లో సానుకూల స్పందన వస్తున్నట్లు సీఎంకు అధికారులు తెలిపారు. ఒంగోలు-బాపట్లకు సమీపంలో 120 కి.మీ.వేగంతో తుఫాన్ పయనిస్తోందన్నారు. ఒంగోలులో పలుచోట్ల పడిపోయిన చెట్లను వెంటనే క్లియర్ చేసినట్టు జిల్లా కలెక్టర్ తెలిపారు. నెల్లూరు జిల్లాలో వ్యవసాయ భూముల్లో నీరు నిలవకుండా చర్యలు చేపట్టి పంటలు దెబ్బతినకుండా చూస్తున్నామని కలెక్టర్ చెప్పారు. పల్నాడు, మార్కాపురం, గుంటూరు జిల్లాలో పలుచోట్ల నిలిచిపోయిన విద్యుత్ సరఫరాను పునరుద్ధరించామని సీఎంకు అధికారులు తెలియజేశారు.

ఇవి కూడా చదవండి..

ఏపీలో మరో నాలుగు రోజులు భారీ వర్షాలు.. 7 జిల్లాలకు అత్యంత భారీ వర్ష సూచన

మద్యం స్కామ్ కేసులో అంబటి రాంబాబుకు ఈడీ నోటీసులు.. రేపు విచారణ

Read Latest AP News And Telugu News