Asia Cup 2025 New Timings: ఆసియా కప్ 2025 మ్యాచ్ టైమింగ్స్లో మార్పు.. ఇండియా టీమ్ రెడీ
ABN , Publish Date - Aug 30 , 2025 | 08:36 PM
ఆసియా కప్ 2025 మ్యాచుల గురించి కీలక అప్డేట్ వచ్చింది. మొత్తం 19 మ్యాచుల్లో 18 మ్యాచుల సమయాలను మార్పు చేశారు. అక్కడ ఉన్న వేడి కారణంగా ఈ నిర్ణయం తీసుకున్నట్లు ప్రకటించారు.
ఆసియా కప్ 2025 గురించి సరికొత్త అప్డేట్ వచ్చేసింది. ఈ సారి టోర్నమెంట్ యూఏఈలో జరగనుంది. కానీ వేడి వాతావరణం కారణంగా మ్యాచ్ టైమింగ్స్లో మార్పులు చేశారు. 19 మ్యాచ్లలో 18 మ్యాచ్ల షెడ్యూల్ను అరగంట ముందుకు జరిపారు (Asia Cup 2025 New Timings). ఒక్క యూఏఈ vs ఒమన్ మ్యాచ్ (సెప్టెంబర్ 15) మినహా, మిగతా అన్ని మ్యాచ్లు కొత్త టైమింగ్స్తో జరుగుతాయి.
ఫైనల్ మ్యాచ్ కూడా..
సాధారణంగా సాయంత్రం 7 గంటలకు మొదలయ్యే మ్యాచ్లు ఇప్పుడు గల్ఫ్ స్టాండర్డ్ టైమ్ ప్రకారం సాయంత్రం 6:30కి స్టార్ట్ అవుతాయి. అంటే, భారత కాలమానం ప్రకారం రాత్రి 8 గంటలకు డే నైట్ మ్యాచ్లు ప్రారంభమవుతాయి. సెప్టెంబర్ 28న జరిగే ఫైనల్ మ్యాచ్ కూడా ఈ కొత్త టైమింగ్లోనే ఉంటుంది. యూఏఈ vs ఒమన్ మ్యాచ్ మాత్రం అబుధాబిలో జరిగే ఏకైక డే మ్యాచ్గా నిలిచింది.
T20 వరల్డ్ కప్కు రిహార్సల్
ఈ ఆసియా కప్ 2025 టోర్నమెంట్ 2026 T20 వరల్డ్ కప్కు ఒక రిహార్సల్ లాంటిది. ఈ టోర్నమెంట్లో పాల్గొనే ఎనిమిది జట్లలో ఐదు జట్లు (ఇండియా, పాకిస్తాన్, శ్రీలంక, బంగ్లాదేశ్, ఆఫ్ఘనిస్తాన్) వచ్చే ఏడాది వరల్డ్ కప్లో ఆడబోతున్నాయి. అందుకే, ఈ టోర్నమెంట్ ఈ జట్లకు చాలా కీలకం. ఇండియా, పాకిస్తాన్ లాంటి టీమ్స్ ఇక్కడ బాగా ఆడితే, వరల్డ్ కప్కు మంచి జోష్ లభిస్తుంది.
ఇండియా గ్రూప్ Aలో
ఇండియా ఈ సారి గ్రూప్ Aలో ఉంది. ఈ గ్రూప్లో పాకిస్తాన్, యూఏఈ, ఒమన్ ఉన్నాయి. ఇండియా తమ క్యాంపెయిన్ను సెప్టెంబర్ 10న యూఏఈతో మ్యాచ్తో మొదలుపెడుతుంది. ఆ తర్వాత, అందరూ ఎదురుచూసే ఇండియా vs పాకిస్తాన్ హై-వోల్టేజ్ మ్యాచ్ సెప్టెంబర్ 14న జరగబోతోంది. గ్రూప్ దశలో ఇండియా చివరి మ్యాచ్ సెప్టెంబర్ 19న ఒమన్తో ఉంటుంది.
సూపర్ ఫోర్ దశకు..
ప్రతి గ్రూప్ నుంచి రెండు జట్లు సూపర్ ఫోర్ దశకు అర్హత సాధిస్తాయి. అక్కడ కూడా రౌండ్-రాబిన్ ఫార్మాట్లో మ్యాచ్లు జరుగుతాయి. ఒకవేళ ఇండియా, పాకిస్తాన్ రెండూ సూపర్ ఫోర్కు వెళ్తే, సెప్టెంబర్ 21న మరోసారి ఇండియా vs పాకిస్తాన్ మ్యాచ్ చూసే ఛాన్స్ ఉంది. రెండు జట్లూ ఫైనల్కు చేరితే, మరో థ్రిల్లింగ్ ఫైట్ ఖాయమని చెప్పవచ్చు.
సూర్యకుమార్ యాదవ్ కెప్టెన్
ఇండియా ఇప్పటికే తమ 15 మంది సభ్యుల జట్టును ప్రకటించింది. సూర్యకుమార్ యాదవ్ ఈ సారి కెప్టెన్గా బాధ్యతలు చేపట్టాడు. టెస్ట్ స్కిప్పర్ శుభ్మన్ గిల్ వైస్ కెప్టెన్గా ఉంటాడు. జట్టులో అభిషేక్ శర్మ, తిలక్ వర్మ, హార్దిక్ పాండ్యా, శివమ్ దూబె, అక్షర్ పటేల్, జితేష్ శర్మ (వికెట్ కీపర్), జస్ప్రీత్ బుమ్రా, అర్ష్దీప్ సింగ్, వరుణ్ చక్రవర్తి, కుల్దీప్ యాదవ్, సంజు శాంసన్ (వికెట్ కీపర్), హర్షిత్ రాణా, రింకూ సింగ్ ఉన్నారు. శ్రేయస్ అయ్యర్, యశస్వి జైస్వాల్ లాంటి ప్లేయర్లు ఈ జట్టులో చోటు దక్కించుకోలేదు.
ఎందుకు ఈ టోర్నమెంట్ స్పెషల్?
ఆసియా కప్ అంటే ఒక ఎమోషన్ అని చెప్పవచ్చు. ముఖ్యంగా ఇండియా-పాకిస్తాన్ మ్యాచ్లు అభిమానులకు పండగ లాంటివి. ఈ సారి యూఏఈలోని వేడి వాతావరణం కారణంగా టైమింగ్స్ మారినా, ఉత్సాహం మాత్రం అలాగే ఉంటుందని చెప్పవచ్చు. సూర్యకుమార్ లీడర్గా, యంగ్ టీమ్తో టీమిండియా ఈ టోర్నమెంట్లో ఎలా రాణిస్తుందో చూడాలి మరి.
ఇవి కూడా చదవండి
సెప్టెంబర్ 2025లో బ్యాంక్ సెలవుల పూర్తి లిస్ట్..ఎన్ని రోజులు వచ్చాయంటే..
అర్జెంటుగా డబ్బు అవసరం.. పర్సనల్ లోన్ తీసుకోవాలా? గోల్డ్ బెటరా?
మరిన్ని జాతీయ, తెలుగు వార్తల కోసం క్లిక్ చేయండి
