Kashmir Kulgam Encounter: జమ్మూ కశ్మీర్‌ కుల్గాం జిల్లాలో ఎన్‌కౌంటర్..ఓ ఉగ్రవాది మృతి, జవానుకు గాయాలు

జమ్మూ కశ్మీర్‌లో (Jammu and Kashmir) మళ్లీ ఉద్రిక్త వాతావరణం చోటుచేసుకుంది. సోమవారం (సెప్టెంబర్ 8) కుల్గాం జిల్లాలో భద్రతా బలగాలు, ఉగ్రవాదులకు మధ్య ఉదయం నుంచి ఎన్‌కౌంటర్ (Encounter) కొనసాగుతోంది. ఈ ఘటనలో ఓ ఉగ్రవాది మరణించగా, మరో జవానుకు గాయాలయ్యాయి.

కుల్గాం జిల్లాలోని గుడ్డర్ అడవి ప్రాంతంలో ఉగ్రవాదులు ఉన్నారని సమాచారంతో భద్రతా బలగాలు ఆ ప్రాంతంలో సెర్చ్ ఆపరేషన్ మొదలుపెట్టాయి. ఈ సెర్చ్ ఆపరేషన్ ఒక్కసారిగా ఎన్‌కౌంటర్‌గా మారిపోయింది. ఎందుకంటే, అక్కడ దాక్కున్న ఉగ్రవాదులు భద్రతా బలగాలపై కాల్పులు జరిపారు. వెంటనే స్పందించిన మన జవాన్లు కూడా దీటుగా బదులిచ్చారు.

మరిన్ని వివరాలు..

కాశ్మీర్ జోన్ పోలీసులు ఈ విషయాన్ని X పోస్ట్‌లో ధృవీకరించారు. కచ్చితమైన సమాచారం ఆధారంగా, కుల్గాంలోని గుడ్డర్ అడవిలో ఎన్‌కౌంటర్ ప్రారంభమైంది. జమ్మూ కశ్మీర్ పోలీసులు, ఎస్‌ఓజీ, ఆర్మీ, సీఆర్‌పీఎఫ్ బృందాలు ఈ ఆపరేషన్‌లో పాల్గొన్నాయి. మరిన్ని వివరాలు త్వరలో వెల్లడిస్తామని తెలిపారు. ఈ ఆపరేషన్ ఇంకా కొనసాగుతోంది.

పాకిస్తానీ చొరబాటుదారుడు అరెస్ట్

ఇదే సమయంలో జమ్మూ ఆర్‌ఎస్ పురా సెక్టార్‌లోని అంతర్జాతీయ సరిహద్దు (IB) వద్ద మరో ఘటన చోటు చేసుకుంది. ఆదివారం రాత్రి 9:20 గంటల సమయంలో బీఎస్‌ఎఫ్ జవాన్లు ఒక చొరబాటుదారుడిని గుర్తించారు. అతడు పాకిస్తాన్ పంజాబ్ ప్రావిన్స్‌లోని సర్గోధా నివాసి సిరాజ్ ఖాన్‌గా తేలింది. బీఎస్‌ఎఫ్ జవాన్లు అతడిని పట్టుకునేందుకు ప్రయత్నించగా పారిపోయే ప్రయత్నం చేశాడు. వెంటనే కొన్ని రౌండ్లు కాల్పులు జరిపిన బీఎస్‌ఎఫ్, అతడిని సరిహద్దు కంచె వద్ద అదుపులోకి తీసుకుంది.

మన భద్రతా బలగాల శక్తి

అతడి వద్ద నుంచి కొంత పాకిస్తాన్ కరెన్సీ స్వాధీనం చేసుకున్నారు అధికారులు. ఇప్పుడు అతడిని విచారిస్తున్నారు. అతడు భారత భూభాగంలోకి ఎందుకు చొరబడాలని ప్రయత్నించాడు అనే విషయం తేలాల్సి ఉంది.

ఈ రెండు ఘటనలు మన భద్రతా బలగాల సమర్థతను, అప్రమత్తతను చాటి చెబుతున్నాయి. ఒక వైపు ఉగ్రవాదులతో పోరాడుతూ, మరోవైపు సరిహద్దులను కాపాడుతున్నారు మన జవాన్లు. కుల్గాం ఎన్‌కౌంటర్ గురించి మరిన్ని వివరాలు తెలియాల్సి ఉంది.

ఇవి కూడా చదవండి

మరో స్కామ్‌ అలర్ట్.. మీ డబ్బు, ఫోన్‌ను ఇలా కాపాడుకోండి

సెప్టెంబర్ 2025లో బ్యాంక్ సెలవుల పూర్తి లిస్ట్..

మరిన్ని జాతీయ, తెలుగు వార్తల కోసం క్లిక్ చేయండి