ఎన్నారై డెస్క్: ప్రపంచంలో ఎక్కడా దొరకని మంచి రుచికరమైన ఆహార పదర్థాలు (Tasty Foods) మన దగ్గర దొరుకుతాయనడంలో ఎలాంటి సందేహం లేదు. మన భారతీయ ఫుడ్స్‌కు మించిన ఆహారాలు మన దగ్గర తప్ప వేరే దేశాల్లో పెద్దగా దొరకవనే చెప్పాలి. ఈ కారణంగానే విదేశాల్లో నివసించేవారు స్వదేశం నుంచి వచ్చే ఎవరైనా మన ఆహార పదర్థాలు తెస్తే బాగుండు అని ఎప్పుడు కోరుకుంటారు. ఇదిగో ఇదే కోవకు చెందినవారు యూకే రాజధాని నగరం లండన్‌ (London) లో నివాసం ఉండే భార్యాభర్త కరిష్మా, రికిన్. ఈ ఎన్నారై దంపతులకు ఇండియన్ ఫుడ్ అంటే మహా ఇష్టం. అందుకే స్వదేశం నుంచి వస్తున్న వారి మిత్రులను కొన్ని భారతీయ మసాలాలు, స్నాక్స్ తీసుకురావాల్సిందిగా చెప్పారు.

అయితే, స్నేహితులు వారిని సర్ ప్రైజ్ చేశారు. ఆ జంట అడిగిన వాటికంటే ఎక్కువ ఫుడ్ ఐటమ్స్ (Food Items) తీసుకువచ్చారు. వాటిని ఒక బ్రీఫ్‌కేసులో ప్యాక్ చేసి గిఫ్ట్ రూపంలో అందించారు. అంతే.. ఆ ఫుడ్ ఐటమ్స్‌తో కూడిన గిఫ్ట్ బాక్స్‌ను అందుకుని, దాన్ని తెరిచి చూసిన తర్వాత వారి ఆనందం చూడాలి. వారి ఆనందాన్ని వర్ణించడం మాటల్లో కష్టం. స్నేహితుల నుంచి వారు అందుకున్న ఆ గిఫ్ట్ బాక్స్‌లో కుర్కురే, సేవ్ ఖమ్మి, గరం మసాలా, కశ్మీరీ రెడ్ చిల్లీ, మ్యాగీ, ఆలూ భుజియా, లేస్, వంటివి చాలా ఉన్నాయి. ఇక ఆ బ్రీఫ్‌కేసును తెరుస్తున్న సమయంలో ఈ దంపతులు ఒక వీడియో తీశారు. ఆ తర్వాత దాన్ని ఇన్‌స్టాగ్రామ్‌లో పోస్ట్ చేశారు. దాంతో అది కాస్తా వైరల్‌గా మారింది. ఈ దేశీ ఫుడ్స్ (Desi Foods) గిఫ్ట్‌గా ఇచ్చినందుకు వారి స్నేహితులకు ధన్యవాదాలు తెలియజేశారు. అంతేకాదండోయ్ ఆ జంట వారి మిత్రులు ఇచ్చిన ఆ గిఫ్ట్ బాక్స్‌కు 'ఆనందంతో నిండిన బ్రీఫ్‌కేస్' అని పేరు కూడా పెట్టేశారు.

ఇక ఈ వీడియోపై నెటిజన్లు తమదైనశైలిలో స్పందిస్తున్నారు. ఆ జంట భావాలను అర్థం చేసుకుని భారతీయ ఆహారాన్ని చాలా మిస్ అవుతున్నారని కొంతమంది అన్నారు. మరికొంత మంది మాత్రం విదేశాలలోని భారతీయ స్టోర్లలో కూడా ఈ వస్తువులు దొరుకుతాయని ఉచిత సలహాలు ఇచ్చారు. ఇంకొంత మంది ఈ జంట ఇండియన్ ఫుడ్స్‌ను చూసి ఉత్సాహం వ్యక్తం చేసిన తీరుపై జోకులు పేల్చారు. మీకు సంపాదనే ముఖ్యం.. దాని కోసం మాతృదేశాన్ని వదిలి వెళ్ళిపోతున్నారుగా.. మళ్లీ ఇండియన్ ఫుడ్ మీకెందుకు అని కొంతమంది కామెంట్ చేశారు.

US: గ్రీన్‌కార్డుల కోసం ఎదురుచూస్తున్న వారికి అదిరిపోయే వార్త.. భారతీయులకు భారీ ప్రయోజనం