Jaipur Literature Festival: జైపూర్ లిటరేచర్ ఫెస్టివల్ 17వ ఎడిషన్ షెడ్యూల్ విడుదల

జైపూర్ సాహిత్య ఉత్సవం (జైపూర్ లిటరేచర్ ఫెస్టివల్)కు సంబంధించిన 17వ ఎడిషన్ షెడ్యూల్ విడుదలైంది. 2024 ఫిబ్రవరి 1 నుంచి 5 మధ్య రాజస్థాన్ రాజధాని జైపూర్‌లో గల హోటల్ క్లార్క్స్ అమెర్‌లో ఈ కార్యక్రమం జరగనుంది. 2006 నుంచి ఈ జేఎల్ఎఫ్ (జైపూర్ లిటరేచర్ ఫెస్టివల్) కార్యక్రమం నిర్వహిస్తున్నారు. ఈ క్రమంలోనే ఈ కార్యక్రమంలో పాల్గొనే వక్తల మొదటి జాబితా కూడా విడుదలైంది. ఆనంద్ నీలకంఠన్, ఏంజెలా సైనీ, అనురాధ శర్మ పూజారి, బి.జయమోహన్, బెన్ మెకిన్‌టైర్, బి.ఎన్. గోస్వామి, బ్రియాన్ కాట్లోస్, కేథరీన్ ఆన్ జోన్స్, క్లైర్ రైట్, కోలిన్ థుబ్రోన్, డెబ్రా డైమండ్, దేవిక రేగే, జెఫ్ గూడెల్, జెర్రీ బ్రాటన్, కల్పనా రైనా, మేరీ బార్డ్, మృదులా గార్గ్, నాన్సీ సిల్బర్‌క్లీట్, నీలాంజనా రాయ్, పాట్రిక్ రాడెన్ జే కీఫ్, ఆర్.ఎ. మషేల్కర్, సిద్దార్థ్ శ్రీకాంత్, S. మురళీధర్, టామ్ హాలండ్ జైపూర్ లిటరేచర్ ఫెస్టివల్‌లో పాల్గొననున్నారు.

వాలంటీర్ ప్రోగ్రాం: జైపూర్ లిటరేచర్ ఫెస్టివల్ విజయవంతమైన వాలంటీర్ ప్రోగ్రామ్‌ను నిర్వహిస్తుంది. ఇది యువ ఔత్సాహికులకు సాటిలేని సుసంపన్నమైన అనుభవాన్ని అందిస్తుంది. భారీ స్థాయిలో ఫెస్టివల్‌ను తయారు చేయడం, నిర్వహించడం వంటి వాటిని ప్రత్యక్షంగా చూసేందుకు వీలు కల్పిస్తుంది. ఫెస్టివల్ 25 విభాగాలలో అంకితభావంతో కూడిన 250 మంది వాలంటీర్ల బృందం పని చేస్తుంది. ఈ కార్యక్రమంలో వాలంటీర్‌గా పని చేయాలనుకునేవారు ముందుగా రిజిస్ట్రేషన్ చేసుకోవాల్సి ఉంటుంది. అందుకు అక్టోబర్ 31, 2023 వరకు గడువు ఉంది. ఈ ఫెస్టివల్‌కు హాజరు కావాలనుకునేవారు కూడా ముందుగానే రిజిస్ట్రేషన్ చేసుకోవాల్సి ఉంటుంది. జైపూర్ లిటరేచర్ ఫెస్టివల్ వెబ్‌సైట్ ద్వారా ఆన్‌లైన్‌లో రిజిస్ట్రేషన్ చేసుకోవాలి.

ఈ జైపూర్ లిటరేచర్ ఫెస్టివల్ అనేక రకాల సాహిత్య ఇతివృత్తాలు, ఆలోచనలను అన్వేషించడానికి.. రచయితలు, ఆలోచనాపరులు, వక్తల విభిన్న ప్రపంచ సమాజాన్ని ఏకం చేస్తుంది. మునుపటి సంవత్సరాలలో మాదిరిగానే, ఈ సారి కూడా అనేక భాషలకు సంబంధించిన సాహిత్యంపై సెషన్‌లను నిర్వహిస్తారు. అస్సామీ, హిందీ, కన్నడ, కాశ్మీరీ, మలయాళం, మరాఠీ, ఒడియా, పంజాబీ, తమిళం, ఉర్దూ వంటి అనేక భాషల సాహిత్యంపై సెషన్‌లను ఏర్పాటుచేయనున్నారు. 4 వేదికలలో జరిగే ఈ కార్యక్రమంలో 300 మంది వక్తలు పాల్గొంటారు. 'భూమిపై ఉన్న గొప్ప సాహిత్య ప్రదర్శన'గా వర్ణించబడిన జైపూర్ లిటరేచర్ ఫెస్టివల్ అనేక ఆలోచనల విందు. గత 16 సంవత్సరాలుగా ఇది ప్రపంచ సాహిత్య దృగ్విషయంగా రూపాంతరం చెందింది. ఇప్పటివరకు దాదాపు 2000 మంది వక్తలకు ఆతిథ్యం ఇచ్చింది. భారతదేశం, ప్రపంచవ్యాప్తంగా ఉన్న మిలియన్ల మంది పుస్తక ప్రియులను స్వాగతించింది. ప్రతి సంవత్సరం ఫెస్టివల్‌లో ప్రపంచంలోని గొప్ప గొప్ప రచయితలు, ఆలోచనాపరులు, మానవతావాదులు, రాజకీయ నాయకులు, వ్యాపార నాయకులు, క్రీడాకారులు, వినోదకారులు పాల్గొంటారు.