Share News

పేట్ బషీరాబాద్‌లో వ్యాపారవేత్త అనుమానాస్పద మృతి.. కేసు నమోదు

ABN , Publish Date - Oct 05 , 2026 | 09:05 AM

పేట్ బషీరాబాద్ పోలీస్ స్టేషన్ పరిధిలో ఓ వ్యాపారవేత్త అనుమానాస్పద రీతిలో మృతి చెందడం స్థానికంగా కలకలం రేపింది. ఆ మృతదేహం గుండ్లపోచంపల్లికి చెందిన నేమారామ్ చౌదరిగా పోలీసులు గుర్తించారు.

పేట్ బషీరాబాద్‌లో వ్యాపారవేత్త అనుమానాస్పద మృతి.. కేసు నమోదు

హైదరాబాద్, అక్టోబర్ 05: పేట్ బషీరాబాద్ పోలీస్ స్టేషన్ పరిధిలో ఓ వ్యాపారవేత్త అనుమానాస్పద రీతిలో మృతి చెందడం స్థానికంగా కలకలం రేపింది. ఆ మృతదేహం గుండ్లపోచంపల్లికి చెందిన నేమారామ్ చౌదరిగా పోలీసులు గుర్తించారు. ఈ హత్యపై పోలీసులు కేసు నమోదు చేసి దర్యాప్తు చేపట్టారు. పోలీసుల కథనం ప్రకారం.. నేమారామ్ చౌదరి రెండు రోజుల క్రితం ఇంటి నుంచి రూ.40 లక్షలు తీసుకెళ్లాడు. ఆ తర్వాత అతడి ఆచూకీ తెలియలేదు. ఈ నేపథ్యంలో నేమారామ్ చౌదరి కుటుంబ సభ్యులు పోలీసుకు ఫిర్యాదు చేశారు. దీంతో మిస్సింగ్ కేసును పోలీసులు నమోదు చేసి దర్యాప్తు చేపట్టారు.


ఈ క్రమంలో సోమవారం తెల్లవారుజామున చెరువు కట్టపై నేమారామ్ చౌదరి మృతదేహాన్ని పోలీసులు గుర్తించారు. అయితే అతడి మృతదేహం వద్ద రూ.40 లక్షల కనిపించకపోవడంతో పలు సందేహాలకు తావిస్తోంది. దీంతో హత్య కోణంలో పోలీసులు దర్యాప్తు చేపట్టారు. ఆ నగదు కోసమే అతడిని హత్య చేసి ఉండవచ్చని పోలీసులు భావిస్తున్నారు. ఈ కేసు దర్యాప్తులో భాగంగా.. అతడి కుటుంబ సభ్యులతోపాటు పరిచయస్తులను పోలీసులు ప్రశ్నిస్తున్నారు. మృతుడు నేమారామ్ చౌదరికి భార్యతోపాటు నలుగురు పిల్లలు ఉన్నారు.


వెలుగులోకి కీలక విషయాలు..

ఎల్బీనగర్‌లో నేమారామ్ చౌదరి ఎలక్ట్రికల్ షాపును నిర్వహిస్తూ.. హవాలా వ్యక్తిగా కొనసాగుతున్నాడని తమ విచారణలో వెల్లడైందని పోలీసులు తెలిపారు. అతడి స్వస్థలం రాజస్థాన్ అని చెప్పారు. కుటుంబంతో కలిసి అతడు హైదరాబాద్‌ వచ్చి వ్యాపారం చేసుకుంటున్నాడని పేర్కొన్నారు. అయితే అతడు ఇంటి నుంచి వెళ్లే సమయంలో.. రూ.40 లక్షల నగదు తీసుకెళ్లినట్లు కుటుంబ సభ్యులు తెలిపారని అన్నారు.


మరో వైపు హవాలా నగదు చేతులు మారే క్రమంలో సీసీటీవీ కెమెరాలకు చిక్కకుండా నేమారామ్ తగు జాగ్రత్తలు తీసుకున్నట్లు గుర్తించామని పోలీసులు పేర్కొన్నారు. చివరి సారి ఆల్వాల్ మీ సేవ కేంద్రం వద్ద బైక్‌ను వదిలి నేమారామ్ వెళ్లాడని సీసీటీవీ కెమెరాల ద్వారా గుర్తించామని అన్నారు. ఆ పరిసర ప్రాంతాల్లోని సీసీటీవీ కెమెరాలు ఆధారంగా దర్యాప్తు చేస్తున్నట్లు పోలీసులు వివరించారు.


ఈ వార్తలు కూడా చదవండి..

అనకాపల్లిలో ఘోర రోడ్డు ప్రమాదం.. భార్యాభర్తలు మృతి

ఏపీపీఎస్సీ హాస్టల్ వెల్ఫేర్ ఆఫీసర్ గ్రేడ్-2 పోస్టులు.. రూ.1,15,500 వరకు జీతం

Updated Date - Oct 05 , 2026 | 11:55 AM