విషాదం: భారత క్రికెటర్ రింకు సింగ్ తండ్రి కన్నుమూత..

స్పోర్ట్స్ డెస్క్: టీమిండియా హిట్టర్ రింకు సింగ్(Rinku Singh) ఇంట విషాదం చోటుచేసుకుంది. ఆయన తండ్రి ఖచంద్ర సింగ్ కన్నుమూశారు. గ్రేటర్ నోయిడాలోని యథర్త్ ఆసుపత్రిలో ఆయన తుదిశ్వాస విడిచారు. గతకొంతకాలంగా ఖచంద్ర సింగ్ ఫైనల్ స్టేజ్ కాలేయ క్యాన్సర్‌తో పోరాడుతున్నారు. ఇటీవల ఆయన ఆరోగ్యం క్షీణించడంతో ఆసుపత్రిలో చేర్చారు. తన తండ్రి ఆరోగ్యం విషయమించడంతో ఇటీవలే రింకు సింగ్ అకస్మాత్తుగా టీమిండియాను విడిచిపెట్టి ఇంటికి వెళ్లిన సంగతి తెలిసిందే.

ఖంచంద్ర సింగ్ స్టేజ్-4 లివర్ క్యాన్సర్ కారణంగా ఆరోగ్యం క్షీణించడంతో కొద్ది రోజులుగా ఆస్పత్రిలో చికిత్స పొందుతున్నాడు. వైద్యులు ఆయనను వెంటిలేటర్ సపోర్ట్‌తో చికిత్స అందించారు. పరిస్థితి మరింత విషమించడంతో రీనల్ రీప్లేస్‌మెంట్ థెరపీ (CRRT) కూడా నిర్వహించినట్టు సమాచారం. చివరకు ఇవాళ(ఫిబ్రవరి 27) తెల్లవారుజామున ఖంచంద్ర సింగ్ తుది శ్వాస విడిచారు. టీ-20 ప్రపంచకప్‌లో భారత జట్టులో స్పెషలిస్ట్ బ్యాటర్ అయిన రింకు సింగ్, తన తండ్రి హెల్త్ ఎమర్జెన్సీతో జట్టును వదిలి ఇంటికి వెళ్లాడు.

జింబాబ్వే మ్యాచ్ కు ముందు మంగళవారం చెన్నైలోని ఎంఏ చిదంబరం స్టేడియంలో ఇండియా ప్రాక్టీస్ సెషన్ జరిగింది. అయితే ఈ సెషన్‌కు రింకు సింగ్ హాజరుకాలేదు. దీంతో రింకు జింబాబ్వేతో మ్యాచ్‌కు అందుబాటులో ఉంటాడా లేదా అని అంతా అనుకున్నారు. అయితే ఈ కీలక పోరుకు ముందే రింకు జట్టుతో చేరాడు. కానీ ఈ మ్యాచ్‌లో రింకుకు చోటు లభించలేదు. మరోవైపు ఆసుపత్రిలో చికిత్స పొందుతున్న తండ్రి ఖంచంద్ర సింగ్ చనిపోయారన్న సమాచారం అందుకున్న వెంటనే రింకు సింగ్.. చెన్నై నుంచి తన స్వస్థలానికి బయలుదేరాడు.

28 ఏళ్ల రింకు సాధారణ కుటుంబం నుంచి ఎదిగి భారత జట్టులో స్థానం సంపాదించాడు. జాతీయ జట్టులో చోటు దక్కడంలో తన తండ్రి పాత్ర ఎంతో కీలకమని పలుమార్లు చెప్పుకున్నాడు. కుటుంబానికి అండగా నిలిచిన తండ్రి కోల్పోవడం రింకుకు వ్యక్తిగతంగా పెద్ద లోటు. రింకు తండ్రి మృతిపై సహచర క్రికెటర్లు సంతాపం వ్యక్తం చేశారు. ఈ కష్టకాలంలో రింకుకు సహచర ప్లేయర్లు సానుభూతి తెలుపుతున్నారు. రింకు సింగ్ స్వస్థలం ఉత్తరప్రదేశ్‌లోని అలీగఢ్.

ఇవి కూడా చదవండి:

ఆట అదిరె..ఆశలు నిలిచె!

టీ20 ప్రపంచ కప్ సూపర్ 8: జింబాబ్వేతో కీలక పోరు.. టీమిండియా ఘన విజయం