రోహిత్, కోహ్లీ మాత్రమే కాదు.. 2027 ప్రపంచకప్‌లో అసలైన బలం ఇదే: మహమ్మద్ కైఫ్

ఇంటర్నెట్ డెస్క్: 2027 వన్డే ప్రపంచకప్‌లో భారత జట్టు విజయం సాధించాలంటే రోహిత్ శర్మ, విరాట్ కోహ్లీ వంటి స్టార్ ఆటగాళ్లపై మాత్రమే ఆధారపడకూడదని మాజీ భారత క్రికెటర్ మహమ్మద్ కైఫ్ (Mohammad Kaif) అభిప్రాయపడ్డాడు. ముఖ్యంగా బౌలింగ్, ఫీల్డింగ్ విభాగాలను పటిష్ఠం చేసుకోవాలని సూచించాడు. దక్షిణాఫ్రికాలో జరిగే ప్రపంచకప్‌లో బ్యాటింగ్‌కు అనుకూలమైన పిచ్‌లు ఉండే అవకాశం ఉన్నందున, ప్రత్యర్థి జట్లను కట్టడి చేయగల బౌలింగ్ దళం కీలకమవుతుందని పేర్కొన్నాడు.

'దక్షిణాఫ్రికాలో గతంతో పోలిస్తే పిచ్‌లు బ్యాటింగ్‌కు మరింత అనుకూలంగా మారాయి. బ్యాటర్లు భారీ స్కోర్లు సాధించే పరిస్థితులు ఉండొచ్చు. అలాంటి సమయంలో మెరుగైన బౌలింగ్ దళం ఉన్న జట్టుకు విజయావకాశాలు మెరుగవుతాయి. రోహిత్ శర్మ, విరాట్ కోహ్లీపై అందరి దృష్టి ఉండటం సహజమే. అయితే ప్రపంచకప్‌ను గెలవాలంటే బౌలింగ్, ఫీల్డింగ్ విభాగాల్లోనూ భారత్ మెరుగ్గా రాణించాలి' అని కైఫ్ పేర్కొన్నాడు (India ODI World Cup 2027).

ఒక్క ఆటగాడు మాత్రమే ప్రపంచకప్‌ను గెలిపించలేడని, జట్టులోని మిగిలిన ఆటగాళ్లు కూడా తమ వంతు సహకారం అందించాలని స్పష్టం చేశాడు. 2027 ప్రపంచకప్ కోసం భారత జట్టు పరిగణనలోకి తీసుకోవాల్సిన ఆటగాళ్లలో మహమ్మద్ షమీ (Mohammed Shami) కూడా ఉన్నాడని కైఫ్ అభిప్రాయపడ్డాడు. అంతర్జాతీయ క్రికెట్‌లో అతడికి ఉన్న అనుభవం, కీలక టోర్నీల్లో వికెట్లు తీయగల సామర్థ్యం భారత్‌కు ఉపయోగపడతాయని పేర్కొన్నాడు. దక్షిణాఫ్రికా వంటి పరిస్థితుల్లో అనుభవజ్ఞులైన బౌలర్లు అవసరమని కైఫ్ అభిప్రాయపడ్డాడు.

ఈ వార్తలనూ చదవండి...

నెల్లూరులో ఇళ్ల పట్టాలు పంపిణీ చేసిన సీఎం చంద్రబాబు

రాయలసీమ అభివృద్ధి సభలో రాజకీయాలు వద్దు: పవన్ కల్యాణ్