ఐపీఎల్ 2026 వేళ.. బీసీసీఐ సరికొత్త నిబంధనలు!

ఇంటర్నెట్ డెస్క్: ఇండియన్ ప్రీమియర్ లీగ్ 2026.. మరో నాలుగు రోజుల్లో ప్రారంభం కానుంది. మార్చి 28న ఆర్సీబీ-ఎస్ఆర్‌హెచ్‌తో ఈ మెగా టోర్నీకి తెరలేవనుంది. ఈ నేపథ్యంలో బీసీసీఐ అన్ని ఫ్రాంచైజీలకు కీలక ఆదేశాలు జారీ చేసింది. టోర్నీ ఆరంభానికి ముందే జట్లు పాటించాల్సిన ప్రాక్టీస్ సెషన్లు, పిచ్ నిర్వహణకు సంబంధించి కఠిన మార్గదర్శకాలను విడుదల చేసింది.

ప్రాక్టీస్ సెషన్ రూల్స్..

• ఒక జట్టు ఉపయోగించిన పిచ్‌లు, నెట్స్‌లను ఇతర జట్లు ఉపయోగించకూడదు. ప్రతి సెషన్‌కు తాజాగా సిద్ధం చేసిన పిచ్‌లను తప్పనిసరిగా అందించాలి.

• మ్యాచ్ జరిగే రోజు ప్రాక్టీస్‌కు అనుమతి లేదు. ప్రధాన ప్రాంగణంలో ఎలాంటి ఫిట్‌నెట్ టెస్ట్ జరగదు.

• ప్రాక్టీస్ రోజుల్లో గుర్తింపు పొందిన సిబ్బందిని మాత్రమే డ్రెస్సింగ్ రూమ్, మైదానంలోకి అనుమతిస్తారు.

• ఆటగాళ్ల కుటుంబ సభ్యులు, స్నేహితులు వేరే వాహనంలోనే ప్రయాణించాలి. హాస్పిటాలిటీ ఏరియా నుంచి జట్టు ప్రాక్టీస్‌ను వీక్షించే అవకాశం వీరికి కల్పిస్తారు.

• త్రో డౌన్ స్పెషలిస్ట్, నెట్ బౌలర్లు వంటి అదనపు సహాయక సిబ్బంది జాబితా వివరాలను బీసీసీఐకి సమర్పించాలి. ఆమోదం పొందిన తర్వాతే వీరికి గుర్తింపు పత్రాలు జారీ చేస్తారు.

• ఆటగాళ్లు ప్రాక్టీస్‌కు వచ్చేటప్పుడు టీమ్ బస్‌ను మాత్రమే ఉపయోగించాలి.

మ్యాచ్ డే రూల్స్..

• పీఎంవోఏ నుంచి గుర్తింపు పొందిన సిబ్బంది మ్యాచ్ రోజు తమ ఐడీని తీసుకురావడం తప్పనిసరి.

• ఆరెంజ్, పర్పుల్ క్యాప్ దక్కించుకున్న ప్లేయర్లు.. అవి మ్యాచ్ సమయంలో కచ్చితంగా ధరించాలి.

• మ్యాచ్ అనంతరం బహుమతి ప్రదానోత్సవ కార్యక్రమంలో ఫ్లాపీలు, స్లీవ్ లెస్ జెర్సీలు ధరించేందుకు ఆటగాళ్లకు అనుమతి లేదు. రూల్ పాటించకపోతే తొలిసారి హెచ్చరిక, రెండో సారి జరిమానా విధిస్తారు.

• ప్లేయర్ల జెర్సీ నంబర్లలో మార్పు ఉంటే.. ఆయా ఫ్రాంచైజీలు నిబంధనల ప్రకారం 24 గంటల ముందే ఆ వివరాలు తెలియజేయాలి.

ఇవి కూడా చదవండి:

ఒక కోచ్‌గా గంభీర్‌కు అసలైన సవాళ్లు ముందున్నాయి: సౌరభ్ గంగూలీ

ఐపీఎల్ 2026: సూర్యకు ఎంఐ కెప్టెన్సీ బాధ్యతలు అప్పగించాలి: అశ్విన్