భారత పేసర్ల నుంచి ఇలాంటి ప్రదర్శన ఊహించలేదు: న్యూజిలాండ్ కోచ్ రాంచీ

ఇంటర్నెట్ డెస్క్: భారత పేసర్లు తమ బౌలింగ్‌తో ప్రత్యర్థి బ్యాటర్లకు చుక్కలు చూపిస్తున్నారు. స్వదేశంలో సాధారణంగా ఫ్లాట్ పిచ్‌లపై బౌలింగ్ చేసే మన యువ బౌలర్లు.. న్యూజిలాండ్ పర్యటనలో పిచ్‌లను, అక్కడి పరిస్థితులను అద్భుతంగా ఉపయోగించుకుంటున్నారు. ఇదే విషయంపై కివీస్ బ్యాటింగ్ కోచ్ ల్యూక్ రాంచీ స్పందించాడు. భారత పేసర్లు అదరగొడుతున్నారని ప్రశంసించాడు. మూడో వన్డేకు ముందు మీడియాతో మాట్లాడిన రాంచీ.. భారత బౌలర్ల ప్రదర్శనపై ఆసక్తికర వ్యాఖ్యలు చేశాడు.

‘భారత బౌలర్లు చాలా బాగా బౌలింగ్ చేస్తున్నారు. మా బ్యాటర్లను నిరంతరం పరీక్షిస్తున్నారు. సాధారణంగా ఫ్లాట్ పిచ్‌లపై బౌలింగ్ చేయడానికి అలవాటు పడిన భారత పేసర్లు.. ఇప్పుడు కివీస్ పిచ్‌లపై కూడా రాణిస్తున్నారు. పరిస్థితులను వారికి అనుగుణంగా ఉపయోగించుకుంటున్నారు. ఫ్లాట్ వికెట్లపై బౌలింగ్ చేయడానికి అలవాటు పడిన భారత బౌలర్లు.. ఇక్కడ సరైన లెంగ్త్ ఏది? ఏ లైన్‌లో బౌలింగ్ చేయాలి? బంతి స్వింగ్ అవుతున్నప్పుడు బ్యాటర్లను ఎలా ఇబ్బంది పెట్టాలి? అన్న విషయాలను త్వరగా అర్థం చేసుకున్నారు. మా బ్యాటర్లను సవాల్ చేస్తూ ఆరంభంలోనే వికెట్లు తీస్తూ మిమ్మల్ని కష్టాల్లోకి నెడుతున్నారు. రెండు మ్యాచ్‌ల్లోనూ విభిన్నంగా ప్రభావం చూపించారు. యువ ఆటగాళ్లు జట్టులోకి వచ్చి తమ ప్రతిభను నిరూపించుకోవడం చూడటం చాలా ఆనందంగా ఉంది’ అని రాంచీ పేర్కొన్నాడు.

టెస్టులకు కూడా..

‘సాంకేతికంగా చూస్తే ఈ పిచ్‌లు టెస్టులకు ఉపయోగపడతాయి. ఎందుకంటే న్యూజిలాండ్‌లో సంప్రదాయంగా టెస్టు మ్యాచ్‌లకు పచ్చికతో కూడిన వికెట్లనే సిద్ధం చేస్తాం. వెల్లింగ్టన్‌లోని పిచ్ అయితే పూర్తిగా టెస్టు మ్యాచ్ వికెట్‌లా కనిపించింది. ఇలాంటి పరిస్థితులకు అలవాటు పడటం రెండు జట్లకూ మంచిదే. ప్రస్తుతం బౌలర్లు ఆధిపత్యం చూపిస్తున్నారు. అందులో తప్పేమీ లేదు. ప్రపంచవ్యాప్తంగా ముఖ్యంగా భారత్‌లో కొన్ని సందర్భాల్లో 400 పరుగులు చేయకపోతే జట్లు ఇబ్బందుల్లో పడతాయి. అది కొంచెం విచిత్రంగా అనిపిస్తుంది. బౌలర్లకు కూడా అనుకూల పరిస్థితులు లభించాలి కదా! అయితే పిచ్ సహకరించినంత మాత్రాన సరిపోదు. బౌలర్లు కూడా అద్భుతంగా బౌలింగ్ చేయాలి. ఈ సిరీస్‌లో రెండు జట్ల బౌలర్లు అదే చేస్తున్నారు.

ఈ సిరీస్‌లోని పిచ్‌లు సాధారణ వన్డే వికెట్లలా లేవని రెండు జట్లూ గుర్తించాయి. టీ20 సిరీస్‌లో ఎక్కువ పరుగులు వచ్చాయి. కానీ వన్డేల్లో పరిస్థితులు భిన్నంగా ఉన్నాయి. ఇక్కడ ఏ స్కోరు పోరాడదగినదో బ్యాటర్లు అర్థం చేసుకోవాలి. ప్రతి ఆటగాడు జట్టు కోసం తన వంతుగా ఎలా ఆడాలో నిర్ణయించుకోవాలి. ఈ పిచ్‌లపై 200 పరుగులకే భారీ స్కోర్. ఇలాంటి పిచ్‌లపై తొలి పది ఓవర్లలో ఓవర్‌కు రెండు, మూడు పరుగులు మాత్రమే వచ్చినా ఆందోళన చెందాల్సిన అవసరం లేదు. ప్రశాంతంగా ఉంటూ పరిస్థితులకు తగ్గట్టుగా ఆడాలి’ అని రాంచీ వివరించాడు.

ఇవి కూడా చదవండి:

శాండ్‌పేపర్ వివాదం.. ఖవాజా చెప్పినవన్నీ వందశాతం నిజం: డేవిడ్ వార్నర్

కోహ్లీతో మాట్లాడాలంటే కోచ్‌లే భయపడతారు: ర్యాన్‌టెన్ డస్కటే