మా విజయానికి కారణం వారే: ఇషాన్ కిషన్

స్పోర్ట్స్ డెస్క్: ఐపీఎల్2026లో భాగంగా ఉప్పల్ వేదికగా జరిగిన మ్యాచ్‌లో చెన్నై సూపర్ కింగ్స్‌పై 10 పరుగుల తేడాతో సన్ రైజర్స్ హైదరాబాద్ విజయం సాధించింది. ఈ మ్యాచ్‌లో టాస్ ఓడి.. ముందుగా బ్యాటింగ్ చేసిన ఆరెంజ్ టీమ్ 20 ఓవర్లలో 9 వికెట్ల నష్టానికి 194 పరుగులు చేసింది. అనంతరం సీఎస్కే 20 ఓవర్లలో 8 వికెట్లకు 184 పరుగులే చేసి ఓటమిపాలైంది. తమ లక్ష్యానికి 30 నుంచి 40 పరుగులు తగ్గినా.. యువ బౌలర్ల అసాధారణ ప్రదర్శనతోనే విజయం సాధించామని ఎస్ఆర్‌హెచ్ కెప్టెన్ ఇషాన్ కిషన్ అన్నాడు.

ఈ మ్యాచ్ అనంతరం ఇషాన్ కిషన్ మాట్లాడుతూ... ' మా బౌలర్లు అదరగొట్టారు. యువ బౌలర్లు ప్రణాళికలను సరిగ్గా అమలు చేస్తుంటే కెప్టెన్‌‌కు కలిగే అనుభూతే వేరేగా ఉంటుంది. అందుకే ఈ విజయం ఎంతో సంతోషాన్నిచ్చింది. మా యంగ్ బౌలర్లు స్వయంగా తమ సొంత వ్యూహాలతో మైదానంలోకి వస్తున్నారు. ప్రణాళిక ప్రకారమే బౌలింగ్ చేస్తున్నారు. దీని వల్ల ఫీల్డింగ్ సెట్ చేయడంలో కెప్టెన్‌‌గా నాపై ఒత్తిడి చాలా తగ్గుతుంది. ఈ మ్యాచ్‌లో వారు బౌలింగ్ చేసిన తీరు అద్భుతం' అని బౌలర్లపై ఇషాన్ ప్రశంసల వర్షం కురిపించాడు.

'అభిషేక్ తక్కువ సమయమే ఉన్నప్పటికీ మంచి ఆరంభాన్ని ఇచ్చాడు. సాధారణంగా మేం 220 లేదా 230 పరుగులు చేసినప్పుడల్లా టాప్-3 బ్యాటర్లలో ఎవరో ఒకరు భారీ స్కోరు సాధిస్తారు. ఈ మ్యాచ్‌లో ఆ భారీ ఇన్నింగ్స్ మిస్ అయ్యాం. మాకున్న ఈ బ్యాటింగ్ లైనప్‌ను బట్టి మేం కచ్చితంగా ఒక 30 నుంచి 40 పరుగులు తక్కువ చేశాం. అయితే ఈ మ్యాచ్ నుంచి నేర్చుకోవాల్సింది చాలా ఉంది. షాట్ సెలక్షన్ ఎంపిక విషయంలో మేం ఇంకా మెరుగవ్వాలి. పాయింట్స్ టేబుల్‌ను మేం పట్టించుకోవడం లేదు. ఒక్కో మ్యాచ్‌ను గెలుచుకుంటూ పోవడమే లక్ష్యంగా పెట్టుకున్నాం' అని ఇషాన్ కిషన్ వెల్లడించాడు.

ఇవి కూడా చదవండి:

ఆ ఓవర్లే మా కొంప ముంచాయి: సీఎస్కే కెప్టెన్ రుతురాజ్

సొంత రికార్డును బద్దలుగొట్టిన అభిషేక్ శర్మ.. చెన్నైపై అద్భుత ఇన్నింగ్స్..