ఆసియా క్రీడలు: బాక్సింగ్‌లో లవ్లీనా సంచలనం.. భారత్‌కు మరో పసిడి

ఇంటర్నెట్ డెస్క్: ఆసియా క్రీడలు 2026లో శుక్రవారం భారత్ ఖాతాలో రెండో పసిడి పతకం వచ్చి చేరింది. భారత స్టార్ బాక్సర్ లవ్లీనా బొర్గొహెయిన్‌.. మహిళల 75 కేజీల విభాగంలో స్వర్ణ పతకం సాధించింది. ఫైనల్ పోరులో చైనాకు చెందిన బావో జియీపై సంచలన ప్రదర్శనతో పసిడి పతకాన్ని కైవసం చేసుకుంది. అయితే ఈరోజు లవ్లీనా పుట్టిన రోజు కావడం విశేషం. బర్త్ డే నాడు తనకు తాను గొప్ప బహుమతి ఇచ్చుకోవడమే కాకుండా దేశానికి పతకం అందించిందంటూ అభిమానులు కామెంట్లు పెడుతున్నారు.

ఆసియా క్రీడల్లో లవ్లీనాకు ఇదే తొలి స్వర్ణ పతకం కావడం విశేషం. భారత మహిళల బాక్సింగ్‌ చరిత్రలో ఇది రెండో ఆసియా క్రీడల స్వర్ణం. అంతకుముందు 2014లో దిగ్గజ బాక్సర్‌ మేరీ కోమ్‌ మాత్రమే మహిళల బాక్సింగ్‌లో భారత్‌కు పసిడి పతకాన్ని అందించింది.

ఫైనల్‌ పోరు ఆరంభం నుంచే లవ్లీనా వ్యూహాత్మకంగా బాక్సింగ్‌ చేసింది. ప్రత్యర్థి దాడులను సమర్థంగా ఎదుర్కొంటూ తనకు అనుకూలంగా మ్యాచ్‌ను మలుచుకుంది. ముఖ్యంగా మూడో రౌండ్‌లో లవ్లీనా అద్భుతంగా రాణించింది. బావో జియీకి ఎలాంటి అవకాశం ఇవ్వకుండా ప్రత్యర్థి పంచ్‌లను తప్పించుకుంటూ ఆధిపత్యం ప్రదర్శించింది. మూడో రౌండ్‌లో లవ్లీనా ప్రదర్శనతో బావో జియీకి తిరిగి మ్యాచ్‌లోకి వచ్చే అవకాశం లేకుండా పోయింది. దీంతో జడ్జిలంతా లవ్లీనా వైపే మొగ్గుచూపారు. ఏకగ్రీవ నిర్ణయంతో విజేతగా ప్రకటించడంతో భారత బాక్సర్‌ ఆనందంలో మునిగిపోయింది. ఈ విజయంతో ఆసియా క్రీడలు-2026లో భారత్‌ ఖాతాలో 12 స్వర్ణాలు వచ్చి చేరాయి.

ఇవి కూడా చదవండి:

ఆసియా క్రీడలు: ఆర్చరీలో భారత్‌కు చారిత్రక స్వర్ణం

పెళ్లయ్యాక హనీమూన్‌ కోసం జపాన్‌కే వస్తా: ఇషాన్ కిషన్