‘ఐరిస్ మొబిలిటీ’.. అమెరికాలో తెలుగు యువత అద్భుతం..

హైదరాబాద్ : గాల్లో ఎగిరే విమానమైనా.. ఐటీ సామ్రాజ్యంలో అగ్రగామి కంపెనీలైనా.. అమెరికా గడ్డపై తెలుగువాడి మేధస్సుకు తిరుగులేదని మరోసారి నిరూపితమైంది! అయితే ఈసారి మనవాళ్లు కేవలం సాఫ్ట్‌వేర్ కొలువులకే పరిమితం కాలేదు. ఏకంగా అమెరికా నగరాల ప్రజా రక్షణ (Public Safety) వ్యవస్థలనే రీషేప్ చేసే అద్భుతమైన సాంకేతిక విప్లవానికి తెరలేపారు. టెక్సాస్ రాష్ట్రంలో ప్రతి 57 సెకన్లకు ఒక రోడ్డు ప్రమాదం జరుగుతూ, ఏటా 38,000 మందికి పైగా అమాయకులు బలవుతున్న తరుణంలో.. ఆ మృత్యుఘోషకు అడ్డుకట్ట వేసేందుకు ఇద్దరు 24 ఏళ్ల తెలుగు స్నేహితులు నడుం బిగించారు. ‘ఐరిస్ మొబిలిటీ’ (IRIS Mobility) పేరుతో వారు స్థాపించిన స్టార్టప్, ఇప్పుడు కృత్రిమ మేధ (AI) సాయంతో అమెరికా ర‌హ‌దారుల‌పై వేలాది ప్రాణాల‌ను కాపాడుతోంది.

అసాధారణ ప్రతిభ.. ఉన్నత విద్యాభ్యాసం!

ఈ ప్రతిష్టాత్మక ప్రాజెక్టును ముందుండి నడిపిస్తున్న ఇద్దరు యువ ఆంత్రప్రెన్యూర్లు తమ చిన్న వయసులోనే అంతర్జాతీయ స్థాయిలో గుర్తింపు తెచ్చుకున్నారు. వీరిద్దరి విద్యాభ్యాసం, నేపథ్యం ఎంతో స్ఫూర్తిదాయకం:

మిథిలేష్ రెడ్డి మాది (CEO & CTO): భారతదేశంలో ప్రాథమిక, ఉన్నత విద్యాభ్యాసంలో అద్భుత ప్రతిభ కనబరిచిన మిథిలేష్.. కేవలం 17 ఏళ్ల ప్రాయంలోనే (2019లో) ఒంటరిగా అమెరికాకు వెళ్లారు. ప్రతిష్టాత్మకమైన యూనివర్సిటీ ఆఫ్ మిచిగాన్ (University of Michigan) నుంచి 'కంప్యూటర్ ఇంజినీరింగ్' పూర్తి చేసిన ఆయన, కాలేజీ రోజుల్లోనే కంప్యూటర్ విజన్, ఎడ్జ్ కంప్యూటింగ్ రంగాలపై విశేషమైన పట్టు సాధించారు.

లిఖిత్ ఆదర్శ్ పిచ్చికాల (CPO & CHO): భారతదేశంలో టాప్ ఇన్స్టిట్యూషన్స్ లో చదువుకుని, టెక్నాలజీపై ఉన్న మక్కువతో అమెరికాలో అడుగుపెట్టారు. ప్రొడక్ట్ డిజైనింగ్, హార్డ్‌వేర్ ఆర్కిటెక్చర్‌లో ఈయనకు తిరుగులేని నైపుణ్యం ఉంది. సాఫ్ట్‌వేర్‌తో పాటు హార్డ్‌వేర్ రంగంలో రీసెర్చ్ అండ్ డెవలప్‌మెంట్‌ (R&D)ను ఇరు దేశాల విద్యా ప్రమాణాల అనుభవంతో ఆయన అద్భుతంగా డీల్ చేస్తున్నారు.

క్రమశిక్షణ కలిగిన కుటుంబ నేపథ్యం:

వీరిద్దరూ భారతదేశంలో ఎంతో గౌరవప్రదమైన, క్రమశిక్షణ కలిగిన కుటుంబాల నుంచి వచ్చారు. వీరి తల్లిదండ్రులు ఉన్నత విద్యావంతులు కావడంతో, చిన్నతనం నుంచే సమాజానికి ఉపయోగపడే ఆవిష్కరణలు చేయాలనే తపన వీరిలో నాటుకుంది. మిథిలేష్ ఒంటరిగా విదేశాలకు వెళ్తున్నప్పుడు తల్లిదండ్రులు అందించిన ధైర్యం, లిఖిత్ ఆదర్శ్ ప్రొడక్ట్ ఇన్నోవేషన్ వైపు అడుగులు వేయడానికి వారి పేరెంట్స్ ఇచ్చిన సపోర్ట్.. ఈరోజు వీరిని 24 ఏళ్లకే అమెరికాలో ఒక కంపెనీకి 'చీఫ్ ఎగ్జిక్యూటివ్', 'చీఫ్ ప్రొడక్ట్ ఆఫీసర్' హోదాల్లో నిలబెట్టింది.

కంపెనీలో ఇద్దరి అసాధారణ కంట్రిబ్యూషన్:

ఐరిస్ మొబిలిటీని కేవలం ఒక ఐడియా స్థాయి నుంచి అమెరికా ప్రభుత్వాలే మెచ్చే ప్రాజెక్ట్‌గా మార్చడంలో వీరిద్దరి పాత్ర అత్యంత కీలకం:

మిథిలేష్ రెడ్డి (సాంకేతిక, వ్యాపార లీడర్‌షిప్): కంపెనీ ప్రధాన AI అల్గారిథమ్స్, ప్రొప్రైటరీ మెషిన్ లెర్నింగ్ మోడల్స్ అభివృద్ధికి ఆయనే సూత్రధారి. నగరాల్లోని సాధారణ ట్రాఫిక్ కెమెరాల డేటాను విశ్లేషించి ప్రమాదాలను ముందే పసిగట్టే టెక్నాలజీని ఆయనే డిజైన్ చేశారు. సాంకేతిక విభాగంతో పాటు, అమెరికాలోని నగర మేయర్లు, సిటీ మేనేజర్లు, పోలీస్ చీఫ్‌లతో నేరుగా చర్చలు జరుపుతూ ప్రభుత్వ క్లయింట్‌లను డీల్ చేసే ప్రైమరీ లీడర్‌షిప్‌ను మిథిలేష్ నిర్వహిస్తున్నారు.

లిఖిత్ ఆదర్శ్ (ప్రొడక్ట్, హార్డ్‌వేర్ ఆర్కిటెక్చర్): ఒక రోడ్డు భద్రతా వ్యవస్థ పూర్తి స్థాయిలో పనిచేయాలంటే కేవలం సాఫ్ట్‌వేర్ ఉంటే సరిపోదు, దానికి తగిన హార్డ్‌వేర్ సపోర్ట్ కూడా అంతే ముఖ్యం. చీఫ్ ప్రొడక్ట్ ఆఫీసర్‌గా ప్రొడక్ట్ డిజైన్, సిటీ అవసరాలకు తగ్గట్టుగా ప్రొడక్ట్‌ను కస్టమైజ్ చేసే బాధ్యతలను చూసుకుంటారు. అదేవిధంగా, చీఫ్ హార్డ్‌వేర్ ఆఫీసర్‌గా నగరాల్లో ఉండే ప్రస్తుత ట్రాఫిక్ కెమెరాలు, సిగ్నల్ సిస్టమ్స్, ఎడ్జ్ డివైజ్‌లను కంపెనీ సాఫ్ట్‌వేర్‌తో అనుసంధానించే అత్యాధునిక హార్డ్‌వేర్ నెట్‌వర్క్‌ను ఆయనే స్వయంగా పర్యవేక్షిస్తున్నారు.

మృత్యుకూడళ్లను ముందే పసిగట్టే సాఫ్ట్‌వేర్ ప్రత్యేకతలు:

ఐరిస్ మొబిలిటీ ప్రాజెక్ట్, నగర ప్రభుత్వాలు ఇప్పటికే కలిగి ఉన్న మౌలిక వసతులను ఉపయోగించుకుంటూ వాటికి AI శక్తిని జోడిస్తుంది. రోడ్డుపై ప్రమాదం జరిగిన వెంటనే ఈ సాఫ్ట్‌వేర్ గుర్తించి.. క్షణాల వ్యవధిలో అంబులెన్స్, పోలీసులకు సమాచారాన్ని చేర‌వేస్తుంది. ప్రమాదాలు జరిగాక స్పందించడం కాకుండా, ప్రమాదం జరగడానికి ఆస్కారం ఉన్న 'నియర్-మిస్' సంఘటనలను, వాహనాల వేగం, లేన్ మార్పుల నమూనాలను (Patterns) విశ్లేషించి ప్రమాదం జరిగే ముందే హెచ్చరిస్తుంది.

ఉద్యోగాల సృష్టి.. రిచర్డ్‌సన్ సిటీ ప్రశంసలు:

ఐరిస్ మొబిలిటీ ఇచ్చే డేటా-ఆధారిత నివేదికల వల్ల నగర ప్రభుత్వాలు అమెరికా కేంద్ర ప్రభుత్వం నుంచి మిలియన్ల డాలర్ల 'ఫెడరల్ ఇన్ఫ్రాస్ట్రక్చర్ గ్రాంట్స్' సులభంగా పొందుతున్నాయి. తద్వారా స్థానికంగా ఉండే సిమెంట్ కాంక్రీట్ కార్మికులు, ఎలక్ట్రీషియన్లు, ట్రాఫిక్ ఇంజనీర్లకు కొత్తగా ఉద్యోగాలు లభిస్తున్నాయి. 'మా AI టెక్నాలజీ సాఫ్ట్‌వేర్‌తో మొదలై, రోడ్డుపై కాంక్రీట్ నిర్మాణంతో ముగుస్తుంది.. అంటే ఇది ఉద్యోగాలను సృష్టిస్తోంది' అని ఈ యువ లీడర్స్ చెబుతున్నారు.

టెక్సాస్‌లోని ప్రముఖ నగరమైన రిచర్డ్‌సన్ (Richardson) సిటీ మేనేజర్ డాన్ మాగ్నర్ ఐరిస్ మొబిలిటీ సేవలను అధికారికంగా ప్రశంసించారు. 'మన రోడ్లపై ప్రమాదాలు తగ్గించడానికి, భద్రత పెంచడానికి ఐరిస్ మొబిలిటీ వంటి స్టార్టప్‌లు ఎంతో తోడ్పడుతున్నాయి' అని ఆయన కొనియాడారు.

సాధారణంగా అమెరికాలో ప్రభుత్వ సంస్థలు కొత్త సాంకేతికతను త్వరగా నమ్మవు, కానీ మనవాళ్ల సాఫ్ట్‌వేర్ లాంచ్ అయిన ఏడాదిలోనే టెక్సాస్‌లోని పలు నగరాలు దీనిపై ఆసక్తి చూపిస్తున్నాయి. అమెరికాలో స్థిరపడి, 24 ఏళ్ల చిన్న వయసులోనే సొంతంగా కంపెనీ పెట్టి, అమెరికన్ల ప్రాణాలు కాపాడే స్థాయికి ఎదిగిన మిథిలేష్ రెడ్డి మాది, లిఖిత్ ఆదర్శ్ పిచ్చికాలల ప్రతిభ తెలుగువారందరికీ గర్వకారణం. త్వరలోనే టెక్సాస్ వ్యాప్తంగా విస్తరించి, ఆపై భారతదేశంలోని హైదరాబాద్, ఆంధ్రప్రదేశ్‌కు కూడా ఈ అత్యాధునిక సాంకేతికతను తీసుకురావాలని ఈ యువ ఆంత్రప్రెన్యూర్లు ప్రణాళికలు రచిస్తున్నారు.

Also Read:

బుమ్రాకు క్షమాపణలు చెప్పిన స్టార్ హీరో రామ్‌చరణ్

ఐపీఎల్‌లో అరుదైన ఫీట్.. కోహ్లీ, సెహ్వాగ్ సరసన శ్రేయస్ అయ్యర్

For More Latest News