అమెరికాలో సత్తా చాటిన తెలుగమ్మాయి ఇషాన్వి

ఇంటర్నెట్ డెస్క్: అమెరికాలోని ఫ్లోరిడాలోని స్టెయిన్‌బ్రెన్నర్ హైస్కూల్లో 10వ తరగతి చదువుతున్న తెలుగు విద్యార్థిని ఇషాన్వి సబ్నివీసు అమెరికా జాతీయ స్థాయి ఆవిష్కరణల పోటీలో అద్భుతమైన విజయం సాధించింది. దేశంలోనే అత్యంత ప్రతిష్టాత్మకమైన ‘ఇన్వెన్షన్ కన్వెన్షన్ యూఎస్ నేషనల్స్’లో 35 రాష్ట్రాల నుంచి పాల్గొన్న 3 లక్షలకుపైగా విద్యార్థులను వెనక్కి నెట్టుకుంటూ ఆమె ద్వితీయ బహుమతి కైవసం చేసుకుంది.

దృష్టి లోపం ఉన్నవారి స్వతంత్ర, సురక్షిత ప్రయాణం కోసం ఇషాన్వి రూపొందించిన ‘AI-ఎనేబుల్డ్ స్మార్ట్ కేన్ (Smart Cane)’ ఈ ఘనతకు కారణమైంది. ఈ ప్రాజెక్ట్ ఇప్పటికే పేటెంట్ దరఖాస్తు దశలో ఉంది. ఆమె ప్రయాణం యూనివర్సిటీ ఆఫ్ సౌత్ ఫ్లోరిడాలో జరిగిన ప్రాంతీయ పోటీలతో ప్రారంభమై, జాతీయ స్థాయిలో మెరిసింది.

స్మార్ట్ కేన్ ప్రత్యేకతలేంటి?

ఈ వినూత్నమైన స్మార్ట్ కేన్ పూర్తిగా AI సాంకేతికత ఆధారంగా అభివృద్ధి చేశారు. ఇందులోని ముఖ్యమైన అంశాలు..

• రియల్ టైమ్ AI ఆధారిత వాతావరణ విశ్లేషణ వ్యవస్థ

• ఆన్-డివైస్ లార్జ్ లాంగ్వేజ్ మోడల్స్ (LLMs) ద్వారా ప్రాసెసింగ్

• బ్లూటూత్ ఇయర్ పీస్ ద్వారా వాయిస్ మార్గనిర్దేశం

• ఇంటర్నెట్ అవసరం లేని ఆఫ్లైన్ సామర్థ్యం

• అడ్డంకులను ముందస్తుగా గుర్తించే (Obstacle Detection) వ్యవస్థ

• తప్పుడు గుర్తింపులను తగ్గించే ఫాల్స్ డిటెక్షన్ సప్రెషన్ టెక్నాలజీ

• ఒకే టచ్‌తో అత్యవసర కాల్స్ చేసే ఎమర్జెన్సీ ఫీచర్

గ్రామీణ, మారుమూల ప్రాంతాల్లో కూడా ఇది సమర్థవంతంగా ఉపయోగపడేలా రూపొందించారు. అంతేకాకుండా, దీర్ఘకాలిక వ్యాధులతో బాధపడుతున్నవారికి మద్దతుగా ‘క్రానిక్ కనెక్ట్’ అనే నాన్-ప్రాఫిట్ కమ్యూనిటీని కూడా ఆమె స్థాపించారు.

స్ఫూర్తిగా ఇషాన్వి విజయం

ఈ సందర్భంగా ఇషాన్వి మాట్లాడుతూ.. 'ఈ విజయం ప్రపంచవ్యాప్తంగా ఉన్న తెలుగు సమాజానికి గర్వకారణం' అని తెలిపింది. ఆమె విజయంపై ప్రవాస తెలుగువారు ఆనందం వ్యక్తం చేస్తూ.. ఇది ఆంధ్రప్రదేశ్, తెలంగాణ యువతకు స్ఫూర్తిదాయకమని పేర్కొన్నారు.

ఈ ప్రాజెక్ట్ విజయంలో హైదరాబాద్‌కు చెందిన టెక్నాలజీ స్టార్టప్ క్వాడ్రిక్ ఐటీ కీలకపాత్ర పోషించింది. ఈ సంస్థ యువ ఆవిష్కర్తలకు AI, టెక్నాలజీ మార్గదర్శకత్వం, సాంకేతిక సహాయం, మెంటారింగ్ అందిస్తూ ఆలోచనలను వాస్తవ పరిష్కారాలుగా మార్చడంలో సహాయపడుతోంది. కృత్రిమ మేధస్సు, ఇంజనీరింగ్ రంగాల్లో యువత పెరుగుతున్న భాగస్వామ్యానికి ఈ విజయం నిదర్శనంగా నిలిచింది.

Also Read:

పాస్‌పోర్టు ఆఫీసర్ వైఎస్‌వీఎస్‌ఆర్ కృష్ణకు ఎన్నారైల ఆత్మీయ వీడ్కోలు

న్యూజెర్సీలో తానా CPR & AED శిక్షణ కార్యక్రమం