సర్కాడియన్‌ ఈటింగ్‌.. మహిళల సీక్రెట్‌ హెల్త్‌

మనం ఏ ఆహారం తీసుకుంటున్నాం అనే దానికంటే.. ఏ సమయానికి తీసుకుంటున్నాం అనేదే మహిళల హార్మోన్ల సమతుల్యతను నిర్ణయిస్తుందని నిపుణులు చెబుతున్నారు.

ఇంటి పనులు, ఉద్యోగం, పిల్లల బాధ్యతల్లో పడి చాలామంది మహిళలు ఉదయం అల్పాహారాన్ని దాటవేయడం, రాత్రివేళల్లో ఆలస్యంగా భోజనం చేయడం చేస్తుంటారు. అయితే, ఈ అలవాటు శరీరంలోని జీవగడియారాన్ని పూర్తిగా దెబ్బతీస్తుంది. మన శరీరంలో నడిచే సహజ సిద్ధమైన జీవగడియారానికి అనుగుణంగా ఆహారం తినే పద్ధతినే ‘సర్కాడియన్‌ ఈటింగ్‌’ అంటారు.

సూర్యుడి గమనంతో జీర్ణక్రియ: మన జీర్ణక్రియ సూర్యోదయంతో ప్రారంభమై, మధ్యాహ్నానికి గరిష్ఠ స్థాయికి చేరుకుని, సూర్యాస్తమయం తర్వాత మందగిస్తుంది. ఉదయం సూర్యోదయం అయిన 1-2 గంటల్లో అల్పాహారం తీసుకోవడం వల్ల మన శరీరానికి కావాల్సిన ప్రాథమిక శక్తి లభిస్తుంది.

హార్మోన్ల సమతుల్యత: మహిళల శరీరంలో ఈస్ర్టోజెన్‌, ప్రొజెస్టెరాన్‌, ఇన్సులిన్‌ హార్మోన్లు చాలా సున్నితంగా ఉంటాయి. వేళాపాళా లేని ఆహారపు అలవాట్ల వల్ల ఇన్సులిన్‌ నిరోధకత పెరిగి థైరాయిడ్‌, పీసీవోడీ, హార్మోనల్‌ అసమతుల్యత వంటి సమస్యలు త్వరగా దాడిచేస్తాయి.

బరువు నియంత్రణ: సాయంత్రం ఏడెనిమిది గంటల్లోపే భోజనం పూర్తిచేయడం వల్ల రాత్రివేళల్లో జీర్ణవ్యవస్థకు పూర్తి విశ్రాంతి లభిస్తుంది. దీనివల్ల శరీరంలో అదనపు కొవ్వు పేరుకుపోకుండా బరువు అదుపులో ఉంటుంది.

నిద్ర నాణ్యత: ఆలస్యంగా తిని వెంటనే పడుకోవడం వల్ల జీర్ణక్రియ ప్రక్రియ సరిగ్గా జరగక కడుపు ఉబ్బరం, అసిడిటీ వేధిస్తాయి. ఇవి రాత్రి వేళల్లో ప్రశాంతమైన నిద్రను దూరం చేస్తాయి.

ఇలా చేయాలి

• ఉదయం టిఫిన్‌ను ఎట్టిపరిస్థితుల్లోనూ స్కిప్‌ చేయకూడదు.

• మధ్యాహ్న భోజనంలో ప్రొటీన్లు, పీచు పదార్థాలు ఎక్కువగా ఉండేలా చూసుకోవాలి.

• రాత్రి భోజనం వీలైనంత తేలికగా ఉండాలి. రాత్రి 8 గంటల లోపే పూర్తిచేయాలి.

• రాత్రి భోజనానికి, పడుకునే సమయానికి మధ్య కనీసం 2 నుంచి 3 గంటల వ్యవధి ఉండాలి.

ఈ వార్తలు కూడా చదవండి:

పెట్టుబడులకు రెట్టింపు లాభాలు

మరింత తగ్గిన బంగారం ధరలు.. ఈ రోజు మీ నగరంలో ఎలా ఉన్నాయంటే..

మీ-సేవలోడ్రైవింగ్‌ లైసెన్సు వీడియో!

Read Latest AP News And Telangana News And International News And Telugu News