టెలిగ్రామ్ పిటిషన్పై అత్యవసర విచారణకు అంగీకరించిన ఢిల్లీ హైకోర్టు!
ABN , Publish Date - Jun 17 , 2026 | 12:47 PM
కేంద్రం నిర్ణయాన్ని సవాల్ చేస్తూ టెలిగ్రామ్ యాప్ ఢిల్లీ హైకోర్టు మెట్లెక్కింది. తాత్కాలిక నిషేధం ఎత్తివేయాలని అత్యవసర పిటిషన్ దాఖలు చేసింది. దీంతో ఢిల్లీ హైకోర్టు, అత్యవసర విచారణ జరిపేందుకు అంగీకరించింది.
న్యూఢిల్లీ, జూన్ 17: ప్రముఖ సోషల్ మీడియా మెసేజింగ్ యాప్ 'టెలిగ్రామ్' (Telegram) భారత ప్రభుత్వ నిర్ణయాన్ని సవాల్ చేస్తూ ఢిల్లీ హైకోర్టు మెట్లెక్కింది. దేశవ్యాప్తంగా సంచలనం సృష్టిస్తున్న 'నీట్' (NEET) పరీక్షల లీకేజీ వ్యవహారాలు, అవకతవకల నేపథ్యంలో కేంద్ర ప్రభుత్వం టెలిగ్రామ్ యాప్పై తాత్కాలిక నిషేధం (Temporary Ban) విధించిన సంగతి తెలిసిందే. ఈ నిషేధాన్ని వ్యతిరేకిస్తూ టెలిగ్రామ్ సంస్థ ఢిల్లీ హైకోర్టులో అత్యవసర పిటిషన్ దాఖలు చేసింది.
కేంద్రం తీసుకున్న ఈ ఆకస్మిక నిర్ణయం వల్ల భారతదేశంలోని కోట్లాది మంది వినియోగదారులతో పాటు తమ వ్యాపార ప్రయోజనాలకు తీవ్ర నష్టం వాటిల్లుతోందని టెలిగ్రామ్ యాజమాన్యం తమ పిటిషన్లో పేర్కొంది. ఈ నిషేధాన్ని తక్షణమే ఎత్తివేయాలని కోరుతూ అత్యవసరంగా విచారించాలని కోర్టును అభ్యర్థించింది. టెలిగ్రామ్ సంస్థ అభ్యర్థనను పరిశీలించిన ఢిల్లీ హైకోర్టు, ఈ పిటిషన్పై అత్యవసర విచారణ జరిపేందుకు అంగీకరించింది.
వైద్య విద్యా కోర్సుల్లో ప్రవేశాల కోసం నిర్వహించిన నీట్ (NEET) ఎగ్జామ్ ప్రశ్నాపత్రాల లీకేజీ, సమాధానాల కీ (Answer Keys)ల సర్క్యులేషన్ వంటివి టెలిగ్రామ్ గ్రూపులు, ఛానళ్ల ద్వారానే పెద్ద ఎత్తున సాగాయనే ఆరోపణలు వచ్చాయి. దర్యాప్తు సంస్థల నివేదికలు, అభ్యర్థుల ప్రయోజనాలను దృష్టిలో ఉంచుకుని, తదుపరి అక్రమాలకు అడ్డుకట్ట వేసేందుకు కేంద్ర ఐటీ శాఖ ఈ తాత్కాలిక నిషేధాన్ని విధిస్తూ నిర్ణయం తీసుకుంది.
గత కొన్ని రోజులుగా ప్రశ్నపత్రాల లీకేజీ ముఠాలు, అక్రమార్కులు విద్యార్థులను ఆకర్షించడానికి, రహస్య సమాచారాన్ని చేరవేయడానికి ఎండ్-టు-ఎండ్ ఎన్క్రిప్షన్ కలిగిన టెలిగ్రామ్ను వేదికగా చేసుకుంటున్నారనే ఫిర్యాదులు పెరిగాయి. ఈ నేపథ్యంలో కోర్టు విచారణలో కేంద్ర ప్రభుత్వం ఎలాంటి వాదనలు వినిపిస్తుంది. ఢిల్లీ హైకోర్టు టెలిగ్రామ్కు ఊరటనిస్తుందా లేదా అనేది ఇప్పుడు దేశవ్యాప్తంగా ఆసక్తికరంగా మారింది.
ఈ వార్తలనూ చదవండి:
జపాన్ జనాల పద్ధతే వేరు.. ప్రపంచం ఫిదా
ఒక బాయ్ఫ్రెండ్గా నాకు కొన్ని బాధ్యతలు తప్పవు.. జస్టిన్ ట్రూడో
