‘ఎవరినీ వదిలిపెట్టం’.. టైగర్ ష్రాఫ్‌పై కాల్పుల నేపథ్యంలో సీఎం ఫడ్నవీస్ వార్నింగ్

ముంబై: బాలీవుడ్ నటుడు టైగర్ ష్రాఫ్‌పై జరిగిన కాల్పుల ఘటనను మహారాష్ట్ర ముఖ్యమంత్రి దేవేంద్ర ఫడ్నవీస్ తీవ్రంగా ఖండించారు. ఈ ఘటనకు బాధ్యులైన గ్యాంగ్‌, వ్యక్తులు ఎవరైనా సరే వదిలిపెట్టే ప్రసక్తే లేదని తేల్చి చెప్పారు. ఈ ఘటనను అత్యంత తీవ్రంగా పరిగణిస్తున్నామని, దర్యాప్తులో లభించిన ఆధారాల మేరకు ఇప్పటికే కొందరు అనుమానితులను పోలీసులు గుర్తించారని సీఎం వెల్లడించారు. నిందితులు ఎక్కడ దాక్కున్నా పోలీసులు వారిని పట్టుకుంటారని ఫడ్నవీస్ స్పష్టం చేశారు. ఇలాంటి బెదిరింపులతో కార్యకలాపాలు సాగించాలని ఎవరైనా ప్రయత్నిస్తే, వారిని ఎలా కట్టడి చేయాలో ముంబై పోలీసులకు బాగా తెలుసని సీఎం అన్నారు.

ఈ ఘటనపై విలేకరుల సమావేశంలో సీఎం ఫడ్నవీస్ మాట్లాడుతూ.. దర్యాప్తులో పోలీసులకు కొన్ని కీలక ఆధారాలు లభించాయని, వాటి ఆధారంగా నిర్దిష్ట వ్యక్తులను గుర్తించామని చెప్పారు. వారిని త్వరలోనే అరెస్టు చేస్తామని వెల్లడించారు. కాల్పులకు పాల్పడిన వారితో పాటు తెర వెనుక ఉండి ఆదేశాలిస్తున్న సూత్రధారులను కూడా పట్టుకుంటామని తెలిపారు. లారెన్స్ బిష్ణోయ్‌ను కస్టడీలోకి తీసుకునే ప్రయత్నాలపై స్పందిస్తూ.. ఇప్పటికే కేంద్రానికి అభ్యర్థన పంపించామని, చట్టపరమైన ప్రక్రియ కొనసాగుతోందని ఫడ్నవీస్ చెప్పారు. సూత్రధారులు ప్రపంచంలో ఎక్కడ దాక్కున్నా వారిని పట్టుకుంటామని పేర్కొన్నారు. మహారాష్ట్రలో ఉండి కార్యకలాపాలు సాగిస్తున్న వారిని ఇప్పటికే అరెస్టు చేసినట్లు తెలిపారు. ఇతర రాష్ట్రాల్లో, విదేశాల్లో ఉంటూ నేరాలకు పాల్పడుతున్న వారిని గుర్తించేందుకు ఆయా రాష్ట్రాల అధికారులతో సమన్వయం చేసుకుంటామని చెప్పారు. విదేశాల్లో ఉన్నవారిని పట్టుకునేందుకు కేంద్ర ప్రభుత్వ సహకారం తీసుకుంటామని సీఎం తెలిపారు. ఇదే సమయంలో నటీనటుల భద్రతపై స్పందించిన సీఎం ఫడ్నవీస్.. కాల్పుల ఘటనకు సంబంధించిన అన్ని అంశాలను విశ్లేషిస్తామన్నారు. నటీనటుల భద్రత విషయంలో ఎలాంటి చర్యలు తీసుకోవాలనే అంశాన్ని పరిశీలిస్తామని సీఎం చెప్పారు.

టైగర్ ష్రాఫ్‌ను పరామర్శించిన డిప్యూటీ సీఎం ఏక్‌నాథ్ షిండే..

కాల్పుల ఘటన అనంతరం మహారాష్ట్ర ఉప ముఖ్యమంత్రి ఏక్‌నాథ్ షిండే ఆదివారం రాత్రి టైగర్ ష్రాఫ్ నివాసానికి వెళ్లారు. ఆయన ఆరోగ్య పరిస్థితిని అడిగి తెలుసుకున్నారు. రాష్ట్ర ప్రభుత్వం అండగా ఉంటుందని భరోసా ఇచ్చారు. షిండేతో మాట్లాడుతున్న సమయంలో టైగర్ ష్రాఫ్ భుజం, ఛాతీ వద్ద డ్రెస్సింగ్‌తో పాటు కుడి చేతికి కట్టు ఉన్నట్లు ఆయన నివాసం నుంచి విడుదలైన ఫొటోల్లో కనిపించింది. ఈ సమావేశంలో టైగర్ తల్లి ఆయేషా ష్రాఫ్ కూడా ఉన్నారు.

Also Read:

ఏపీలో ఎంపీటీసీ, జెడ్పీటీసీ ఎన్నికల నోటిఫికేషన్ విడుదల

రూ.256.75 కోట్ల పనుల బిల్లుల అప్‌లోడ్‌లో నిర్లక్ష్యం.. గోదావరి డెల్టా సీఈకి మెమో

ఏపీ స్థానిక ఎన్నికలపై మంత్రి లోకేశ్ పవర్‌ఫుల్ పోస్టు.. ఏమన్నారంటే..