ఢిల్లీ ఎయిర్‌పోర్ట్‌లో కలకలం.. ప్రయాణికుడి హ్యాండ్‌బ్యాగ్‌లో కోతి పుర్రె!

ఢిల్లీ, ఆగస్టు 12: ఢిల్లీ ఇందిరా గాంధీ అంతర్జాతీయ విమానాశ్రయంలో భద్రతా తనిఖీల సమయంలో ఒక విచిత్రమైన, కలకలం రేపిన ఘటన వెలుగుచూసింది. హైదరాబాద్ వెళ్లేందుకు వచ్చిన ఒక ప్రయాణికుడి హ్యాండ్‌బ్యాగ్‌లో మానవ రూపాన్ని పోలిన జంతువు పుర్రెను సీఐఎస్ఎఫ్ (CISF) బలగాలు స్వాధీనం చేసుకున్నాయి. విచారణలో అది 'కోతి పుర్రె' అని సదరు ప్రయాణికుడు వెల్లడించాడు.

సోమవారం ఢిల్లీ నుంచి హైదరాబాద్‌ వెళ్లే విమానం ఎక్కేందుకు సదరు ప్రయాణికుడు విమానాశ్రయానికి వచ్చాడు. సెక్యూరిటీ చెకింగ్ సమయంలో ప్రయాణికుడి హ్యాండ్‌బ్యాగ్‌ను ఎక్స్-రే మిషన్ ద్వారా తనిఖీ చేయగా, సీఐఎస్ఎఫ్ సిబ్బంది అనుమానాస్పద వస్తువు కనిపెట్టారు. తక్షణమే అప్రమత్తమైన అధికారులు బ్యాగ్‌ను తెరిచి సోదా చేయగా, లోపల దాచి ఉంచిన ఒక పుర్రె బయటపడింది.

భద్రతా సిబ్బంది ఆ పుర్రె గురించి ప్రశ్నించగా, అది కోతికి చెందిందని ప్రయాణికుడు తెలిపాడు. అయితే విమానంలో ఇలాంటి వస్తువులను తీసుకెళ్లడం చట్టరీత్యా నేరం కావడంతో అధికారులు అతడిని అదుపులోకి తీసుకున్నారు.

వైల్డ్‌లైఫ్ యాక్ట్ కింద కేసు నమోదు

అనంతరం సీఐఎస్ఎఫ్ బలగాలు సదరు ప్రయాణికుడిని తదుపరి చర్యల నిమిత్తం స్థానిక ఢిల్లీ పోలీసులకు అప్పగించగా, స్వాధీనం చేసుకున్న పుర్రెను ఫోరెన్సిక్ పరిశీలనకు పంపారు. ఈ వ్యవహారం వన్యప్రాణులకు సంబంధించినది కావడం వల్ల 'వైల్డ్‌లైఫ్ ప్రొటెక్షన్ యాక్ట్, 1972' (వన్యప్రాణి సంరక్షణ చట్టం) నిబంధనల ప్రకారం చట్టపరమైన చర్యలు ప్రారంభించనున్నట్లు అధికారులు తెలిపారు.

ఈ పుర్రెను సదరు ప్రయాణికుడు ఢిల్లీలో ఎక్కడి నుంచి పొందాడు? దీనిని హైదరాబాద్‌ ఎందుకు తీసుకెళ్తున్నాడు? దీని వెనుక ఏవైనా చేతబడులు, మూఢనమ్మకాలు లేదా అక్రమ రవాణా కోణాలు ఉన్నాయా? అనే విషయాలపై పోలీసులు, సంబంధిత అటవీ శాఖ అధికారులు లోతుగా విచారణ జరుపుతున్నారు.

ఇవి కూడా చదవండి...

రక్షిత అడవులు.. ఏనుగులకు సురక్షిత ఆవాసాలే లక్ష్యం: డిప్యూటీ సీఎం పవన్

చంద్రబాబు.. నిజమైన అభివృద్ధికి చిరునామా: రాష్ట్రపతి ద్రౌపది ముర్ము

Read Latest AP News And Telugu News