హనుమాన్‌ చాలీసా పఠించి ధైర్యం తెచ్చుకున్నా.. మోదీతో కెప్టెన్ స్మిత్..

న్యూఢిల్లీ: ఫ్లైదుబాయ్‌ విమానాన్ని ప్రమాదం నుంచి కాపాడిన కెప్టెన్‌ స్మిత్‌ మచ్చర్‌తో ప్రధానమంత్రి నరేంద్ర మోదీ ఇవాళ (శుక్రవారం) వీడియో కాల్‌లో మాట్లాడారు. ఈ సందర్భంగా కెప్టెన్‌ ధైర్యం, సహనం, సమయస్ఫూర్తిని ప్రధాని ప్రశంసించారు. గత బుధవారం ఉదయం దుబాయ్‌ నుంచి టెల్‌ అవీవ్‌కు బయలుదేరిన ఫ్లైదుబాయ్‌ విమానంలో ఉద్రిక్తతలు చోటుచేసుకున్న సంగతి తెలిసిందే. విమానం గాల్లో ఉండగా కెప్టెన్‌ స్మిత్‌పై సహ పైలట్‌ కత్తితో దాడి చేశాడు. తీవ్రంగా గాయపడినప్పటికీ ఆయన 173 మంది ప్రయాణికుల ప్రాణాలను కాపాడారు. ఈ నేపథ్యంలో చికిత్స పొందుతున్న కెప్టెన్‌ స్మిత్‌తో ప్రధాని మాట్లాడారు. ఈ సందర్భంగా ఆ రోజు జరిగిన ఘటనను వివరిస్తూ ప్రధానికి ఆయన పలు విషయాలు వెల్లడించారు.

కెప్టెన్ స్మిత్ ఏం చెప్పారు..

'నేను 17 ఏళ్లుగా విమానాలు నడుపుతున్నాను. గత 11 ఏళ్లుగా కెప్టెన్‌గా పనిచేస్తున్నాను. కళ్లు మూసుకున్నా విమానంలో ఏం జరుగుతుందో అర్థం చేసుకోగలను. నేను కింద పడిపోయిన సమయంలో విమానం వేగంగా కిందికి వెళ్తున్నట్లు అనిపించింది. ఆ సమయంలో ఏమీ చేయకుండా ఉంటే అందరి ప్రాణాలు పోతాయని గ్రహించా. ఇదే చివరి అవకాశం అనుకున్నా. కాక్‌పిట్‌ తలుపు అక్కడే ఉందని భావించి, ఎలాగోలా తలుపు తెరిచా. ఆ తర్వాత ప్రయాణికులు, సిబ్బంది సహాయం చేశారు. విమానంలోని ఒక్క ప్రాణాన్ని కూడా పోనివ్వలేదు' అని ప్రధానికి కెప్టెన్‌ స్మిత్‌ వివరించారు.

హనుమాన్‌ చాలీసా పఠిస్తా..

మరోవైపు, తాను భయపడినప్పుడు హనుమాన్‌ చాలీసా పఠిస్తానని ప్రధాని మోదీకి కెప్టెన్‌ స్మిత్‌ తెలిపారు. ఈ ఘటన జరిగినప్పుడూ తాను హనుమాన్‌ చాలీసానే జపించానని, దేవుడే కాపాడాడని తనకు తెలుసని చెప్పుకొచ్చారు. తన రెండేళ్ల కుమారుడికి ప్రతిరోజూ ఉదయం హనుమాన్‌ చాలీసా చదివి వినిపిస్తానని ఆయన తెలిపారు. తాము దేశానికి దూరంగా ఉన్నప్పటికీ భారతీయ సంస్కృతికి దూరం కాకూడదనే ఉద్దేశంతో ఇలా చేస్తున్నానని కెప్టెన్ పేర్కొన్నారు.

కెప్టెన్‌ స్మిత్‌‌పై మోదీ ప్రశంసలు..

ఈ సందర్భంగా ప్రధాని మోదీ స్పందిస్తూ.. కెప్టెన్‌ స్మిత్‌ ధైర్యాన్ని అభినందించారు. 'మీ ధైర్యం, సహనం, సమయస్ఫూర్తి ఎంతోమంది ప్రాణాలను కాపాడాయి. మీరు ఇంత తీవ్రమైన గాయాలతో ప్రాణాల కోసం పోరాడుతున్నప్పటికీ, ప్రయాణికుల ప్రాణాల గురించి ఆలోచించారు. 140 కోట్ల మంది భారతీయులు మిమ్మల్ని చూసి గర్విస్తున్నారు. మీరు చేసినది అసాధారణమైన పని. ప్రపంచవ్యాప్తంగా ప్రజలు మిమ్మల్ని చూడాలని, మీతో మాట్లాడాలని ఆసక్తిగా ఉన్నారు' అని ప్రధాని మోదీ ప్రశంసించారు.

ఈ వార్తలు కూడా చదవండి

ఇండియా గ్రీన్ ఎనర్జీ గ్రిడ్‌తో భారీగా డివిడెంట్లు: యూఎన్ క్లైమేట్ చీఫ్

భారత్‌కు 114 రఫేల్‌ యుద్ధవిమానాలు.. కొనుగోలు ప్రక్రియ వేగవంతం!