రాష్ట్రపతి ఎన్నికలు, డీలిమిటేషన్ బిల్లే టార్గెట్.. డీఎంకే 22 మంది ఎంపీలపై బీజేపీ కన్ను!

న్యూఢిల్లీ, మే 22: తమిళనాడు రాజకీయాల్లో అనూహ్య మార్పులు చోటుచేసుకుంటున్నాయి. సుదీర్ఘకాల మిత్రపక్షాలైన డీఎంకే (DMK), కాంగ్రెస్ మధ్య చెడిన బంధం.. ఇప్పుడు దేశ రాజధాని ఢిల్లీలో సరికొత్త రాజకీయ సమీకరణాలకు తెరలేపుతోంది. తమిళనాడులో కాంగ్రెస్ పార్టీ తమ కూటమిని వీడి, విజయ్ నేతృత్వంలోని 'తమిళగ వెట్రి కళగం' (TVK) పార్టీతో జతకట్టడంపై డీఎంకే తీవ్ర ఆగ్రహంతో ఉంది. కాంగ్రెస్‌ను 'వెన్నుపోటు దారు'గా అభివర్ణిస్తున్న డీఎంకే.. పార్లమెంట్‌లో తమ ఎంపీల సీటింగ్ అరేంజ్‌మెంట్‌ను కూడా మార్చాలని, కాంగ్రెస్ నేతలతో కలిసి కూర్చోలేమని లోక్‌సభ స్పీకర్ ఓం బిర్లాకు లేఖ రాయడం సంచలనం రేపుతోంది. ఈ పరిణామాలను నిశితంగా గమనిస్తున్న కేంద్రంలోని అధికార బీజేపీ.. పార్లమెంట్‌లో తమ బలాన్ని పెంచుకోవడానికి ఇదొక సువర్ణావకాశంగా భావిస్తోందని రాజకీయ వర్గాల సమాచారం.

బీజేపీ ఆశలకు కారణాలు ఏంటి?

ఇటీవల జరిగిన అసెంబ్లీ ఎన్నికల్లో కొత్త పార్టీ 'టీవీకే' (TVK) చేతిలో డీఎంకే ఘోర పరాజయాన్ని మూటగట్టుకుంది. ఆరు దశాబ్దాలుగా సాగుతున్న డీఎంకే-ఏఐఏడీఎంకే ద్వంద్వ పాలనకు బ్రేక్ పడింది. ఇటు రాష్ట్రంలో అధికారం కోల్పోయి, అటు కేంద్రంలోనూ ప్రతిపక్షంలో ఉండటం ఏ ప్రాంతీయ పార్టీకైనా కష్టం కావున, రాజకీయ మనుగడ కోసం డీఎంకే కేంద్రంతో కలిసి పనిచేసే అవకాశం ఉందని బీజేపీ భావిస్తోంది.

డీఎంకేకు బీజేపీతో పొత్తు కొత్తేమీ కాదు. గతంలో అటల్ బిహారీ వాజ్‌పేయి నేతృత్వంలోని ఎన్డీఏ (NDA) ప్రభుత్వంలో డీఎంకే భాగస్వామిగా పనిచేసింది. ఆ తర్వాతే కాంగ్రెస్ కూటమిలోకి మారింది. బీజేపీ పాత మిత్రపక్షమైన ఏఐఏడీఎంకే (AIADMK) ఎన్నికల ఓటమి తర్వాత నిలువునా చీలిపోయే స్థితికి చేరింది. దీంతో తమిళనాడులో నమ్మదగిన మరో బలమైన శక్తి కోసం బీజేపీ చూస్తోంది.

రాష్ట్రపతి ఎన్నికలు.. పార్లమెంట్ నంబర్ గేమ్

వచ్చే ఏడాది (2027) దేశ రాష్ట్రపతి ఎన్నికలు జరగనున్నాయి. పశ్చిమ బెంగాల్, అస్సాం ఎన్నికల్లో గెలిచినప్పటికీ.. పార్లమెంట్‌లో బిల్లులు పాస్ చేయడానికి, ముఖ్యంగా 'నియోజకవర్గాల పునర్విభజన' (Delimitation Bill) వంటి కీలక బిల్లుల కోసం బీజేపీకి మూడింట రెండు వంతుల (2/3rd) మెజారిటీ అవసరం.

గతంలో జరిగిన డీలిమిటేషన్ ఓటింగ్‌లో ఎన్డీఏకు 54 ఓట్లు తక్కువ వచ్చాయి. అప్పుడు డీఎంకేకు చెందిన 22 మంది లోక్‌సభ ఎంపీలు బిల్లుకు వ్యతిరేకంగా ఓటేశారు. ఇప్పుడు గనుక డీఎంకే మద్దతు ఇస్తే, కేంద్రానికి పార్లమెంట్‌లో తిరుగుండదు. ఒడిశాలో నవీన్ పట్నాయక్ (BJD), ఆంధ్రాలో జగన్ మోహన్ రెడ్డి (YSRCP), తెలంగాణలో కేసీఆర్ (BRS) గతంలో అవసరమైనప్పుడు కేంద్రానికి 'అంశాల వారీ మద్దతు' ఇచ్చినట్లుగానే.. డీఎంకే కూడా ఎన్డీఏలో చేరకుండానే బయట నుండి మద్దతు ఇస్తుందని బీజేపీ ఆశిస్తోంది.

ముందున్న పెద్ద సవాళ్లు:

బీజేపీ-డీఎంకేల మధ్య సత్సంబంధాలు ఏర్పడటం అంత సులువు కాదని విశ్లేషకులు భావిస్తున్నారు. ప్రధానంగా రెండు పెద్ద అడ్డంకులు చెబుతున్నారు:

1. డీలిమిటేషన్ (నియోజకవర్గాల పునర్విభజన): 'ఉత్తరాది రాష్ట్రాల కోసం దక్షిణాది సీట్లను బలిపెడుతూ, ప్రాతినిధ్యాన్ని తగ్గిస్తున్నారు' అని డీఎంకే అధినేత ఎం.కె. స్టాలిన్ గత ఎన్నికల్లో తీవ్రంగా ప్రచారం చేశారు. ఈ నేపథ్యంలో ఈ బిల్లు విషయంలో డీఎంకే వెనక్కి తగ్గడం కష్టమే.

2. సనాతన ధర్మ వివాదం: గతంలో డిప్యూటీ సీఎం ఉదయనిధి స్టాలిన్ సనాతన ధర్మంపై చేసిన వివాదాస్పద వ్యాఖ్యలు, దాన్ని పూర్తిగా నిర్మూలించాలన్న పిలుపు.. బీజేపీ-డీఎంకేల మధ్య తీవ్ర సైద్ధాంతిక వైరాన్ని పెంచాయి.

ఈ రాజకీయ, సామాజిక విభేదాలను పక్కనబెట్టి, కాంగ్రెస్‌పై కక్షతో డీఎంకే ఢిల్లీలో బీజేపీతో చేతులు కలుపుతుందా? లేదా తన పంథాలోనే కొనసాగుతుందా? అనేది రాబోయే రోజుల్లో తేలనుంది.

Also Read:

వడదెబ్బ ఎఫెక్ట్.. తెలంగాణ వ్యాప్తంగా 22 మంది మృతి

తండ్రి మరణాన్ని కూడా రాజకీయాలకు వాడుకోవడం బాధాకరం? జగన్ తీరుపై మంత్రి గొట్టిపాటి ధ్వజం