క్యాన్సర్ మందుల ధరలకు బ్రేక్ పడలేదా? సుప్రీంకోర్టు ఆదేశించినా మారని 37 ఔషధాల ధరలు!

ఆంధ్రజ్యోతి, అక్టోబర్ 29: క్యాన్సర్ వ్యాధితో పోరాడుతున్న రోగులకు, వారి కుటుంబాలకు మళ్లీ తీవ్ర నిరాశే ఎదురైంది. క్యాన్సర్ మందుల ధరలను తగ్గించాలని సుప్రీంకోర్టు ఆదేశించినప్పటికీ, ఫార్మాస్యూటికల్ కంపెనీల వైఖరి వల్ల ఆశించిన స్థాయిలో ధరల ఊరట లభించలేదు. నేషనల్ ఫార్మాస్యూటికల్ ప్రైసింగ్ అథారిటీ (NPPA) తాజాగా విడుదల చేసిన 543 బ్రాండ్ల క్యాన్సర్ ఔషధాల నూతన ధరల జాబితా ప్రకారం, నవంబర్ 9 నుంచి అమలులోకి రానున్న సవరించిన గరిష్ట రిటైల్ ధరలలో (MRP) కీలకమైన 37 పేటెంట్ క్యాన్సర్ మందుల ధరల్లో ఎలాంటి మార్పూ లేదని స్పష్టమైంది.

మార్పు లేని ప్రధాన మందుల ధరల వివరాలు

లంగ్ క్యాన్సర్ మందు 'అలెక్సాన్సా' (Alecensa 150 mg): దీని ధర గతంలో ఉన్నట్లుగానే రూ. 4.30 లక్షలుగానే కొనసాగుతోంది.

ఇమ్యునోథెరపీ మందు 'కిట్రుడా' (Keytruda 100 mg): దీని సింగిల్ డోస్ ధర రూ. 2.16 లక్షల వద్ద స్థిరంగా ఉంది.

రొమ్ము క్యాన్సర్ ఔషధం 'ఫెస్గో' (Phesgo 1200 mg): దీని ఉమ్మడి డోస్ ధర అత్యధికంగా రూ. 4.93 లక్షలుగానే ఉంది.

నవంబర్ 9 నుంచి నుంచి కొత్త MRPల అమలు

ఎన్‌పీపీఏ (NPPA) మొత్తం 543 బ్రాండ్ల నాన్-షెడ్యూల్డ్ క్యాన్సర్ ఔషధాల జాబితాను విడుదల చేసింది. సవరించిన ఈ నూతన గరిష్ఠ రిటైల్ ధరలు నవంబర్ 9 నుంచి అమలులోకి రానున్నాయి. అత్యంత వ్యయభరితమైన కీమోథెరపీ, ఇమ్యునోథెరపీ మందుల ధరలు యథాతథంగా ఉండటంతో క్యాన్సర్ బాధితులపై ఆర్థిక భారం కొనసాగుతూనే ఉంది.

నిపుణుల అభిప్రాయం, హెచ్చరికలు

కేవలం ట్రేడ్ మార్జిన్ (Trade Margin) పరిమితులు విధించడం వల్ల రోగులకు లభించే ప్రయోజనం నామమాత్రమేనని ఆరోగ్య రంగ నిపుణులు పేర్కొంటున్నారు. విదేశీ పేటెంట్ కంపెనీల ఏకఛత్రాధిపత్యాన్ని, అధిక ధరలను అరికట్టాలంటే భారత ప్రభుత్వం తక్షణమే 'కంపల్సరీ లైసెన్సింగ్' నిబంధనను అమలు చేయాలని సూచిస్తున్నారు. దీనివల్ల దేశీయ కంపెనీలు కూడా ఈ మందులను సరసమైన ధరలకే తయారుచేసే అవకాశం లభిస్తుంది. (Cancer Drug Prices India)

ఈ వార్తలు కూడా చదవండి..

కాంగ్రెస్‌పై మోదీ సెటైర్.. బ్యాలెట్ పేపర్‌తో ఎన్ని సీట్లు వచ్చాయంటూ పోస్ట్

పంజాబ్‌లో కాల్పుల కలకలం.. ఒకరి మృతి