ఒంటరిగా ప్రయాణించాలనుకుంటున్నారా? ఈ 5 ప్రదేశాలు బెస్ట్!

ఇంటర్నెట్ డెస్క్: మీరు ఒంటరిగా ప్రయాణించాలనుకుంటే, సరైన ప్రదేశాన్ని ఎంచుకోవడం చాలా ముఖ్యం. ముఖ్యంగా మొదటిసారి సోలో ట్రిప్ ప్లాన్ చేస్తున్నవారికి ప్రయాణం సులభంగా ఉండాలి, భద్రత ఉండాలి. అలాగే ప్రశాంతంగా మీతో మీరు గడిపే అవకాశం కలిగించాలి. భారతదేశంలో అలాంటి అనుభూతినిచ్చే ఎన్నో ప్రదేశాలు ఉన్నాయి. ఇప్పుడు సోలో ట్రావెలర్లకు చాలా అనుకూలమైన ఐదు ప్రదేశాల గురించి తెలుసుకుందాం...

హంపి (కర్ణాటక)

కర్ణాటకలోని హంపి ఒక బహిరంగ మ్యూజియంలా ఉంటుంది. ఇది యునెస్కో ప్రపంచ వారసత్వ ప్రదేశం. పురాతన దేవాలయాలు ఇక్కడ ప్రత్యేక ఆకర్షణ. బైక్ మీద చుట్టూ తిరగడం, సూర్యోదయం చూడడం, చిన్న కేఫ్‌లలో కూర్చోవడం ఒంటరి ప్రయాణికులకు మంచి అనుభవాన్ని ఇస్తాయి.

వర్కలా (కేరళ)

కేరళలోని తిరువనంతపురం జిల్లాలో ఉన్న వర్కలా, అరేబియా సముద్ర తీరాన ఎత్తైన కొండచరియలు(Cliffs) ఉన్న ఏకైక దక్షిణ కేరళ ప్రాంతం. ఇది అద్భుతమైన బీచ్‌లు, పాపనాశనం బీచ్, జనార్థన స్వామి ఆలయం, యోగా/ఆయుర్వేద కేంద్రాలకు ప్రసిద్ధి.

మజులి ద్వీపం (అస్సాం)

మీకు పూర్తిగా ఏకాంతం కావాలంటే అస్సాంలోని మజులి ద్వీపం మంచి ఎంపిక. ఇది ప్రపంచంలోనే అతిపెద్ద నదీ ద్వీపం. పచ్చదనం, అస్సామీ సంస్కృతి, సత్రియా నృత్యాలకు ఇది ప్రసిద్ధి. పడవ ప్రయాణాలు, మఠాలు, గ్రామాల మధ్య నడకలు మనసుకు ప్రశాంతత ఇస్తాయి. ప్రకృతి, సంస్కృతి దగ్గరగా అనుభవించాలనుకునే వారికి మజులి ఒక మర్చిపోలేని సోలో ట్రిప్ అవుతుంది.

రిషీకేశ్ (ఉత్తరాఖండ్)

గంగా నది ఒడ్డున, హిమాలయాల మధ్య ఉన్న రిషీకేశ్ ఒంటరి ప్రయాణికులకు చాలా ప్రసిద్ధి చెందిన ప్రదేశం. ఇక్కడి యోగా, ధ్యానం, ఆధ్యాత్మిక వాతావరణం మీతో మీరు కనెక్ట్ అయ్యే అవకాశం కల్పిస్తాయి. ఒంటరిగా వచ్చినవారికి అనుకూలంగా ఆశ్రమాలు, యోగా కేంద్రాలు ఉన్నాయి. సాహసం ఇష్టపడేవారికి రివర్ ర్యాఫ్టింగ్, ప్రకృతి నడకలు కూడా అందుబాటులో ఉంటాయి. ప్రశాంతతతో పాటు అనుభవం కావాలంటే రిషీకేశ్ మంచి ఎంపిక.

గోవా

పలోలెం, అగోండా వంటి దక్షిణ గోవా బీచ్‌లు ప్రశాంతతకు ప్రసిద్ధి. ఉదయపు నిశ్శబ్దం, అందమైన సూర్యాస్తమయాలు మనసుకు హాయినిస్తాయి. ఇక్కడ బైక్‌పై తిరగడం, కేఫ్‌లలో కూర్చుని సమయం గడపడం మంచి అనుభవాన్నిస్తాయి. ఒంటరిగా ఉన్నవారికి గోవా వాతావరణం చాలా స్నేహపూర్వకంగా ఉంటుంది.

Note: ఇందులోని సమాచారం ఇంటర్నెట్‌లో అందుబాటులో ఉన్న వివరాల ఆధారంగా మీకు అందించడం జరుగుతోంది. ABN ఆంధ్రజ్యోతి దీనిని ధ్రువీకరించడం లేదు.

Also Read:

థాయ్ మసాజ్ ప్రత్యేకత ఏమిటో మీకు తెలుసా?

పానిక్ అటాక్‌ని ఎలా గుర్తించాలో తెలుసా?

For More Latest News