హోర్ముజ్ జలసంధి దగ్గర అమెరికా దాడులు.. ఖార్గ్ ఐలాండ్ స్వాధీనం!

వాషింగ్టన్/టెహ్రాన్, మార్చి 29: పశ్చిమాసియాలో జరుగుతున్న యుద్ధం కొత్త మలుపు తీసుకుంది. అమెరికా దళాలు.. ఇరాన్‌పై వ్యూహాత్మక దాడులను వేగవంతం చేశాయి. ప్రపంచ చమురు రవాణాకు అత్యంత కీలకమైన హోర్ముజ్ జలసంధి (Strait of Hormuz) సమీపంలో అమెరికా వైమానిక, నౌకాదళాలు భారీ దాడులకు దిగాయి. ఈ క్రమంలో ఇరాన్‌కు చెందిన అత్యంత ప్రధానమైన చమురు ఎగుమతి కేంద్రం 'ఖార్గ్ ఐలాండ్' (Kharg Island)ను అమెరికా దళాలు తమ స్వాధీనంలోకి తీసుకున్నట్లు నివేదికలు అందుతున్నాయి.

ఖార్గ్ ఐలాండ్ స్వాధీనం!

ఇరాన్ ముడి చమురు ఎగుమతుల్లో 90 శాతం ఈ ద్వీపం నుండే జరుగుతాయి. దీనిని స్వాధీనం చేసుకున్నట్లయితే, ఇరాన్ ఆర్థిక మూలాలను అమెరికా దెబ్బతీసినట్లవుతుంది. దీనికి సంబంధించి నివేదికలు అందుతున్నప్పటికీ అధికారిక సమాచారం ఇంకా లేదు. మరోవైపు, రాబోయే కొన్ని వారాల పాటు ఇరాన్ భూభాగంలో భారీ ఎత్తున 'గ్రౌండ్ ఆపరేషన్స్' (Ground Ops) నిర్వహించేందుకు అమెరికా అధ్యక్షుడు ట్రంప్ యంత్రాంగం సిద్ధమవుతోంది. ఇందుకోసం అదనపు దళాలను పశ్చిమాసియాకి తరలిస్తున్నారు.

హోర్ముజ్ జలసంధి దగ్గర ఉద్రిక్తత:

ఈ జలసంధిని మూసివేస్తామని ఇరాన్ గతంలో హెచ్చరించిన నేపథ్యంలో, అక్కడ పట్టు సాధించేందుకు అమెరికా నౌకాదళం నిరంతర దాడులు చేస్తోంది. గత కొన్ని రోజులుగా ఇరాన్ అనుబంధ సంస్థలు గల్ఫ్ దేశాల్లోని చమురు ప్లాంట్లు, అమెరికా స్థావరాలపై దాడులు చేస్తున్నాయి. వీటికి ప్రతిచర్యగా అమెరికా నేరుగా ఇరాన్ భూభాగంపైనే దాడులకు దిగడం అంతర్జాతీయంగా పెను సంచలనంగా మారింది. అమెరికా తీసుకోబోయే 'గ్రౌండ్ ఆపరేషన్' నిర్ణయం ఈ ప్రాంతంలో పూర్తిస్థాయి యుద్ధానికి దారితీసేలా కనిపిస్తోంది. ఐక్యరాజ్యసమితి, ఇతర దేశాలు శాంతి చర్చల కోసం ప్రయత్నిస్తున్నప్పటికీ, ఉద్రిక్తతలు మాత్రం తగ్గడం లేదు.

ఇవి కూడా చదవండి...

సరిగ్గా 11:11 నిమిషాలకు అమరావతి చట్టబద్ధత బిల్లును ప్రవేశపెట్టిన చంద్రబాబు

అమరావతి ఉద్యమంలో మహిళల పోరాటంపై హోంమంత్రి ప్రశంసలు

Read Latest AP News And Telugu News