పాకిస్థాన్ రక్షణ మంత్రి వ్యాఖ్యలపై ఇజ్రాయెల్ తీవ్ర ఆగ్రహం

ఆంధ్రజ్యోతి, ఏప్రిల్ 10: ప్రస్తుతం ఇరాన్ - ఇజ్రాయెల్ మధ్య కుదిరిన కాల్పుల విరమణ (Ceasefire) ఒప్పందం అత్యంత క్లిష్ట దశలో ఉంది. ఈ సమయంలో పాకిస్థాన్ రక్షణ మంత్రి ఖవాజా ఆసిఫ్ సోషల్ మీడియా వేదికగా ఇజ్రాయెల్‌ను ఉద్దేశించి తీవ్ర వ్యాఖ్యలు చేశారు. ఇజ్రాయెల్‌ను 'మానవాళికి శాపం' అని అభివర్ణించడమే కాకుండా, ఆ దేశాన్ని స్థాపించిన వారు నరకంలో కాలిపోతారంటూ అత్యంత కఠినమైన పదజాలం ఉపయోగించారు. లెబనాన్‌పై ఇజ్రాయెల్ దాడులను ప్రస్తావిస్తూ ఆయన ఈ వ్యాఖ్యలు చేశారు. ఒకవైపు ఇస్లామాబాద్‌లో శాంతి చర్చలకు పాకిస్థాన్ మధ్యవర్తిత్వం వహిస్తున్న తరుణంలో, బాధ్యతాయుతమైన పదవిలో ఉన్న వ్యక్తి ఇలాంటి వ్యాఖ్యలు చేయడం చర్చనీయాంశమైంది.

పాక్ మంత్రి వ్యాఖ్యలపై ఇజ్రాయెల్ ప్రభుత్వం తీవ్రంగా స్పందించింది. పాకిస్థాన్ మంత్రి వాడిన భాష దౌత్య నిబంధనలకు విరుద్ధంగా ఉందని ఇజ్రాయెల్ మండిపడింది. ఇలాంటి విద్వేషపూరిత వ్యాఖ్యలను ఏమాత్రం సహించబోమని, ఇది శాంతి ప్రయత్నాలను దెబ్బతీస్తుందని ఇజ్రాయెల్ పేర్కొంది. తమ దేశ వినాశనాన్ని కోరుకునే ఉగ్రవాదులు, శక్తుల నుంచి తమను తాము రక్షించుకునే హక్కు ఇజ్రాయెల్‌కు ఉందని స్పష్టం చేసింది. ఒక దేశ రక్షణ మంత్రి హోదాలో ఉండి ఇలాంటి విద్వేషపూరిత వ్యాఖ్యలు చేయడం బాధ్యతారహితమని మండిపడింది. ప్రాంతీయంగా శాంతిని నెలకొల్పేందుకు అంతర్జాతీయ సమాజం ప్రయత్నిస్తుంటే, పాకిస్థాన్ ఇలాంటి వ్యాఖ్యలతో ఉద్రిక్తతలను పెంచుతోందని ఇజ్రాయెల్ ఆరోపించింది.

ఇవి కూడా చదవండి

ఇరాన్‌తో కాల్పుల విరమణ ఒప్పందం.. నెతన్యాహుపై స్వదేశంలో విమర్శలు..

ఏబీఎన్‌ సిబ్బందికి బెదిరింపులు.. కాకాణిపై కేసు నమోదు